Бугарија ја прекршува слободата на здружување со тоа што одбива регистрација на организација на етничките Македонци,утврдил Комитетот за човекови права на ОН, кој очекува Софија во рок од шест месеци да ја исправи ситуацијата и да извести кои мерки ги презела. Во документот, кој беше јавно објавен вчера, се наведува дека станува збор за невладина организација за заштита на човековите права „Толеранција“, која поднела барање за регистрација согласно законските процедури, но добила негативна одлука од бугарските судови без детално образложение и нејасни одлуки, велат од Комитетот на ОН. Комитетот ја повика Бугарија да ги преиспита домашните судски одлуки со кои е одбиено регистрирањето и да му обезбеди компензација на подносителот на жалбата, кој е и основач на здружението...

– Постоењето на здруженија кои мирно промовираат идеи за толеранција и коегзистенција на различни етнички групи мора да се заштити, дури и ако нивните ставови не се споделени од властите или од мнозинството на населението – изјавила Ивон Дондерс, членка на Комитетот за човекови права на ОН.

Стојко Стојков од ОМО „Илинден“ – Пирин за Канал 5 ваквата одлука ја оцени како многу значајна во борбата за нивните права и докажувањето на системска дискриминација и негација на тамошните Македонци од бугарските власти.

- Тоа за нас е успех голем, симболичен, покажува дека нашата борба е праведна и дека државата навистина треба да запре да ги нарушува правата на своите граѓани со македонска самосвест. Не мислам дека ќе ја предизвика потребната промена, иако со сигурност е голем неуспех, морален удар за бугарската политика, бидејќи веќе не би можел никој сериозно да зборува дека не ги нарушува систематски правата на Македонците во Бугарија, бидејќи тоа е организирано на сите нивоа на државата за дискриминација и асимилација на Македонците во Бугарија, изјави Стојков за Канал 5.

Премиерот Мицкоски не очекува одлуката на Комитетот на ОН суштински да ја промени политиката на официјална Софија без силен притисок од Брисел и поголемите членки на ЕУм иако ваквите одлуки, како што рече, ја зајакнуваат позицијата на земјава на меѓународната сцена.

- И секој оној што мисли и верува во приказните дека ако се измени преамбулата на Уставот и дека тука завршуваат нашите предизвици и маки се лаже. Или не ја разбира политиката или свесно претставува меко ткиво на македонскиот идентитет и одработува за туѓите интереси. Јас мислам дека за жал се уште на политичката сцена имаме такви политичари којшто со своите мекоткивни политики ги нарушуваат позициите којшто оваа Влада макотрпно и жилаво ги гради, но очекувам веќе после следните парламентрани избори таа политичка партија да се маргинализираат и конечно да исчезнат од македонската политичка сцена, изјави Мицкоски.

Иако од Советот на Европа и е наложено на Бугарија да ги признае македонските здруженија таму и да прекине со рутинското одбивање на нивна регистрација, официјална Софија се уште ги игнорира 16-те пресуди на Судот во Стразбур за правото на здружување на Македонците во Бугарија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.