Денеска е Собор на Свети Јован Крстител - Канал 5

Живот

Денеска е Собор на Свети Јован Крстител

Со оглед дека главната улога на Свети Јован се оствари на денот на Богојавление, древната Црква денот по Богојавление му го посвети на неговиот спомен.

Денеска е Собор на Свети Јован Крстител

Житие

Со оглед дека главната улога на Свети Јован се оствари на денот на Богојавление, древната Црква денот по Богојавление му го посвети на неговиот спомен. За овој ден се врзува и настанот со раката на Светиот Предвесник. Евангелистот Лука, кој посака да го пренесе Јовановото тело од Севастија, во којашто големиот Пророк беше убиен од царот Ирод во Антиохија, родното место на Св. Лука, успеа да ја пренесе само едната рака на Свети Јован, којашто во Антиохија ја чуваа до 10 век. Потоа беше пренесена во Цариград, но во времето на Турците исчезна оттаму. Свети Јован Крстител се прославува неколку пати во годината, но народот најмногу го празнува овој ден, 7 јануари. Меѓу евангелските личности околу Спасителот тој има посебно место: и според начинот на доаѓањето во светот, и според улогата на Крстител на луѓето за покајание, и како Крстител на Месијата, најпосле и според трагичното заминување од овој живот. Се одликуваше со толкава морална чистота што навистина можеше попрво да биде нарекуван ангел одошто смртен човек. Меѓу сите Пророци Свети Јован е единствениот кој можел и со рака да Го покаже Оној за Кого пророкувал. За раката на Светиот Предвесник се раскажува дека секоја година на денот на неговиот спомен архиерејот Антиохиски ја изнесувал пред народот. Понекогаш таа рака се јавувала раширена, а понекогаш згрчена. Во првиот случај означувала родна и богата година, а во вториот неродна и гладна.

Тропар

Споменот на праведникот е со пофалби, а тебе ти е доволно и сведоштвото на Господа, Претечо, оти навистина се помажа најпочитуван меѓу пророците, бидејќи се удостои да Го крстиш во водите Оној за Когошто тие проповедаа. Затоа, откако пострада за вистината радувајќи се, и на оние во адот им Го благовести Бога Кој се јави во тело, Кој го зема гревот на светот и ни дарува милост голема.

Кондак

Од Твоето доаѓање во тело, Јордан се исплаши и со страв се враќаше. Исполнувајќи ја, пак, својата пророчка служба, Јован со треперење се смалуваше; ангелските сили се чудеа, гледајќи Те во водите крштеван во тело; и сите кои беа во мрак се озаруваа, воспевајќи Те Тебе, Кој се јави и ја просветли вселената.

Женски Водици

Именден прославуваат Јовановци. Овој ден се вика уште и Женски Водици поради што главен збор во изведувањето на обичаите имаат жените. Покрај другото на овој ден жените одат по коледица, и тоа само по куќите од својата компанија.

Најпрвин една девојка облекуваат во невестинска облека, таа бацува рака и ги собира подароците, најчесто пари. Одејќи низ селото водичарките пеат: „Појдов дојдов низ село / најдов сено косено...“ во дворот од куќата: „Овде дворје метени / овде моми плетени...“, во куќата на секој член од семејството му пеат посебна песна во зависност од неговата старост и положбата во фамилијата. На домаќинот му се пее песната: Домаќине Стамјанине, дали пиеш или спиеш, ако пиеш весели се, ако спиеш разбуди се. Долетало лепо пиле на рамена на Стамена. Тогај велит домаќинот: ‒ Ај подајте лак и стрела, да застрела ова пиле. Одговори лепо пиле: ‒ Не сум пиле за стрелање, тук сум пиле аберџија, абер носам од далеку, ти си имаш мила сина, царот има мила ќерка, двајца да се сосватите, и пак да се понашате како вејка со јаболка, како нива со пченица, како трло со јаголнца. На жена со машко дете ѝ се пеела песната: „Има мајка мила сина“, на жена со ќерка: „Има мајка мила ќерка“ или „Има мајка мили ќерки“, ако имала повеќе женски деца, а на жена без деца и се пеела песната „Еливер ми коња коит“ итн. Според содржината но и според начинот на исполнувањето овие песни се блиски со лазарските песни.

Најсвечено и највесело е вечерта кај кумот кога се одврзува крстот и кога кумот му го предава крстот, а со тоа и кумството, на новиот кум. Стариот и новиот кум седнуваат еден до друг, кумот го одврзува крстот и на секоја фамилија од компанијата ѝ дава по еден страк од босилекот и по дел од црвениот конец со кој бил врзан крстот. Потоа крстот му го предава на новиот кум и му го честита кумството. По ова неколкумина мажи го креваат новиот кум три пати високо, до таванот, а сите присутни стануваат и пеат: Сопаши се, стари куме опаши се, нови куме, личен Господ се распашал, со јариња, со јагниња, со дечиња во куќава, со бериќет низ полено, танки ржи до шлемиња, пчејнците до гредите, јачмењата до појаси, а урвите до колена. Исчекале и в година, и в година и за многу сосе рода што имаме и мајкина и таткова. Додека го креваат кумот тој благословува да се живи луѓето, да се јачи компанијата, а потоа на низата со пари околу крстот врзуваат уште една пара што означува уште една успешно помината година. Од сиве овие активности на кумот може да се види дека во народното верување тој ја претставува врската со богот заштитник. Во Разлошко вечерта спроти Водици (Јордановден) се правела „Попова најатка“, со посна храна исто како и на Бадник. На овој ден свештеникот одел низ селото и со светена вода ги прскал куќите, со што ги отстранувал злите демони познати како „караконџери“. Со тоа завршувале и Поганите денови. Во селото Елешница, следниот ден на Водици, по службата во храмот „Св. Атанасиј“ народот заедно со свештеникот, оделе на реката каде што го фрлале крстот во водата. При овој чин тројца мажи пукале со пушки во воздухот. По фрлањето на крстот и осветувањето на водата сите се миеле за здравје, а вода носеле и дома, за да се измијат тие што не можеле да појдат на реката, како и за да ги попрскат просториите во куќата и во шталата кај стоката. На тој ден на реката ги крштевале децата родени во Караконџеровите денови, зашто таквите деца не ги крштевале во црквата.

Тагови: Свети Јован Крстител

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Комарците шират опасен вирус во Шри Ланка, болниците се полни- активирани дронови и војници (ВИДЕО)

Шри Ланка се соочува со најлошата епидемија на денга треска во последната деценија. 

Комарците шират опасен вирус во Шри Ланка, болниците се полни- активирани дронови и војници (ВИДЕО)

Властите ја распоредија војската да користи беспилотни летала за скенирање на покривите и другите потенцијални места за размножување на комарци за застоена вода. Вирусот уби 56 лица во јужноазиската земја оваа година и зарази повеќе од 77.000 луѓе, од кои повеќе од една четвртина само во јули.

Денга треската, која ја пренесуваат комарци, е честа појава во тропските региони, но со зголемувањето на глобалните температури, се шири во нови области, вклучувајќи ја Европа и Медитеранот. Според Светската здравствена организација (СЗО), бројот на пријавени случаи низ целиот свет се зголемил од околу 500.000 во 2000 година на 14,4 милиони во 2024 година, објавува Би-Би-Си.

Што е денга треска и кои се симптомите?

Денгата е вирусна треска предизвикана од вирусот денга, кој се пренесува на луѓето преку заразени комарци Aedes. Овие комарци се размножуваат во застоена вода, како што се во кофи, вазни и цветни леи. Тие се најактивни во текот на денот и најчесто касаат веднаш по изгрејсонце и во самрак.

Многу заразени лица немаат никакви симптоми. Кај оние кои ги развиваат, најчести се висока температура, главоболка, болки во мускулите и зглобовите, гадење и осип. Непријатноста обично поминува во рок од една или две недели. Во тешки случаи, денгата може да предизвика внатрешно крварење, па дури и смрт. Луѓето кои се заразуваат по втор пат имаат поголем ризик од развој на тешка форма на болеста.

„Постојат четири соеви на вирусот. Оздравувањето од еден сој обезбедува заштита само од тој специфичен сој“, објаснува Капила Канангара, директорка на единицата за контрола на денгата во Шри Ланка. „Тој имунитет не важи за други соеви на вирусот. Ова значи дека лице заразено со еден сој сепак може да се разболи ако го касне комарец кој носи друг сој. Ова може да доведе до уште посериозна инфекција“, изјави Канангара за Би-Би-Си.

Не постои единствена вакцина

Бидејќи не постои единствена вакцина, третманот се сведува на ублажување на симптомите, најчесто со лекови како што е парацетамол. Пациентите со тешки симптоми мора внимателно да се следат во болница бидејќи компликациите можат да бидат фатални.

Ненадејното зголемување на бројот на заразени е поврзано со циклонот што го погоди островот минатиот декември. Тој остави големи количини отпад, кои станаа идеално место за размножување на комарци. Владата ја задолжи армијата да користи беспилотни летала за проверка на покривите на куќите, училиштата и градилиштата, додека полицијата спроведува директни инспекции на домовите. Само овој месец беа исчистени речиси 11.000 места за размножување на комарци, а сопствениците на повеќе од 4.000 згради беа казнети за неодржување.

Иако инфекцијата е присутна низ целата земја, главниот град Коломбо и другите урбани центри се најпогодени. Болниците обезбедија дополнителни кревети и продолжено работно време. „Бројот на пациенти е голем, а клиничката слика е тешка“, изјави Канангара за Ројтерс. Тој, исто така, истакна дека околу 75% од случаите се поврзани со поопасниот сој на вирусот. Поради ограничениот капацитет, лекарите им советуваат на пациентите со поблаги симптоми да се одморат и да се опорават дома. Властите размислуваат за воведување вакцина, но експертите предупредуваат дека нејзиниот развој е комплициран од постоењето на четири различни соеви на вирусот. Шри Ланка претходно се соочи со големи епидемии на денга треска. Во 2017 година, болеста одзеде 450 животи по сезоната на обилни монсунски дождови.

Тагови: комарци шри ланка

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Во Либерија се пронајдени речиси четири тони кокаин- уапсени се двајца странци

Властите во Либерија запленија речиси четири тони кокаин, чија вредност се проценува на 317 милиони долари (277 милиони евра). 

Во Либерија се пронајдени речиси четири тони кокаин- уапсени се двајца странци

Тоа е една од најголемите заплени на дрога во историјата на таа западноафриканска земја, пишува Euronews.

Операција во близина на главниот град

Дрогата беше откриена во операција на патот што води до меѓународниот аеродром Робертс, околу триесет километри од Монровија. Уапсени се двајца странски државјани.

Државниот обвинител и министерот за правда изјавија дека заплената разоткрила „организирана, софистицирана, комплексна и добро финансирана мрежа за трговија со дрога“.

Истражителите пронајдоа приближно 3.971 килограм преработени плочки со сомнителен кокаин. Нивната улична вредност беше проценета на 317,7 милиони долари (279,1 милиони евра), додадоа официјалните лица.

Либериската национална полиција објави фотографии од голем камион со отворен товарен простор, кој содржеше вреќи со сомнителна супстанца и други докази собрани по рацијата во вторник.

Претседателот најави решителна борба

Оваа заплена следеше по слична голема операција во јуни. Потоа властите на истиот аеродром пресретнаа 237,6 килограми кокаин скриен во комерцијален товар. Поради тој случај, беа покренати обвиненија против пет мажи и една логистичка компанија.

По најновата акција, либерискиот претседател Џозеф Боакаи вети дека ќе ги „разоткрие и уништи“ мрежите зад трговијата со дрога во Либерија. Тој најави координирана истрага и рече дека „секое лице за кое ќе се утврди дека е одговорно ќе биде целосно одговорно пред законот“.

Тагови: кокаин

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Среде бел ден упаднале во градското собрание во Мексико и го убиле градоначалникот

Градоначалник е убиен вчера во мексиканската федерална држава Морелос, откако преживеа претходен обид за атентат на почетокот на годината. 

Среде бел ден упаднале во градското собрание во Мексико и го убиле градоначалникот

Тој е 14-ти градоначалник убиен откако Клаудија Шајнбаум стана претседател на Мексико во октомври 2024 година.

Валентин Лавин Ромеро, член на Зелената партија, сојузник на владејачката левичарска партија Морено, беше ранет кон крајот на јануари кога беше нападнат од вооружени лица на бензинска пумпа покрај автопатот, објавува Гардијан.

Овој пат, напаѓачите влегоа во градското собрание на Темоак, град во близина на Сиудад де Мексико, сред бел ден и го убија Лавин Ромеро пред да избегаат со мотоцикл. Властите сè уште не утврдија мотив ниту ги идентификуваа осомничените, но обвинителството на Морелос вети дека ќе „ги исцрпи сите можности за истрага“.

Наводно, убиениот градоначалник имал врски и со криминалци

Речиси 100 градоначалници се убиени во Мексико од 2006 година, кога тогашниот претседател Фелипе Калдерон ја ангажираше војската во борбата против групите на организиран криминал. Таа одлука на крајот доведе до пораст на насилството поврзано со дрога.

Локалното ниво на власт е најмалку заштитениот дел од државниот систем и токму таму криминалните групи се обидуваат да склучуваат договори со властите со цел да ја консолидираат контролата врз локалните области и бизниси.

Локалните медиуми објавија дека самиот Лавин Ромеро наводно имал врски со локалните криминални групи. Неговата свекрва, поранешна благајничка на градската администрација, била уапсена во септември 2025 година под сомнение за поврзаност со криминалната група „Лос Апарицио“ и учество во киднапирања.

Поставен транспарент во центарот на градот

Во март, активистичката група Народен фронт за одбрана на земјата и водата побара од властите да го истражат Лавин Ромеро за неговата наводна вмешаност во убиствата на двајца активисти, Самир Флорес и Сандра Роса Камачо Флорес.

Отприлика во исто време, три месеци по првиот обид за атентат врз него, во центарот на Темоак бил поставен транспарент, наводно дело на криминална група, обвинувајќи го Лавин Ромеро дека ги штити нивните ривали и барајќи од него да застане на страната на нивните интереси.

Неговото убиство се случува во време кога федералната влада на Мексико презема мерки за сузбивање на корупциските мрежи меѓу локалните власти и криминалните групи како дел од операцијата „Рој“, во која беа уапсени 85 службеници во три федерални држави, вклучувајќи го и Морелос.

Стапката на убиства во Мексико се намали за околу половина во изминатата година, според официјалните бројки, иако безбедносните аналитичари велат дека вистинскиот пад веројатно ќе биде помал. Во исто време, повеќе од 130.000 луѓе сè уште се водат како исчезнати.

Тагови: Мексико

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер