Во дебатата со европратениците за случајот со Алексеј Навални, трупањето на руските воени сили на украинските граници и операцијата на руските тајни служби во Чешка, Борел рече „мора да се подготвиме за долг и тежок период во нашите односи со Русија“ .

„Гледам загрижувачки тренд кај руските власти кои се чини дека намерно го продлабочуваат конфликтот со Западот, со нас“, рече високиот претставник на Европската унија за надворешна и безбедносна политика.

"Нашите односи со Русија продолжуваат да се влошуваат и сега се на најниско ниво. За жал, не можеме да исклучиме дека овој негативен тренд нема да продолжи и да достигне уште поопасно ниво", рече Борел во дебатата на пленарната сесија на Европскиот Парламентот.

Тој исто така рече дека сепак е потребно да се најде модус вивенди во односите со Русија за да се избегне „трајна конфронтација со сосед кој се чини дека решил да дејствува како ривал“.

„Русија мора да престане со своите провокации“, рече Борел и додаде дека Русија мора да престане да се преправа дека е „неутрален посредник“ во Украина.

Русија минатиот месец распореди десетици илјади војници во близина на границата со Украина и организира голема воена вежба на Крим.

„Досега Русија не покажа волја за ставање крај на конфликтот“, рече Борел.

Борел, исто така, повика на ослободување на најистакнатиот критичар на Кремљ, Алексеј Навални, кој е осуден на три и пол години затвор за кршење на условна казна, поточно за нејавување пред суд.

Тој рече дека е „прилично песимист“ во врска со ситуацијата во Русија и предвидува дека ќе има нови „ограничувања на основните слободи“ пред парламентарните избори во септември.

Чешкиот премиер Андреј Бабиш овој месец објави дека руската разузнувачка служба ГРУ е одговорна за експлозијата на складиштето за оружје во Чешка во 2014 година, при што загинаа двајца чешки државјани. Нападот, како што објави Прага, го извршиле двајца оперативци одговорни за труењето на поранешниот руски агент Сергеј Скрипал и неговата ќерка Јулија, во Англија во 2018 година. Прага одговори со протерување на неколку вработени во руската амбасада, додека Кремљ, кој негира одговорност за нападот, одговори со иста мерка.

Борел рече дека станува збор за „криминални дејствија“ и изјави дека ова исто така покажува дека односите меѓу Русија и Европската унија „продолжуваат да се влошуваат“.

„Ние нема да прифатиме тактика на заплашување и мора да одговориме на нив кога ќе се случат“, рече Борел.

Претставниците на повеќето политички групи во Европскиот парламент ги осудија постапките на руските власти на дебатата и ги поддржаа Прага и Киев.