Операциите за евакуација од Авганистан ќе продолжат и покрај варварските напади на влезот на аеродромот во Кабул, изјави британскиот премиер Борис Џонсон.
"Ќе продолжиме со операцијата. И сега стигнуваме до крајот, до самиот крај", рече Џонсон по владиниот кризен состанок посветен на денешните напади.
„Ние сме во можност да ја продолжиме програмата како што ја работевме досега, во согласност со временската рамка што ја имаме и тоа е она што ќе го направиме“, додаде тој.
Најмалку две експлозии го погодија просторот на влезот на аеродромот во Кабул, предизвикувајќи крвопролевање меѓу луѓето кои се надеваа дека ќе успеат да излезат од Авганистан.
Џонсон рече дека војската со месеци се подготвувала за евакуација и дека била свесна за безбедносните закани.
Тој им оддаде почит на Авганистанците и припадниците на американската војска кои ги загубија животите во нападот. „Изразуваме сочувство до САД и народот на Авганистан“, рече тој.
Пентагон претходно објави дека има Американци меѓу жртвите, но се уште не е познато колку, но АП објави дека загинале најмалку 12 американски војници.
Холандија извести дека го извела последниот лет за евакуација од Кабул во согласност со барањето на американските сили да го напуштат аеродромот во главниот град на Авганистан.
„Хаг жали што не успеа да ги евакуира сите холандски државјани и Авганистанци кои и помогнаа на Холандија за време на мисијата во Авганистан“, напиша на Твитер министерката за надворешни работи Сигрид Кааг.
„Нашето заминување ќе има сериозни последици за нив.“
Американската војска им наредила на Холанѓаните да ги прекинат операциите на аеродромот во Кабул пред американските војници да се повлечат на 31 август, изјави холандскиот премиер Марк Руте на прес -конференција во Хаг претходно во текот на денот.
Германија објави дека ја завршиле евакуацијата на своите војници и дипломатскиот персонал од Авганистан, објави денеска министерката за одбрана Анегрет Крамп-Каренбауер.
„Сите војници, вработени во Министерството за надворешни работи и федералната полиција, кои, ја завршија оваа мисија на безбеден начин, беа евакуирани со авион од Кабул“, изјави Крамп-Каренбауер за новинарите.
Мисијата за евакуација сега е завршена, напишала таа, додавајќи дека и е „олеснето што нашите војници кои учествуваа во оваа опасна операција безбедно го напуштија авганистанскиот воздушен простор“.
Германија евакуирала 5.347 луѓе од најмалку 45 земји од 16 август, рече министерката.
„Нападите на кои бевме сведоци попладнево јасно покажуваат дека продолжувањето на операцијата во Кабул не е можна“, рече Крамп-Каренбауер.
Претходно, германската канцеларка Ангела Меркел ги осуди нападите во Кабул, велејќи дека денешните настани покажуваат „дека ризикот е огромен и дека станува збор за многу, многу напната ситуација во која луѓето се повлекуваат од земјата“.
„Се уште не ги знаеме сите детали, но терористите ги таргетираа луѓето што чекаа пред аеродромот со надеж дека ќе ја напуштат земјата“, нагласи Меркел.
Норвешка повеќе не може да помогне во евакуацијата на преостанатите граѓани од авганистанската престолнина, изјави денеска норвешката министерка за надворешни работи Ина Ериксен Сореиде.
„Вратите на аеродромот сега се затворени и повеќе не е можно да се доведат луѓе таму“, рече таа за норвешката ТВ2.
Другите западни држави, исто така, се ближат кон крајот на евакуацијата на нивните граѓани од Авганистан, барајќи да ја завршат мисијата пред истекот на рокот од 31 август, што им го даде новата талибанска влада.
Американскиот претседател Џо Бајден изјави дека американските војници, клучен гарант на аеродромот Хамид Карзаи во Кабул, ќе ја завршат мисијата и сите ќе го напуштат Авганистан до 31 август.
Американски извори велат дека планот не се променил ниту по денешните напади.