Македонија

Дарија, Тео, Бисера и Марин се единствените деца во село Маврово – учат заедно, иако се различни одделенија

Изборите во четирите општини во Западна Македонија денеска ќе успеат, но проблемот со иселувањето од овој регион на Македонија останува...

Во срцето на село Маврово, во подножјето на Бистра, еден училишен ден изгледа сосема поинаку... Во подрачното основно училиште „Денче Дејаноски“, прва пристигнува единствената вработена, наставничката Маја Манојловска. Во студените зимски утра, таа најпрво го загрева просторот и ја подготвува училницата за почетокот на наставата. Кратко потоа пристигнуваат и учениците. Тео, Дарија, Бисера и Марин се единствените деца кои учат во ова подрачно училиште и го чуваат од заборав. Прво, второ и четврто одделение, сите во иста училница. Првачето Дарија е последната ученичка која оваа учебна година им се придружи на останатите три деца. Во малата, но топла и пријатна училница, се кријат нивните големи соништа.

Ваквиот начин на работа, вели наставничката Маја, не е секојдневен, но е посебен и интересен. Предностите се бројни — можноста наставникот целосно да се посвети на секое дете токму затоа што учениците се малку, мирната средина, а понекогаш кога условите дозволуваат и наставата во природа на чистиот мавровски воздух..

-Мојот работен ден започнува не својствено можеби за оние мои колеги кои работат во градските средини, но имам колеги во останатите подрачни училишта кои ја работат истата работа како и јас..На сам почеток создавам пријатна атмосфера тука, а потоа започнуваме и со наставната програма која е тековна за тој ден, децата се во комбинирана паралелка..Комбинираната настава бара свој труд, свое внимание, посветување на секое дете посебно и иако се 4 ученици тие се вклопуваат еден кон друг.

Сепак, предизвик останува малата социјализација. Таа се надоместува преку заеднички дружења и организирани работилници со учениците од централното училиште во Маврови Анови, каде што децата го продолжуваат своето образование по завршувањето на петто одделение во подрачното училиште.

Ова училиште постои уште од 50-тите години на минатиот век, а до пред неколку години имало само еден ученик. Денес, учениците со гордост раскажуваат дека токму овде учеле и нивните родители, баби и дедовци. За наставничката Маја, тоа е и најголемата радост — што, и покрај сè, училиштето сè уште опстојува.

-На самиот почеток кога јас започнав со моето работно искуство, мојот ученик беше само Бисера, значи работевме само јас и таа, но потоа благодарение на сите оние родители кои одлучија своите деца да останат овде моментално се 4 ученици, а имаме најава дека следната година ни доаѓа уште еден ученик, што за нас тоа е навистина голема радост и ми е навистина мило што родителите одлучуваат нивните деца да учат во ваква средина.

Ова мало училиште во селото Маврово е само дел од пошироката слика на демографските предизвици со кои се соочува земјава. За 20 години бројот на населението во о. Маврово и Ростуша е намален за една третина..Од 8618 во 2002, според последниот попис од 2021 година бројот на населението е 5042. Учебната година во Македонија започна со 17.250 првачиња или 1.309 помалку од минатата, додека изминатите 5 години, во училишните клупи седнале над 4.000 првачиња помалку..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Жена поднесе тужба против болница во САД: „Ми ја ампутираа погрешната нога“

Жена од Охајо, која боледува од рак, поднесе тужба против Општата болница „Селби“ откако хирург наводно по грешка ѝ ја ампутирал здравата нога. Како резултат на оваа грешка, таа на крајот ги загубила двете нозе.

На 19 септември 2025 година, Шерон Џекс била примена во болницата во Мариета за ампутација на десната нога под коленото. Сепак, по процедурата, таа се разбудила и открила дека ѝ е ампутирана левата нога. Овие детали се наведени во тужбата од 32 страници до која дојде медиумот „WBNS“. Подоцна, лекарите морале да ја ампутираат и десната нога, онаа што првично била планирана за операција, со што Џекс останала без двете нозе.

„Ми ја ампутираа здравата нога“

„Таа отиде на операција, а кога се разбуди, виде дека ѝ ја отстраниле погрешната нога“, изјави нејзиниот адвокат, Бред Лејн. „Тоа е, сосема очигледно, целосно необјасниво.“

Џекс ја поднесе тужбата против хирургот, другите членови на хируршкиот тим и болницата на 15 септември. Во тужбата се наведува „целосен пропуст во почитувањето на основните безбедносни процедури“. Во соопштението за јавноста, нејзиниот адвокат нагласи дека „едноставно нема оправдување“ за она што се случило.

Тужбата содржи девет точки, вклучувајќи груба небрежност, лекарска грешка и корпоративна небрежност. Шерон Џекс бара отштета за минатите и идните медицински трошоци, болката и страдањето, душевната болка, трајниот инвалидитет и загубата на квалитетот на живот.

Хирургот ја означил правилната нога, но оперирал на погрешната?

Адвокатот Лејн тврди дека грешката настанала поради пропусти на повеќе медицински лица. Медицинската документација покажува дека, пред операцијата, хирургот правилно ја означил ногата планирана за ампутација. Сепак, бил отстранет погрешниот екстремитет. „Ознаката сè уште беше на правилната нога откако ја отстранија погрешната“, рече Лејн.

Според тужбата, медицинскиот тим спровел две безбедносни проверки, таканаречени „паузи за проверка“, пред самата процедура. Целта на овие проверки е да се потврди идентитетот на пациентот, планираната операција и точното место на интервенцијата пред да се направи првиот рез. „Сите во таа операциона сала се одговорни за таа проверка. Тоа ги вклучува лекарот, персоналот, медицинските сестри и анестезиологот. Во евиденцијата стои дека ова било направено двапати, а сепак на г-ѓа Џекс ѝ недостасува ногата што не требало воопшто да се допира“, нагласи Лејн.

Операција извршена на погрешен дел од телото се смета за една од најсериозните медицински грешки. Во здравствениот сектор, ваквите случаи се класифицираат како „настани што никогаш не смеат да се случат“. „Ова не смее да се случува во медицината. Никаде. Дури ни во ветеринарната пракса“, додаде адвокатот.

Болница: Одговорните се санкционирани

Во изјава за медиумот „WBNS“, Општата болница „Селби“ потврди дека во септември 2025 година се случил „несакан хируршки настан“. Тие наведоа дека тимот веднаш реагирал за да се погрижи за пациентот и да обезбеди поддршка за нејзиното семејство.

„Нашата внатрешна ревизија потврди дека овој настан можел да се спречи и дека не биле испочитувани утврдените процедури во операционата сала. Одговорните лица се соочија со последици и повеќе не ги извршуваат своите функции“, се вели во соопштението на болницата.

Од болницата истакнаа дека соработувале со Одделот за здравство на Охајо, кој потврдил дека хируршките протоколи на болницата се безбедни и ефективни. Тие исто така додадоа дека се спроведени корективни мерки низ целата организација за да се спречи повторување на слична ситуација.

Извор: Индекс.хр

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Голема полициска акција во Прилеп

Голема полициска операција се спроведува од рано утрово во Прилеп и околината, при што се вршат претреси и проверки на околу 30 локации, засега нема официјални информации за акцијата.

Засега е познато дека на терен се распоредени специјални единици и униформирана полиција, а акцијата ја спроведува МВР преку Бирото за јавна безедност.

Операцијата е дел од поширока истрага насочена кон сомнителна организирана криминална структура. Истрагата е поврзана со сомневања за активности поврзани со наркотици. Под лупа, наводно, се и лица од полициските структури за кои постојат сомневања за можна поврзаност со лица или активности што се предмет на истрагата.

Од МВР за повеќе детали најавија во текот на денот..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Здравје

Бесплатно советувалиште во Центар за дојка-Прашајте пред да напипате нешто

Во текот на розовиот октомври, ПЗУ Центарот за дојка нуди бесплатно советување за здравјето на дојките, наменето за сите жени и млади девојки што сакаат стручни информации и совети.

Секој петок од 13.30 до 14.30 часот, жените ќе можат да разговараат со лекарите и медицинскиот персонал за превенцијата, правилниот самопреглед, препознавањето на промените и редовните прегледи.

Сакаме на жените да им овозможиме простор за отворен разговор, каде што ќе добијат точни информации и стручен совет. Розовиот октомври има важна улога во подигнување на свесноста за ракот на дојка, но грижата за здравјето не смее да биде обврска еднаш годишно. Затоа, сега прашајте, не чекајте да напипате нешто за да побарате преглед, велат од Центар за дојка.

Советувалиштето има превентивен и едукативен карактер и не е наменето за пациентки со веќе поставена дијагноза.

За посета на советувалиштето, потребно е да се закаже термин на телефонскиот број 02 3060 840.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.