Во првото големо интервју, таа вели дека тоа не била туѓа одлука или знак на контрола, туку дел од уметнички проект што самата го осмислила.

„Јас ја живеам својата уметност“, изјави 31-годишната австралиска архитектка за Vanity Fair. Таа ги толкува своите речиси голи појавувања - од црвениот тепих на Греми наградите до низа провокативни комбинации во европските градови - како повеќегодишно истражување на изложеноста, сексуалноста и контролата врз сопственото тело. Ги отфрла тврдењата дека била кукла во рацете на својот сопруг. „Не би направила нешто што не сакам да го правам“, истакнува таа, нагласувајќи дека модните концепти биле соработка.

Студирала архитектура

Ценсори пораснала во Мелбурн во строго грчко православно семејство. Студирала архитектура и дипломирала на Универзитетот во Мелбурн, каде што се интересирала за одржливо домување и социјалните аспекти на просторот. Во 2020 година, Канје ја контактирал откако ја видел нејзината работа на Инстаграм и ѝ понудил работа во Лос Анџелес.

Во Yeezy, таа работела на архитектонски проекти, вклучувајќи радикално реновирање на куќа во Малибу што критичарите го сметале за архитектонски неуспех. Таа го опишува чинот како истражување на уништувањето и просторот. „Каква сакате да биде куќата?“ е прашање кое, вели таа, го обликува нејзиниот професионален интерес.

Соработката со Канје набрзо се претворила во врска

Нивната соработка набрзо се претворила во врска. „Се омажив затоа што го сакам, а не поради платформата“, тврди таа, свесна дека нејзината слава е неразделно поврзана со неговото име. Сепак, токму оваа врска покрена сомнежи за односот на моќ во бракот, особено по инцидентот во Венеција и бројните шпекулации за нејзиното молчење.

Контроверзноста дополнително ескалираше по објавите на Канје во кои тој се нарече себеси нацист, изнесе антисемитски тврдења и тврдеше дека има „моќ“ над својата сопруга. Во истиот период, против него беа покренати тужби од поранешни соработници за наводна злоупотреба, сексуално вознемирување и несоодветно однесување. Раперот ги отфрли обвинувањата и се обидува да ги оспори на суд.

„Денес функционирам постабилно“

Ценсори јасно се дистанцира од антисемитизмот. „Страшно е што ваквите идеи стануваат нормализирани“, вели Бјанка. Таа признава дека во времето на неговите јавни испади, таа била фокусирана на приватна криза, а не на јавна перцепција. Таа го опишува тој период како емоционално исцрпувачки, споредувајќи го со обид да се оживее некого долго време.

Во меѓувреме, двајцата побарале стручна помош. Канје започнал третман по манична епизода, додека Ценсори била подложена на рехабилитација за емоционална нестабилност и самолекување со бензодиазепини. „Бев емоционално дисрегулирана. Денес функционирам постабилно“, вели таа.

Во Сеул, таа го претставила перформансот „BIO POP“, првиот дел од проектот што планира да го развива со години. Пет од нејзините двојници се појавуваат во перформансот, обликувани како парчиња мебел, со кои таа сака да покаже како приватна личност лесно може да се трансформира во нешто што јавноста го консумира. Делото го поставува прашањето кој всушност го контролира нечиј имиџ и каде е границата помеѓу уметноста и експлоатацијата. Пораката е јасна - таа не сака да биде гледана како објект, туку како личност зад идеја.

„Работите не се толку драматични“

Во приватниот живот, тврди таа, работите се помалку драматични отколку што сугерираат медиумите. Тие поминуваат време дома, готват, гледаат филмови и играат видео игри. Размислуваат за деца, но и за законите што би им овозможиле поголема заштита на приватноста, особено во контекст на изложеноста на малолетници на социјалните мрежи - тема со која планираат да се занимаваат во идните дела.

Неколку недели по нејзиниот настап, се појави информација дека Канје планира јавно извинување до еврејската заедница и објаснување за неговата манична епизода и дијагнозата за биполарно растројство. Дали тоа ќе го промени јавниот наратив останува отворено прашање.

На прашањето дали уметноста може да се одвои од уметникот, Ценсори вели дека во нивниот случај тоа не е можно. Нејзиниот јавен имиџ, бракот и уметничкото дело се дел од истата концептуална рамка. По години молчење, таа вели дека сега проговорила затоа што конечно сака нејзината работа да се дискутира надвор од контекстот на исклучиво брачни контроверзии - како автономен уметнички проект.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.