Џез Фактори фестивалот активно ги вклучува младите во своите програми - Канал 5

Култура

Џез Фактори фестивалот активно ги вклучува младите во своите програми

„Џез Фактори Фестивал“ (Jazz Factory Festival) во Битола има повеќеслојно значење за културниот живот во градот, но и пошироко во земјата. 

Џез Фактори фестивалот активно ги вклучува младите во своите програми

Фестивалот не е само музички настан, туку има силна едукативна компонента. Па така оваа година покрај концертите и промоциите на книги, се одржаа и едукативни работилници за учениците од основните училишта и за средношколците.

Во соработка со Австриската амбасада Скопје и Државното музичко училиште - Битола, успешно се одржа инспиративен Мајсторски клас предводен од австрискиот пијанист Lukas Meissl. Млади музичари од различни инструментални оддели имаа можност да учат, да поставуваат прашања и да навлезат подлабоко во светот на џезот преку директна работа со врвен уметник. Атмосферата беше исполнета со енергија, љубопитност и вистинска музичка размена – токму она што им е потребно на младите таленти за да растат.

„Мастер класовите, како овој воден од извонредниот Lukas Meissl, имаат особено значење за младите музичари бидејќи претставуваат ретка можност за директен контакт со врвни интернационални уметници и за стекнување знаења преку практична работа, што е суштинска надградба на формалното образование. Преку вакви средби, учениците не само што ги усовршуваат своите технички и интерпретативни способности, туку се запознаваат и со современи музички трендови, различни стилови и професионални стандарди, што е од огромно значење за нивниот понатамошен развој. Дополнително, ваквите активности силно влијаат врз нивната мотивација, самодоверба и уметничка зрелост, бидејќи им даваат чувство дека се дел од поширока, меѓународна музичка сцена и дека нивниот труд има реална вредност и перспектива“, истакна директорката на Државното музичко училиште, Марија Шамоска Буџаковски.

Особено е значајно што ваквиот мастер клас се реализира во рамките на Државно музичко училиште - Битола, институција која со години вложува во квалитетно музичко образование и активно создава услови за развој на младите таленти.

„Преку вакви иницијативи, училиштето не само што ја збогатува наставната програма, туку ја отвора вратата кон меѓународна соработка и современи образовни практики, со што директно придонесува за подигнување на нивото на музичката едукација во земјата.Учениците беа фасцинирани, оплеменети со нови идеи и начини на музицирање, а се стекнаа и со едно ново искуство преку влијанието на џезот и праксата пренесена преку овој одличен џез изведувач“, додава директорката.

Од друга страна, Jazz Factory Festival има пошироко културно и општествено значење, бидејќи претставува важна платформа за промоција на џез музиката, но и за едукација, вмрежување и размена на искуства меѓу домашни и странски уметници. „Фестивалот не се ограничува само на концертна програма, туку активно работи на создавање нови генерации музичари преку вакви едукативни настани, што го прави клучен фактор во развојот на музичката сцена. Со поддршка од партнери како Austrian Embassy Skopje, фестивалот придонесува за зајакнување на културната соработка и внесување на европски искуства и вредности во локалниот контекст. За сето ова се заблагодаруваме на Сашо Поповски - директорот на овој фестивал кој како и секоја, така и оваа година не не одмина, и повторно нашиот образовен сегмент како училиште го збогати со мастер класот на еден феноменален џез музичар“ - истакна Ш.Буџаковски.

Покрај во Државното музичко училиште, и во Europe House Битола во Офицерскиот дом, беше одржана едукативна работилница за најмладите.

Во една прекрасна атмосфера се разбуди креативноста на најмладите џезери и џезерки, кои учествуваа во работилницата „Jazz Factory For Kids“ и го открија светот на џез музиката.

Џезерите и џезерките слушаа како звучи џезот, пробуваа самите да го отсвират и оттука ја почувствуваа магијата на оваа уметност – слободна, разиграна и жива. Во секој ритам се криеше љубопитност, во секој тон искрена среќа, а во секоја импровизација – храброст, да се биде свој. Работилницата ја водеа дипломци и студенти од Џез одделот на Музичката академија при Универзитетот „Гоце Делчев“ – Штип, кои на сите ја пренесоа нивната љубов кон музиката.Во работилницата се вклучи и професорката од Музичката Академија во Будимпешта, Агнес Лакатош, а учествуваа и директорите на Џез фестивалите од Кикинда и Петровац, Драган Влајниќ и Винко Михајловиќ.

„Тука сме за младите, меѓу детските насмевки и разиграните мелодии, каде ја оживуваме уметноста“, ни изјавија од Europe House.

Во рамките на наставните стандарди за реализација на наставата по Музичко образование, учениците од III одделение од ООУ „Коле Канински“ – Битола, под менторство на наставничката Ирена Богданоска, имаа можност да присуствуваат на оваа работилница, која ја посетија во рамките на програмата посветена на музика за деца, каде што преку слушање и активно учество го збогатија своето знаење и доживување на музиката.

На овој начин, синергијата меѓу фестивалот и образовните институции создава силна основа за развој на младите музичари, овозможувајќи им пристап до знаење, инспирација и професионални контакти, што е од непроценливо значење за нивниот идeн уметнички пат и за унапредување на културниот и образовниот живот во целина.

Тагови: Џез Фактори

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Економија

Работна посета на заменик-министерот Ристески на Република Словенија - фокус на трудот и трудовата мобилност

Делегација предводена од заменик-министерот за економија и труд, Марјан Ристески е во неколкудневна  работна посета на Словенија.

Работна посета на заменик-министерот Ристески на Република Словенија - фокус на трудот и трудовата мобилност

Во рамки на посетата, заедно со претставници од повеќе институции ќе се реализираат работни средби со високи претставници од релевантните институции во Република Словенија во однос на законската рамка, институционалните практики и примената на правото на Европската Унија во областа на трудот, миграцијата и трудовата мобилност.

Во рамки на престојот ќе бидат посетени и реализирани средби со високи претставници на Министерството за економија, труд и спорт, Агенцијата за вработување на Словенија, Министерството за внатрешни и јавни работи, како и Канцеларијата за поддршка и интеграција на мигранти, каде ќе се презентираат искуствата на Република Словенија во примената на релевантното законодавство на Европската Унија и практичното спроведување на политиките во оваа област.

Целта на студиската посета е размена на искуства кои ќе дадат придонес во унапредувањето на политиките и институционалната рамка во областа на трудот и трудовата мобилност, во согласност со европските стандарди.

Студиската посета е организирана од страна на Меѓународната организација за миграции (ИОМ), во рамки на проектите „Искористување на потенцијалот на дијаспората за напредување во пристапувањето кон Европската Унија и мобилноста на работната сила во Западен Балкан“ и „Регионалната програма за управување со миграцијата (RMGP) – фокус на Западен Балкан и Република Турција“.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: Арамија Мицкоски останува посветен на провизиите од дата-центрите

Арамија Мицкоски останува посветен на провизиите од дата-центрите -на сметка на народната струја, народната вода и сметките на граѓаните.

СДСМ: Арамија Мицкоски останува посветен на провизиите од дата-центрите

Шефот на ВМРО-ОКГ повторно рече дека процесот со дата центри е „неповратен“. Кај него е неповратно затоа што веќе ја договорил својата провизија.

Се крие само она што мора да го скрие: кој инвестира, која струја ќе ја јаде, која вода ќе ја пие, каде оди загреаната вода и која провизија седнува за договорот.

СДСМ веќе го праша. Компанија тврди дека има обезбедено 100 мегавати струја и директен пристап до Вардар. Тврди дека Владата дала зелено светло.

А Владата зборува за роботи и Азија, како да сме на саем, не во држава каде што ЕСМ тоне, струјата се увезува скапо, а граѓаните со недели чекаат извештај за тоа што пијат.

Прашањата остануваат.

Кој е инвеститорот?

Која струја ќе ја троши центарот - домашна или увозна, која на крај влегува во сметката на граѓаните?

Која вода ќе ја цица - од Вардар или Лепенец кои веќе се трујат, Треска каде умира риба, или од чешмата во Гостивар?

Каде оди загреаната вода? Во река. Во истата река од која потоа пак се пие, а рибата умира.

Еден голем дата-центар троши струја колку цел град.

Во Ирска центрите веќе јадат над 20 проценти од националната електрична енергија - повеќе од сите градски домаќинства заедно.

Затоа Даблин со години држеше кочница на нови приклучоци.

Амстердам забрани нови центри најмалку до 2030.

Сингапур стави мораториум, па пушти само под најстроги услови.

Њујорк замрзна големи објекти над 50 мегавати.

Град во Калифорнија ги забрани на референдум.

Малезија ги запре системите што се ладат со вода до 2027, заради суша.

Во Чиле проект падна затоа што ќе ги цедеше водоносните слоеви.

Не затоа што светот е против технологија. Затоа што држава што нема струја и вода за своите луѓе не смее прво да ги раздаде на сервери.

Има и бучава. Има агрегати и ладење деноноќно. Има соседство што се празни. Македонија веќе се празни.

Младите си одат поради плата, воздух, вода и иднина. Да им додадеш уште еден индустриски шум и уште една дупка во мрежата не е развој. Тоа е забрзување на иселувањето.

СДСМ не е против дигитализација. Ова не е дигитализација. Ова е хардвер за туѓа дигитализација.

СДСМ е против кражба облечена во сервер. Нема датум. Нема име на инвеститор. Нема јавен договор за мегавати и литри.

Нема проект. Има провизија што бара покритие.

Додека Мицкоски зборува за иднина, граѓаните гледаат сметка која тие ја плаќаат. Затоа што струјата ќе ја платат тие. Без вода ќе останат тие. Бучавата ќе ја слушаат тие. А провизијата ќе ја земе бандата.

Кој крие инвеститор, крие цена. Кој крие цена, ја знае однапред. А ја плаќате вие.

Скопје, 15.09.2026

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВМРО-ДПМНЕ:Наместо во служба на правдата и граѓаните, правосудството се претвори во бастион на СДС и ДУИ кој го штити Филипче, Заев

Наместо во служба на правдата и граѓаните, правосудството се претвори во бастион на СДС и ДУИ кој го штити Филипче, Заев и останатите.

ВМРО-ДПМНЕ:Наместо во служба на правдата и граѓаните, правосудството се претвори во бастион на СДС и ДУИ кој го штити Филипче, Заев

Македонското правосудство се претвори во бастион на СДС и ДУИ и со сите преостанати сили се стави во служба на одбрана на нивните криминалци.

Остатоците на СДС и ДУИ во правосудните органи за да ги спасат од кривична одговорност Венко Филипче, Зоран Заев и таквите како нив укинуваат пресуди, стопираат истраги, враќаат предмети на повторување на постапки.

Зависно од предметот и што тоа му треба на ликот кој се гони или треба да се гони за одредено кривично дело.

Така, за автобуската несреќа на Дурмо Турс кај Ласкарци со 16 жртви, пресудата е укината. За 14 жртви кои живи изгореа во пожарот во модуларната болница во Тетово, затворена е истрагата и обвинение за кривична одговорност за Филипче нема. Тука е запрената истрага за случајот Мазут, тежок 167 милиони евра.

Сето ова не е случајност, затоа што ова е правосудниот систем воспоставен од СДС и ДУИ кој и ден денес ги штити нивните луѓе и интереси. Ова покажува дека СДС и ДУИ ја загубија власта, но нивните судии и обвинители останаа нивното последно упориште за одбрана на нивниот криминален систем што го создаваа со години.

Малкумината остатоци на СДС и ДУИ бирани во партиските штабови во Зајас и Струмица кои грчевито ги штитат од одговорност нивните поранешни државни функционери се ликови како Ислам Абази, Вилма Русковска, Добрила Кацарска, Африм Фидани.

Секогаш кога луѓе на СДС и ДУИ треба да одговараат пред лицето на правдата, тука се нивните инсталации во правосудството за предметите да се развлекуваат, истрагите да се затвораат, а пресудите да паѓаат.

Од Ласкарци и Модуларната до случајот Мазут, истата правосудна мрежа ги штити истите политички структури и тоа е причината зошто граѓаните во правосудството имаат само 2% доверба.

Затоа што правосудството, наместо да биде бастион и упориште на правдата, се претвори во бастион на СДС и ДУИ.

Но, и СДС и ДУИ, и нивните корумпирани ликови, треба да знаат дека времето на недопирливите мора и ќе заврши, одговорност за секој според делото, ќе има.

Центар за комуникации на ВМРО-ДПМНЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер