Живот

Диви свињи ноќе берат грозје во Тиквешко

Ноќна берба на грозје од страна на диви свињи се случува за време на гроздоберот во Тиквешко.

Лозари потврдуваат за МИА дека годинава родот од лозјата го делат со шумски животни. Дознаваме дека ова се случува во Кавадаречко, Неготинско и Демиркаписко. Се зема данок од мускатните благи сорти грозје, но и од најзастапената црна сорта винско грозје, „кратошија" и „вранец". Или како што велат лозаропроизводителите, животни јадат сè што ќе начекаат.

На фотографиите јасно се гледа грозје паднато на земјата од лозјето, кое останало под налетот на гладната дивина. За тоа кој се гоштавал со овошје говорат трагите од стапалките наоколу. Почвата е како преорана.

Младиот Дарко Најдов, жител на поткожувското село Горна Бошава, потврди за МИА дека дивите свињи овој гроздобер се насладувале и од грозјето во Бошавијата. Во месностите Скалата, Свињиште и други.

– Го јадат грозјето, но идат и по ореви, лешници. Па така пред некој ден влегоа во еден овоштарник на десетина метри од селската црква „Свети Илија". Таму отишле по сливи, јаболка, круши, а раскопале и од посадениот компир, појасни Најдов.

Ортаци на газдите за време на гроздобер

– Вистина е дека не се мали количините грозје кои се обрани од дивите свињи, наместо да завршат за тиквешко вино или домашна препечена ж’та. Кај што фатиле, редум јаделе. Во мојот лозов насад од три декари апнале грозје од еден декар. Не знам која е причината, дали се намножиле или пак останале без храна и вода во повисоките места на планините, каде што вообичаено живееја. Се сладат со сите сорти грозје, ама ми се чини дека најмногу ги обожаваат миризливите гроздови зрна. Во моето лозје, на пример, го обрале и грозјето без семки, кое главно завршуваше за слатко, па годинава нè оставија без омилениот десерт, рече тиквешанец.

Благој Стојков, долгогодишен ловџија од Кавадарци, кажа дека на одделни места во Кавадаречко, дивите свињи се како ортаци на газдите на лозјата во време на гроздобер.

– Ловец сум над 40 години. Вистина е дека има многу диви свињи. Најмногу во шумата и во планината, но ги има и на места на кои порано ги немаше. Тие се навртија и по селата, во пониските делови, кои некогаш беа несвојствени за нив. Порано беа високото и не се симнуваа долу по грозје. Сега најверојатно немаат што да јадат горе, па затоа слегуваат долу. Ама и ниското, кое порано беше чистини, сега како да се пошуми. Нивите со децении оставени без некој да ги работи, самите што се вели се пошумија со смреки, станаа орман. Дивите свињи крадат грозје и во моето родно село Чемерско, под Кожуф. „Вранец" има, „вранец" јадат, кажа тој.

Го прашавме дали е можно да се испијанат од јадење грозје, како една коза за која слушнавме дека се прејала грозје, па се тетеравела.

– Од комиње можеби и може да се заматат, оти тоа е веќе кинисато на вино. Од грозје не им е ништо, та дури и да се прејадат со ова овошје, истакна тој.

Несекојдневни пијанки, овци и крави се најале пресно комиње и се натрескале

Пред 14 години се случи една несекојдневна пијанка, кога овци и крави се испијанија од комиње во Тиквешко, како најголем лозаровинарски регион во државата.

– Не знаев дека овците можат да се опијанат од комиње! Им дадов малку од пресното комиње од винарска визба, а потоа ги отерав да се одморат под едни дрвја. Верувале или не, сите до една паднаа. И почнаа да се препелкаат, раскажа тогаш сточар од Неготино, за необичната пијанка на своето стадо.

Се загрижил.

– Што да правам сега, си реков. И ги оставив до зајдисонце да се трезнат. Кога малку си придојдоа на себеси, полека, полека ги отерав накај дома. Само пет овци ми останаа мртви пијани. Тие не можеа да се отрезнат и да станат на нозе. По нив се вратив со коњската кола и ги товарив на неа. Да ми кажуваше некој, немаше да верувам. Беа исти како човек кога ќе препие вино или ракија. Кога ќе претера и не си ја знае мерката, објасни тогаш сточарот.

Откако му се случило ова, тој знаеше дека на стоката може да ѝ се дава комиње, дури и дека тоа било добра храна за неа, ама да е отстоено најмалку 15 дена. Да е превриено.

– А штом чуре, превриено е. Во спротивно, ќе ги кутне овците или кравите!, велеше сточарот.

Токму такво беше комињето што тој и неговиот пријател го собираа во близина на винарска визба. Превриено, чуреше. Потоа дома го мешале со пченица, крма и слично. Убаво било и само комиње, но уште поубаво мешано.

– Со мезе, се шегуваше сточарот.

– Превриеното комиње не е штетно и за стоката е како чашка вино за здравје. За расположение. Оти и на добитокот му треба расположение како што им треба на луѓето, се мајтапеше искусниот сточар во третата доба од животот.

Тогаш ни раскажа и за друг случај.

– Во Неготинско имаше случај кога крави се најале пресно комиње и се натрескале. Тие што успеале да легнат, поспале и се отрезниле. На една од пијаните крави ѝ се „разиграле" нозете, една наваму, друга натаму и скршила една нога, раскажуваше дедото сточар./МИА.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Димитровски: Советничките прашања се инструмент за транспарентност на Советот

„Од формирањето на овој состав, правото да се практикува инструментот советнички прашања, како еден од принципите на транспарентност при управувањето е добро поставен и немам намера да дозволам, под разни притисоци овој инструмент да биде исклучен.“

„Од формирањето на овој состав, правото да се практикува инструментот советнички прашања, како еден од принципите на транспарентност при управувањето е добро поставен и немам намера да дозволам, под разни притисоци овој инструмент да биде исклучен и со работата на Советот да биде скриен. Секој советник си носи одговорност пред јавноста за своето однесување и за своите дискусии и за своето молчење и можеби најважно од се, секој советник си носи одговорност за одлуките кои ги поддржува“, истакна Даме Димитровски претседател на Совет на Град Скопје на денешната седница.

Димитровски посочи дека седниците на Советот мора да бидат транспарентни со тоа што, правото за поставување прашања од страна на советниците не смее да се одземе ниту пак да се ограничи правото на градоначалникот да даде одговор на поставените прашања.

„Ние не можеме да дозволиме да не бидат седниците на Советот транспарентни и мора да бидеме одговорни за своите постапки. Најпрво, не смееме да им го одземеме правото на советниците да поставуваат прашање и второ не смееме да му го ограничиме правото на градоначалникот да даде одговор на поставеното прашање“, рече Димитровски, се наведува во соопштението на ВМРО-ДПМНЕ..

Европа

Путин во обраќањето: Не можеме да бидеме сигурни дека нема да се користи нуклеарно оружје(ВИДЕО)

Рускиот претседател Владимир Путин се обраќа на годишниот форум на Валдај клубот, каде што се очекува да ги изнесе своите најнови ставови за војната и односите со Западот.

Путин последен пат се појави во јавноста вчера, кога се обрати пред новоизбраниот руски парламент во Москва и повика на континуирана поддршка за воените напори. Тој им порача на политичарите да го дадат приоритет на зајакнувањето на одбранбените капацитети на Русија и да им дадат поддршка на војниците и нивните семејства, објави Скај Њуз.

Тој, исто така, ги пофали војниците и ветераните и ги повтори претензии на Русија кон окупираните украински територии.

„На Запад, ни ставија до знаење дека нема место за нас“

Кога го прашаа дали жали за фактот што Русија се обиде да се интегрира во системот на западните земји на почетокот на 2000-тите, Путин одговори: „Русија предложи соработка и направи сè за да ја постигне, но на Запад јасно ставија до знаење дека нема место за нас таму. Во исто време, тие продолжија агресивно да „удираат“ и да „се обидуваат да ги одгризат“ деловите од Русија.“

Тој се осврна на запленувањето на руски бродови. „Русија се залага за слобода на навигација и се спротивставува на сите ограничувања. Нема потреба да се создаваат нови правила, тие веќе постојат и само треба да се почитуваат“, нагласи тој.

Политикологот Сергеј Караганов му рече на Путин дека наскоро ќе се постави прашањето: „Дали треба да се вклучиме во реконструкцијата на ослободените територии или да развиваме други делови од земјата, особено Сибир?“

„Русија ќе мора да го обнови животот во ослободените региони, како и да го развие животот во други региони. Потребно е да се направи сè за луѓето на ослободените територии да го достигнат просечното ниво на животен стандард во Русија. Генерално, успеваме во ова на Крим и Донбас. Ќе одлучиме што треба да се обнови и кои компании да се преместат врз основа на економски фактори“, најави тој.

„Мора да имаме предвид од каде доаѓаат испораките на воена опрема за Украинците“

Модераторот потсети дека пред неколку недели руското Министерство за одбрана објави список на европски компании од кои пристигнуваат испораки на воена опрема во Киев. Тој тврди дека еден ден можеби ќе биде потребно да се нападнат.

„Дали ова може да се смета за причина за повикување на Член 5 од Повелбата на НАТО? Дали Русија е подготвена за ова?“, праша модераторот.

„Што се однесува до компаниите што снабдуваат вакви производи, Русија мора да ги има предвид и да знае од каде доаѓаат сите овие испораки“, одговори Путин.

„Ние не се плашиме од никого“

Продолжувајќи да одговара на прашања во Москва, Владимир Путин се осврна на растечките тензии околу Калининград.

Потсетете се дека Русија го предупреди НАТО дека ќе биде подготвена да прибегне кон нуклеарно оружје како одговор на секој обид за изолирање на балтичката енклава.

Рускиот лидер вели дека секој потег против територијата би бил „вистинска ескалација“, повторувајќи ги позициите што претходно ги изразија руските претставници. „Ние не плашиме никого“, тврди тој потоа, бранејќи ја реакцијата на својата земја.

„Изјавата на министерот за надворешни работи и писмата испратени до некои земји не се закана, туку одговор на обидите да ни се закануваат“, тврди Путин.

„Доколку има директен напад врз Русија - тука мислам на Калининград, но можеби и на други територии - тогаш, секако, прашањето за користење на целото оружје што нашата земја го има на располагање неизбежно и веднаш ќе биде на дневен ред. Тоа е неизбежно“, предупреди тој.

„Не можеме да бидеме сигурни дека нема да се користи нуклеарно оружје“

Владимир Путин предупредува дека е невозможно да се исклучи можноста за употреба на оружје за масовно уништување и нагласува дека е потребно да се спречи такво сценарио. Тој вели дека ескалацијата „нè турка до работ на бездната“.

„Водечките земји во светот во моментов имаат оружје што може да го уништи целиот живот или барем да го отвори патот за катастрофални последици“, рече тој.

„Можеме ли да бидеме сигурни дека тоа оружје никогаш нема да се користи? За жал, не можеме да бидеме сигурни“, истакна тој.

Тагови: Владимир Путин

Македонија

Обвинителството побара газда Деко да остане во притвор, претходно понуди 200.000 евра гаранција

Доцна попладнево до Кривичниот суд од Обвинителстворо е доставен предлог за определување нови мерки за обезбедување присуство против Дејан Јованов- Деко, сопственикот на „Пулс“.

Доцна попладнево до Кривичниот суд од Обвинителстворо е доставен предлог за определување нови мерки за обезбедување присуство против Дејан Јованов, кој веќе е во притвор за предметот поврзан со пожарот во Кочани, по истиот ќе се постапува во текот на утрешниот ден, информираат од Кривичниот суд во Скопје.

Првообвинетиот сопственик на Пулс, Дејан Јованов Деко, на денешното рочиште беше спроведен од притвор. Од 3 октомври тој требаше да се брани од слобода со оглед на тоа што истекува законскиот рок од една година за определување притвор, а Обвинителството може да побара поблаги мерки за да го обезбеди неговото присуство. Во меѓувреме неговата одбрана понуди 200 илјади евра гаранција, а Обвинителството се уште не дало мислење.