„Се колнам дека ќе ја извршувам својата должност според Уставот и законот, искрено, одговорно и совесно. Нека ми помогна Бог“, рече Кривокапиќ, давајќи заклетва пред црногорските пратеници, од кои 41 ја поддржаа неговата влада, што беше потврдено три месеци по парламентарните избори. По 30 години, Демократската партија на социјалистите на Мило Ѓукановиќ беше испратена во опозиција.
Дека на владата на Кривокапиќ и претстои тежок период, покажа тридневната дискусија во парламентот во која тој претрпе жестоки критики и од неговите политички сојузници и од противниците.
На крајот, сепак, сите членови на новото владејачко мнозинство ја поддржаа новата влада, иако повеќе од половина од нив ја критикуваа нејзината програма и состав, честопати омаловажувајќи го Здравко Кривокапиќ, додека говорот го нарекоа „семинарска работа“.
Претставниците на просрпскиот демократски фронт (ДФ), чија коалициска листа ја водеше премиерот Здравко Кривокапиќ, но кои веднаш по почетокот на преговорите за формирање на нова извршна власт изјавија дека лидерите на ДФ не можат да и се приклучат на неговата влада, беа во водство.
Претставниците на опозициската Демократска партија на социјалистите за време на дебатата тврделе дека единствената цел на новата влада е „србизација на Црна Гора“, истовремено критикувајќи го Кривокапиќ за бакнување раце на свештениците на СПЦ за време на изборната кампања.
Самиот Кривокапиќ ја нарече својата влада експертска и цврсто остана на почетната позиција дека нема да има политичари на министерските места.
Од политичарите, во владата влезе само Дритан Абазовиќ, водачот на Обединетата реформска акција, кој е единствениот вицепремиер задолжен за безбедносните и надворешно-политичките сектори и е законски координатор на разузнавачките служби.
Според предупредувањето на партнерите во НАТО амбасадите, тоа место не може да припаѓа на некој од просрпскиот блок.
Абазовиќ во парламентарната дебата рече дека новата влада се соочува со два големи предизвици - тешката состојба со епидемијата на коронавирус во Црна Гора и тешката финансиска состојба што ја наследиле од претходната влада.
Тој исто така најави дека новата влада ќе биде меѓу првите што ќе го испрати законот за потекло на имотот во собраниска процедура, додека, како што рече, законот за лустрација се уште не е подготвен, но се работи на него.
Местото на министер за одбрана и беше доделено на Оливера Ињац, што беше под притисок на западните амбасади во потрага по лице лојално на европскиот и евроатлантскиот пат на Црна Гора.
За време на дискусијата во парламентот, пратениците на ДФ ја обвинија министерката Ињац дека е блиска до ДПС на Ѓукановиќ.
Здравко Кривокапиќ го обедини Министерството за образование, наука, спорт и култура во еден оддел со цел рационализација, а покрај контроверзната одлука за црногорската јавност, на чело на новото министерство ја постави спорната професорка на Филозофскиот факултет, Весна Братиќ, која на социјалните мрежи ја подели јавноста.
Исто така, била оспорена одлуката за министер за надворешни работи, за кого е предложен Ѓорѓе Радуловиќ, кој работел во тоа министерство само девет години, а од дипломатско искуство ја има единствено позицијата на аташе во билатералниот оддел и бил заменик амбасадор на Црна Гора во Романија.
Кривокапиќ бил критикуван и за одлуката за министер за правда и малцинските права да го постави адвокатот Владимир Лепосавиќ, кој на пошироката јавност и е познат како законски застапник на СПЦ во Црна Гора и член на правниот тим на СПЦ, кој претходно работел на укинување на Законот за слобода на вероисповед.