Дизниленд Абу Даби ќе стане седмиот глобален парк на компанијата, беше објавено денеска, непосредно пред објавувањето на финансиските резултати за вториот квартал.

Тематските паркови се веројатно најважниот извор на приходи на Дизни - тие учествуваа со 59 проценти во оперативниот приход во фискалната 2024 година, во време кога конкуренцијата во стримингот се интензивира.

Иако бројот на посетители на американските паркови малку се намали минатата година, „Дизни“објави дека посетеноста во САД повторно се зголемила, а приходите значително скокнале во првиот квартал. Иако компанијата гледа потенцијал во меѓународните одморалишта, каде што бројот на посетители и потрошувачката растат, Кина е проблем поради трговската војна - посетеноста на парковите во Шангај и Хонг Конг се намали, а продажбата во меѓународните паркови падна во првиот квартал.

„Мирал“, со седиште во Абу Даби, ќе биде одговорна за целосната изградба, развој и управување со одморалиштето, додека „Дизни Имеџинирс“ ќе биде одговорна за креативниот дизајн и надзорот на работењето. Се очекува потенцијално отворање на почетокот на 2030-тите, а првичниот план вклучува еден тематски парк и непознат број хотели.

- Секој пат кога отвораме нов тематски парк... важно е едноставно да не земаме парк што веќе постои и да го копираме на нова локација. Секој парк мора да ја одразува, преку дизајнот, храната и други аспекти, специфичноста на местото на кое се наоѓа. Така сакаме да биде тука во Абу Даби“, изјави за Си-Ен-Ен Џош Д’Амаро, претседател на „Дизни Експериментс“.

Цел нов свет

Аеродромите во Абу Даби и Дубаи имаат амбициозни планови со визија да станат водечки глобални центри што поврзуваат една третина од светската популација со летови пократки од четири часа. Тоа ги вклучува 1,4 милијарди луѓе во Индија, од кои многумина полесно би можеле да стигнат до Абу Даби отколку до парковите на Дизни во Шангај или Хонг Конг.

Д’Амаро изјави дека околу 500 милиони луѓе во регионот на Блискиот Исток имаат капацитет да посетат тематски парк на Дизни. Таа достапност, во комбинација со развојот на земјата насочен кон иднината, беше клучна во одлуката на Дизни.

Новиот комплекс ќе биде сместен на островот Јас, каде што Мирал веќе има развиено одморалишта како што се „СиВорлд“ на островот Јас Абу Даби, „Јас Вотерворлд“ и „Ворнер Брос. Ворлд“.

Островот Јас е на 20 минути возење од центарот на Абу Даби и 50 минути од Дубаи. Веќе има тематски паркови, голф терен, марина, шеталиште покрај вода и трговски центар со 165 ресторани.

Земјите на иднината

Дизни вели дека новиот парк ќе биде „технолошки најнапреден“, вклопувајќи се во футуристичкиот изглед на Абу Даби.

За разлика од другите паркови каде што замокот е централна точка и наликува на бајка, овој ќе биде сосема поинаков - уметничката визуелизација прикажува спирална, кристално слична структура, која доминира во пејзажот на паркот.

Исто така, ова ќе биде првиот Дизниленд одморалиште што ќе се наоѓа директно на вода. (Токио Дизни Ресорт се наоѓа по должината на брегот на Пацификот, но гостите немаат директен пристап до водата.)

Компанијата, исто така, планира да ги искористи своите неодамнешни инвестиции во интерактивни игри.

На пример, рече Д’Амаро, Дизни би можел да го користи „Unreal Engine“ - алатка што ја користи во многу од своите филмови - за да создаде парковски атракции што визуелно имитираат игри и филмови.

- За нашите гости да можат да доживеат приказни од филмови и игри во реално време - директно во паркот. Многу сме оптимисти во врска со овој простор, а особено за овој проект, бидејќи е технички исклучително напреден, имаме огромен потенцијал - вели тој.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.