Прво за принципите за соработка, па потоа се останато- ова е ставот на ВМРО-ДПМНЕ и коалицијата „Вреди“ кои денеска седнаа на маса на прва постизборна средба. Во кој состав се состанаа и дали најдоа заеднички јазик по некое прашање, детали не соопштуваат од ниту една партија, но за Канал 5 велат дека ова се само почетни средби на кои ќе ги дефинираат општите позиции и текот на преговорите понатаму.
Од ВМРО-ДПМНЕ ги демантираат шепкулациите дека веќе почнала поделба на ресори и директорски места со албанската коалиција, а истото го тврди и лидерот на Демократско Движење кое е дел од „Вреди“, Изет Меџити. Тој во гостување на Канал 77 утрово пред средбата изјави дека кадровските политики ќе бидат тема на разговор во некоја следна фаза.
„Првично околу постулатите на новата влада и мислам дека тука лесно ќе се договориме бидејќи и во текот на кампањата и претходно разговаравме и промовиравме речиси исти приципи.. Во трета фаза ќе разговараме и за ресорите.. Внатре во ВЛЕН се анализира, се преговара, можеби утре задутре, бидејќи има и такви размислувања, да биде една политичка партија.“
За кадровските прашања и распредлебата на ресорите и идниот мандатар Мицкоски пред два дена во Само интервју кажа дека се уште не разговарале, но беше дециден дека очекува конструктивен дијалог со партнерите, кој ќе соодвествуваат на реалноста, а не на фантазиите.
Според неговите очекувања, до конституирањето на Собранието најдоцна до 28 мај, има можност неговата партија од 58 да порасне до 61 пратеник, со поединци од другите коалиции. Мицкоски очекува владино мнозинство од 74-75 пратеници, но најави разговори и со останатите партии за да се обезбеди двотретинско мнозинство неопходно за системски реформи.