Според планот што го објави Џонсон во февруари, повеќето епидемиолошки ограничувања требаше да бидат укинати на 21 јуни, а дотогаш пабовите, рестораните, ноќните клубови и другите угостителски објекти требаше да бидат целосно отворени.
Таа долгоочекувана одлука е одложена за 19 јули.
„Мислам дека е разумно да почекаме уште малку“, рече Џонсон на прес-конференција. „Како што сега стојат работите и се засноваат на доказите што ги имам во моментов, убеден сум дека нема да ни требаат повеќе од четири недели“, додаде тој.
Соопштението на Џонсон предизвика незадоволство од демонстрантите против заклучувањето, кои се собраа недалеку од резиденцијата на премиерот во Лондон.
Дополнителното време ќе се искористи за забрзување на британската програма за вакцинација, која е веќе една од најуспешните во светот. Препорачаниот временски интервал помеѓу приемот на првата и втората доза на вакцина, за оние над 40 години, ќе се скрати од 12 на осум недели.
Ситуацијата ќе биде разгледана на 28 јуни, што може да доведе повторното отворање да се одложи, иако портпаролот на Џонсон изјави дека тоа не е веројатно.
Во последниве недели, се забележува брзо зголемување на случаите предизвикани од индискиот сој на ковид-19. Здравствените власти веруваат дека се пренесува 60 проценти побрзо од претходните соеви, а научниците предупредија дека може да предизвика трет бран на инфекција.
Велика Британија денеска забележала 7.742 нови случаи и три смртни случаи. Џонсон рече дека бројот на заразени расте за околу 64 проценти неделно и дека расте бројот на хоспитализирани на интензивна нега.