Свет

Блумберг: Украина можеби уште денеска ќе потпише договор за минерали со САД

Украина е подготвена да потпише договор за природни ресурси со Соединетите Американски Држави, што можеби ќе се случи уште во текот на денешниот ден, изјавиле извори за Блумберг.

Нацрт-договорот, кој предвидува создавање заеднички фонд за управување со украинските инвестициски проекти, е финализиран и би можел да биде потпишан уште денеска, а украинската министерка за економија Јулија Свириденко е на пат кон Вашингтон за потпишување, рекле изворите.

Во рамките на договорот, САД и Украина ќе настојуваат да создадат услови за „зголемување на инвестициите во рударството, енергетиката и сродните технологии во Украина“, според нацрт-документот во кој Блумберг имал увид.

Вашингтон исто така се согласи со договорот да не ги попречува напорите на Украина за приклучување кон Европската унија, што долго се сметаше за црвена линија за Киев во преговорите.

Истовремено, САД се согласија дека само идната воена помош што можеби ќе ја пружат на Украина по потпишувањето на договорот ќе се смета како придонес на Вашингтон во овој фонд, се наведува во документот.

Украинскиот премиер Денис Шмихал во неделата изјави дека Вашингтон се откажал од инсистирањето во договорот да бидат вклучени десетици милијарди долари помош испорачана од почетокот на руската инвазија.

Договорот „го зајакнува стратешкото партнерство меѓу страните за долгорочна реконструкција и модернизација на Украина, како одговор на големите разурнувања предизвикани од руската инвазија“, се наведува во документот.

Два други технички договори кои ќе одредат како ќе функционира заедничкиот фонд допрва треба да бидат финализирани, рекол изворот.

Американски и украински официјални лица потпишаа меморандум за намери претходно во април и продолжија да ги разработуваат техничките детали на договорот, а последниот обид да се постигне договор пропадна по расправата меѓу украинскиот претседател Володимир Зеленски и претседателот на САД Доналд Трамп и потпретседателот Џеј Ди Венс во Овалната соба.

Тагови: минерали

Свет

Еврокомисијата најави такса од две евра за секоја мала поштенска пратка што влегува во ЕУ

Еврокомесарот за трговија и економска Марош Шефчович најави воведување на такса во висина од две евра за сите мали пакети со нарачани производи во вредност помала од 150 евра што пристигнуваат во ЕУ преку пошта, а кои се ослободени од плаќање царина.

- Станува збор за две евра по пакет нарачани преку онлајн платформите, изјави Шефчович пред Европскиот парламент во Брисел.

Според податоците, во ЕУ минатата година пристигнале околу 4,6 милијарди пакети со купени производи онлајн, што во просек претставува влез на 145 пратки во секунда. Речиси 91 отсто од овие пратки во ЕУ пристигнале од Кина.

- Средствата од ова такса од две евра би служеле за финансирање на царинските управи, кои во моментов се преоптоварени, рече Шефчович.

Еврокомисијата во февруари најави дека ќе ја преиспита одлуката од 2010 година за ослободувањето од царински давачки на ваквите пратки, поради ризикот со нив во ЕУ да се увезат „опасни и еколошки штетни производи“.

Дополнително, според ЕК, ваквата се пораспространета онлајн трговија со евтини производи од странство, пред се од Кина, доведува до нарушување на принципите на конкурентност, бидејќи овие производители не подлежат на обврските на ЕУ што им се наметнати на европските трговци и мали и средни претпријатија. /МИА

Тагови: ЕУ такса пратка

Свет

Руте: Ако Путин повторно нападне одговорот ќе биде разорен

Генералниот секретар на НАТО, Марк Руте денеска изјави дека Русија произведува четирипати повеќе муниција од земјите-членки на НАТО.

- Отворените извори укажуваат дека во наредните години Русите може да се обидат да направат нешто глупаво. Мора да се погрижиме доколку (рускиот претседател Владимир) Путин нападне сега или во блиска иднина, одговорот да биде разорен, истакна Руте одговарајќи на прашање за распоредувањето на руски воени сили на финската граница.

Руте наведе дека по завршувањето на војната во Украина важно е Путин повторно да не направи слично.

- Подобрувањето на нашите одбранбени способности е нашата главна мисија. Сојузниците мора да ги зголемат трошоците за одбрана, ова е клучна задача пред Самитот на Алијансата во Хаг следниот месец, посочи Руте. /МИА

Тагови: Владимир Путин Марк Руте НАТО

Македонија

Тошковски: Реновирани спортските капацитети на полициското одморалиште во Пониква

Работиме на целосно унапредување на сите полициски капацитети, вели Тошковски.

Министерот за внатрешни работи Панче Тошковски заедно со министерот за спорт Борко Ристовски, денеска во одморалиштето на МВР во Пониква ги пуштија во употреба реновираните спортски капацитети наменети за вежбовни активности на полициските службеници.

„Со министерството за спорт неодамна потпишавме Меморандум за соработка со кој ќе ги надградиме, реновираме и унапредиме поголемиот дел од спортските капацитети на министерството за внатрешни работи. Вложувањето во капацитетите на кои се обучуваат полициските службеници е влог во стабилноста и безбедноста на државата.

Во рок од месец дена беше поставена основа за фудбалско игралиште и фитнес зона со монтирање на сите реквизити. Игралиштата за фудбал, кошарка и одбојка се опремија со полипропиленски подови, обележени и со нови реквизити. Истите добија и трибини од по 2 реда за следење на натпреварите. Покажуваме дека преку добро планирање и соработка помеѓу институциите, јасна визија и одлучност, може да се изградат услови кои ги задоволуваат современите полициски потреби.“, истакна министерот Тошковски.

Во меѓувреме преку оваа соработка на двете министерства се работи на реновирање на спортските капацитети на Центарот за обука на МВР во Идризово каде се создаваат и унапредуваат сите полициски човечки капацитети.