Во пикот на кризата Владата донесе и имплементираше околу 110 мерки дефинирани во шест пакети. Заради фактот што животниот стандард на граѓаните ни беше најважен мерките ги насочивме за да ја зачуваме нивната куповна моќ во екстремни услови и на тој начин да обезбедиме олеснето задоволување на основните потреби, потсети денеска вицепремиерот за економски прашања Фатмир Битиќи.

-Овие мерки имаа позитивни ефекти и кон стопанството затоа што одржувајќи ја побарувачката на пазарот се спречуваше домино ефектот на затворање на бизниси и губење на работни места, изјави Битиќи пред почетокот на Економскиот форум „Од криза до решенија: Станавме ли поотпорна економија денес?“ во организација на Фајнанс тинк на кој стана збор за можностите за справување со кризи во иднина, плановите за претстојните мерки и потребата како да станеме поотпорна економија.

Нагласи дека меѓународните финансиски институции укажаа дека доколку не би биле мерките би биле изгубени 80 илјади работни места во државава.

-Реагиравме и во делот на поддршка на ликвидноста за компаниите успешно да ги исполнуваат своите краткорочни обврски како што се исплата на плати на вработени дури и во ситуации кога дел од нив се соочуваа со нарушени приходи, рече Битиќи.

Како претставник на Владата, додаде, на форумот има што да кажам и кои се нашите визии и конкретни системски мерки кои ќе ја зголемат адаптивноста и отпорноста на економијата во иднина.

-Мораме да ја избегнуваме економската пракса на создавање на зависности. Воспоставување на економска меѓузависност во регионот и забрзано интегрирање кон ЕУ е патот кој води кон просперитет, раст и развој. Токму кризата ја оправда и ја нагласи потребата од усвојување на Националната развојна стратегија која ќе претставува визија за развојот на нашата држава и општество во претстојните две декади. Преку приоритизација на стратешките развојни области и поставувајќи механизам за соодветно искористување на ресурсите со кои располагаме како држава, стратегијата ќе овозможи флексибилност и отпорност на севкупното општество кон надворешни економски шокови, потенцира Битиќи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.