Хонда „е“ ја имапше својата светска премиера на актуелниот франкфуртшки авто- саем. Кога ќе се појави во продажба, купувачите на овој модел ќе можат да одберат помеѓу две опции за моторот.
Основниот модел ќе користи електромотор од 136 коњски сили, додека помоќната изведба ќе биде опремена со електричен агрегат од 156 коњски сили. Од Хонда се пофалија дека помоќниот модел убрзува од 0 до 100 км/ч за околу 8 секунди.
Батериите се со капацитет од 35,5 киловат часови а јапонскиот произведувач тврди дека се меѓу најкомпактните во класата. Според фабричките податоци, Хонда „е“ со едно полнење на батеријата може да помине до 220 км, па како што велат од компанијата, овој автомобил е совршен за возење во урбани средини.
Благодарение на можноста за брзо полнење, за само 30 минути ќе можете да ја наполните батеријата до 80%.
Хонда „е“ има погон на задните тркала и мали камери наместо ретровизори кои се вградени во вратите.
Ентериерот е идентичен како кај прототипот од овој модел а е впечатлив по тоа што е потполно модерен со дигитална командна табла составена од два 12,3 инчни екрани осетливи на допир.
Од Хонда соопштуваат дека веќе е отворена книга за нарачки за приоритетни купувачи на одбрани пазари, како што се Британија, Германија, Франција и Норвешка а цената на автомобилот се уште не е објавена.