Премиерот Мицкоски соопшти дека тие ќе бидат евакуирани со владиниот авион, најверојатно преку Египет, а очекувањата како што кажа, се целиот процес да почне веќе утре. За сега како што потврдуваат од МНР за Канал 5, барања за евакуација имало само од Израел, а нема ниту едно од македонски државјани во Иран.

„Секојдневно сум во комуникација со министерот за надворешни работи и трговија, Тимчо Муцунски и се прави план за евакуација на заробени македонски граѓани. Ќе биде ангажиран и владиниот авион да бидат пренесени во некоја од соседните земји, најверојатно во Египет. Во моментов се девет граѓани, и очекувам до утре да заврши евакуацијата“, рече Мицкоски.

Во Израел во моментов се заглавени 40 илјади странци, а до сега официјално евакуација побарале 22 македонски државјани. Додека, небото над Израел е затворено за комерцијални летови, воздушните и ракетни напади меѓу Израел и Иран се разгоруваат. Израел до сега потврди 25 жртви, а Иран над 200.

Иранските власти во меѓувреме соопштија дека подготвуваат документација за повлекување од меѓународниот договор за неширање на нуклеарно оружје. Портпаролот на иранското МНР Есмаил Багај најави и дека неговата земја ќе ги прекине нуклеарните преговори со САД, бидејќи како што кажа, не можат да преговараат со земја која поддржува агресија врз Иран.

-Документите кои ги споменавте за повлекување од договорот за неширење на нуклеарно оружје се подготвуваат. Ние сме во тесна координација со парламентот и секако секоја одлука која ќе ја донесе парламентот ќе биде обврзувачка. Ние помагаме во процесот на изготвување на документите,- - Есмаил Багај – Портпарол на МНР на Иран.

Израелската армија пак, тврди дека успеала да воспостави целосна воздушна надмоќ над Иран, но и дека успеале да го ликвидираат раководството на разузнавачкиот оддел од исламската револуционерна гарда.

-Можеме да кажеме дека постигнавме целосна воздушна надмоќ над небото на Техеран. Ги напаѓаме во реално време, локациите од каде Иран истрелува ракети кон Израел. / Го елиминиравме, главниот генерал на одделот за разузнавање на исламската револуционерна гарда. Тие беа одговорни за нападите од иранските сојузници врз гранците на Израел и дистрибуцијата на оружје со намера да го нападнат Израел,- - Ефи Дефрин – Портпарол на израелската армија.

И додека ракетите летаат меѓу Тел Авив и Техеран, нападите со внимание се следат и во државите од соседството, а особено во Либан и Кипар.

Последната ескалација меѓу Израел и Иран започна во петокот кога израелските власти соопштија дека започнале со операција за уништување на иранската нуклеарна програма. Во почетните напади беа уништени низа на нуклеарни и воени инсталации, а изминатите неколу дена ликвидирани беа и голем број на високи ирански воени лица.