Полицијата го извлекла од авионот во Рим пред летот за Тел Авив, го фрлиле на земја и го претепале, а потоа без медицинска помош го оставиле да чека со часови без храна и вода.

Омеонга игра за израелскиот второлигаш Бнеи Сахнин и отпатувал за да се приклучи на тимот. Но, поради наводните проблеми со неговите документи, тој бил насилно извлечен од авионот, а неговата приказна потсетува на оние што често им се случуваа на американските црнци во контакт со локалната полиција.

Овој 28-годишен играч од средниот ред го опиша целиот настан на својот Инстаграм профил, заедно со видео од инцидентот и додаде дека еден од полицајците дури и го пријавил за наводните повреди што му ги нанел при апсењето.

„На 25 декември бев жртва на полициска бруталност. За време на летот меѓу Рим и Тел Авив, откако се качив во авионот и седнав на моето место, стјуардот ми пријде поради наводен проблем со моите документи и ме замоли да го напуштам авион. Убеден во исправноста на моите документи, мирно прашав што е проблемот.

Беше повикана полиција, ми ставија лисици и насилно ме извадија од авионот. Надвор од авионот, далеку од очите на сведоците, полицајците насилно ме фрлија на земја и ме претепаа, а еден од нив со коленото ми ја притисна главата.

Ме одведоа во полициска кола со лисици, како да сум криминалец. Пристигна и брза помош, но бев во шок и не можев да им одговорам на болничарите. Наскоро слушнав преку полициското радио: „Одби лекарска помош, сѐ е во ред“. Тоа беше сосема погрешно, побарав да ме однесат во итната медицинска помош бидејќи се плашев што ќе ми направи полицијата.

Потоа ме сместија во сива соба, без храна и вода и ме оставија во состојба на целосно понижување неколку часа. Откако бев пуштен, дознав дека полицаецот поднел пријава против мене поради повреди што наводно ги добил при апсењето иако имав лисици. Понатаму, до ден денес не сум добил оправдување за моето апсење.

Како човечко суштество и како татко не можам да толерирам каква било форма на дискриминација. Ова апсење е само видливиот врв на ледениот брег. Многу луѓе кои личат на мене не можат да најдат работа, домување, не можат да го играат спортот што го сакаат само затоа што се црнци.

Мора да бидеме обединети и да го кренеме гласот за да ги едуцираме оние околу нас - нашите колеги, соседи и пријатели - за овој проблем што го труе нашето општество и го кочи нашиот напредок. Мир“, напиша револтираниот фудбалер.

View this post on Instagram

A post shared by Omgs (@stephane.omeonga)

Омеонга кариерата ја започна во Андерлехт, потоа играше за италијански Авелино, Џенова и Пескара, шкотскиот Хибернијан и Ливингстон, белгискиот Серкл Бриж, а од 2023 година е во Бнеи Сахнин. Тој забележал 22 настапи во Серија А во Џенова.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.