Климата за која сонувавме пред десет години, како во стан, така и во автомобилот, сега е земена здраво за готово. Тоа е скоро стандардна опрема на која не обрнуваме внимание се додека не се расипе.
Во Бугати го сфаќаат системот за климатизација многу сериозно. На крајот на краиштата, тие совршено мора да ги задоволат дури и најпребирливите клиенти кои дале над милион евра за автомобилот, а климатизацијата мора да работи беспрекорно на 400 км на час, кога срцето ќе чука неподносливо додека рацете на возачот се потат на воланот.
За сето ова се грижи Џули Лемке, термодинамичар, која исто така има и докторат за климатизација на автомобили. Таа е во автомобилската индустрија од 2013 година, а во последните четири години работи во Бугати.
На почетокот, Лемке потенцира дека Бугати мора да ги исполни сите желби. Европејците сакаат да возат на 21-22 степени Целзиусови, а Американците за еден степен постудено, и никој не сака да ја слуша бучавата од вентилацијата. Климатизацијата е единствениот задолжителен дел од автомобил што мора да остане невидлив и нечуен.
Друг важен фактор е брзината. Климатизацијата во автомобилите на Бугати е променлива со брзината, а до 250 км на час го зема надворешниот воздух на класичен начин како и секој автомобил, низ отворите под шофершајбната. Исто така, постојат и отежнувачки околности како што е шофершајбната, која е под агол од 21,5 степени со површина од 1,23 квадратни метри, а тоа овозможува кабината да се загрева од сонцето. Ако е избрана опцијата Sky View, задачата на клима уредот е уште потешка.
Поради сето тоа, климатизацијата на Бугати е исклучително моќна. Верувале или не, има моќ за ладење од дури 10 kW, што е доволно за ефикасно да се олади трисобен стан од 80 квадратни метри.