Се уште официјално не се открива кога спогодбата ќе биде ставена на гласање, иако се очекува тоа да се случи кон почетокот на следната недела. Ципрас, според последната математика, помалку изненадувачки, има сигурни 149 гласа – 145-те на својата Сириза, два на Независни Грци, еден на независната пратеничка Папакоста и еден на Река, кој беше исклучен од партијата.

Ова е недоволно за апсолутно мнозинство, но како што тврди самиот Ципрас, може да биде доволно Договорот да биде изгласат со просто мнозинство од гласовите на присутните во салата.

Второто и посигурно сценарио е да се повтори сликата од вчерашното гласање доверба со плус двајца пратеници на Независни Грци, но и со уште неколкумина на колебливата Река, која сепак денеска праќа сигнали дека дел од пратениците ќе застанат зад спогодбата.

Во исклучително зовриена атмосфера и со тешки обвинувања од Мицотакис, Ципрас синоќа од говорницата го извести собранието дека ја примил вербалната нота од македонска страна дека земјава ги исполнила обврските од Договорот и согласно документот, објасни зошто спогодбата е прифатлива за Атина.

-Прво, дека терминот nationality се однесува исклучиво на државјанството и не го дефинира или сугерира прашањето на националноста. И второ, дека јазикот на нашите соседи, како што е споменато во договорот и е признат на конференцијата на ОН во 1977 година, припаѓа на групата јужнословенски јазици, изјави Алексис Ципрас, премиер на Грција

- Тој што ќе гласа „за” го отвора патот за наводниот македонски идентитет и јазик за соседите, како што е предвидено со Договорот од Преспа. Кој ќе гласа за, во целост го одобрува бродоломот на земјата во изминативе четири години, големата политичка измама што ќе го одржи Ципрас на власт, вели Кирјакос Мицотакис, лидер на Нова Демократија.

Македонското МНР вчера ја испрати вербалната нота до Атина. Се работи за документ на шест страници, со кој се информира грчката страна дека се завршени сите легислативни услови и се заокружуваат обврските од Преспанскиот договор.