Црна дупка, 265 пати помасивна од Сонцето, се создала со спојување на две помали - Канал 5

Живот

Црна дупка, 265 пати помасивна од Сонцето, се создала со спојување на две помали

Научниците открија грандиозен судир на две масивни црни дупки коишто спирално се вовлекле една во друга. Тоа, според многумина - за среќа, се случило далеку вон работ на нашата галаксија Млечен Пат.

Црна дупка, 265 пати помасивна од Сонцето, се создала со спојување на две помали

Овие две црни дупки - секоја со маса повеќе од 100 пати поголема од Сонцето, одамна почнале да орбитираат една околу друга и на крајот се судриле и споиле, со што се создаде уште помасивна црна дупка. Сѐ тоа - на околу 10 милијарди светлосни години од Земјата. Овој настан е најмасовното спојување на црни дупки некогаш забележано од детекторите на гравитациски бранови, па нуди нови научни сознанија за физичарите и астрономите.

- Ова се најагресивните настани што можеме да ги набљудуваме во универзумот, но кога сигналите ќе стигнат до Земјата, тие се најслабите појави што може да ги измериме... Додека овие бранови стигнат до Земјата, тие стануваат мали, рече професорот Марк Ханам, раководител на Институтот за истражување на гравитацијата на Универзитетот во Кардиф, Велс, Обединетото Кралство. - Сме виделе навестувања за ова и претходно, но ова е најекстремниот пример, нагласи научникот.

Подробностите, се вели, ќе бидат претставени денеска на првиот ден од 24-та Меѓународна конференција за општа релативност и гравитација, којашто трае до петок.

Повеќето црни дупки се создаваат кога масивните ѕвезди остануваат без нуклеарно гориво и колабираат на крајот од своето суштествување. Ова ново и неверојатно густо тело што личи на огромна дупка, наречено црна дупка го искривува факторот простор-време и со својата гравитација проголтува сѐ околу себе, па дури и светлината.

Пред да бидат изградени првите детектори за гравитациски бранови во 1990-тите, научниците можеа да ја набљудуваат Вселената само преку електромагнетно зрачење како што се видливата светлина, радиобрановите и инфрацрвеното зрачење. Опсерваториите за гравитациски бранови нудат нов поглед на универзумот, дозволувајќи им на истражувачите да видат настани што досега биле скриени од нив.

- Вообичаена работа во науката е кога ќе го погледнете универзумот на поинаков начин, да откриете работи што не сте ги очекувале и целата Ваша слика се преобразува. Детекторите што ги планираме за следните 10 до 15 години ќе можат да ги видат сите спојувања на црни дупки во универзумот, а можеби и некои изненадувања што не сме ги очекувале, рече Ханам.

Научниците откриле околу 300 спојувања на црни дупки преку гравитационите бранови што ги генерираат. Најмасовното досега познато спојување произведе црна дупка со маса околу 140 пати поголема од Сонцето. Најновото спојување произведе црна дупка до 265 пати помасивна од Сонцето.

Тагови: вселената

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

АХВ: Нештетно уништени над 27,5 тони небезбедно УХТ млеко поради зголемено присуство на афлатоксин

Инспекциските служби на Агенцијата за  храна и ветеринарство (АХВ) на граничниот премин Блаце, минатата недела спречија увоз од Република Косово на две пратки УХТ млеко, со вкупна тежина од 27 520 килограми.

АХВ: Нештетно уништени над 27,5 тони небезбедно УХТ млеко поради зголемено присуство на афлатоксин

Инспекциските служби на Агенцијата за храна и ветеринарство (АХВ) на граничниот премин Блаце, минатата недела спречија увоз од Република Косово на две пратки УХТ млеко, со вкупна тежина од 27 520 килограми, поради утврдено присуство на афлатоксин над максимално дозволените концентрации дефинирани со позитивните законски прописи.

Небезбедните количини млеко кои биле наменети за пласман во синџир маркети во земјава, минатата недела под надзор на официјален ветеринар, нештетно се уништени на депонијата Дрисла.

Мострите за лабораториско тестирање на двете небезбедни пратки УХТ млеко, земени се во рамки на Мониторинг програмата која инспекциските служби на АХВ на граничен премин ја реализираат за пратките со храна од животинко потекло кои се увезуваат во земјава.

На 17 јули годинава Агенцијата донесе и Решение за воведување на посебни безбедносни мерки при увоз на млеко, производи од млеко, како и производи кои содржат згуснато млеко и млеко во прав со кои ги засили официјалните контроли при увоз на овој тип производи од животинско потекло преку вршење на задолжителни лабораториски испитувања и проверки на усогласеноста со барањата за квалитет, со цел на домашниот пазар да се пласираат исклучиво безбедни и квалитетни производи и да се обезбеди фер конкуренција и заштита на домашните производители и потрошувачите, стои во соопштението од Агенцијата за храна и ветеринарство.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Детска работилница за најмладите и рап забава со „Жабата“ за тинејџерите во Карпош

Неделното карпошово културно лето, започна на плоштадот „Фонтана“, во Карпош 3,.

Детска работилница за најмладите и рап забава со „Жабата“ за тинејџерите во Карпош

Неделното карпошово културно лето, започна на плоштадот „Фонтана“, во Карпош 3, каде што во рамки на проектот „Нашето Маало-детска интерактивна просторна инсталација“, организирана од архитектот Ружица Ивановиќ, дечињата заедно со своите родители учествуваа во боење и цртање на претходно изработената макета од архитектката. На тој начин, на детската работилница најмладите карпошани освен што се дружеа помеѓу себе , тие и го развиваа својот креативен и уметнички потенцијал.

Во училишниот двор на ООУ „Петар Поп Арсов“, со почеток од 20:00, часот, во една пријатна, релаксирана и маалска атмосфера беше прикажан филмскиот класик од Димитрие Османли - „Мирно лето“, каде што меѓу присутните карпошани беше и претседателот на Советот на Општина Карпош, Христо Саракинов. Филмските проекции во рамки на културното лето ќе траат до 27-ми овој месец, каде што љубителите на добриот филм, заедно со своите соседи, роднини и пријатели, во предвидениот термин на истата локација, ќе можaт да уживаат во селектираните филмски остварувања од домашната македонска кинематографија.

Вечерта кулминираше со рап изведбата на „Стефан Трајковски- Жабата“, кој со своите авторски изведби ја крена публиката на нозе и направи одлична забава пред своите маалски другари, соседи и пријатели. На настапот на „Жабата“, на фонтана во Карпош 3 беше присутен и заедно со жителите на Карпош 3 се забавуваше и дружеше првиот човек на Општината, Сотир Лукровски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Бензините поскапи за 1,5 , дизелот за 3,5 денари

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши зголемување на малопродажните цени на нафтените деривати во просек за 2,62%

Бензините поскапи за 1,5 , дизелот за 3,5 денари

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши зголемување на малопродажните цени на нафтените деривати во просек за 2,62% во однос на одлуката од 17.8.2026 година.

Референтните цени на нафтените деривати на светскиот пазар во споредба со претходната пресметка бележат зголемување и тоа во просек: кај бензините за 3,795%, кај дизелот за 4,842%, кај екстра лесното масло за 3,958% и кај мазутот зголемувањето е за 6,467%.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,5340%.

Од 25.8.2026 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС - 95 93,00 (денари/литар)

Моторен бензин ЕУРОСУПЕР БС - 98 95,00 (денари/литар)

Дизел гориво ЕУРОДИЗЕЛ БС (Д-Е V) 101,50 (денари/литар)

Масло за горење Екстра лесно 1 (ЕЛ-1) 100,50 (денари/литар)

Мазут М-1 НС 45,576 (денари/килограм)

Малопродажните цени на бензините ЕУРОСУПЕР БС-95 и ЕУРОСУПЕР БС-98 се зголемуваат за 1,50 ден/лит.

Малопродажната цена на ЕУРОДИЗЕЛ (Д-Е V) се зголемува за 3,50 ден/лит.

Малопродажната цена на Екстра лесното масло за домаќинство (ЕЛ-1) се зголемува за 2,00 ден/лит.

Малопродажната цена на Мазутот М-1 НС се зголемува за 1,850 ден/кг. и сега ќе изнесува 45,576 ден/кг.

Напоменуваме дека ова се максималните цени на нафтените деривати од 00:01 часот на 25.8.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер