Пет дена по испратените прашања од Канал 5 и бројните обиди за директен контакт со претставништвата на Бехтел и Енка, ниту од конзорциумот нема одговор за клучните дилеми за изградба на автопатите од Коридорите 8 и 10д... Освен за општите елементи околу почетокот на изградбата, и прашањето дали треба да се декласифицира тајниот договор кој отвори сомнежи во јавноста, побаравме појаснување дали е точно дека деновиве ќе добијат 53 милиони евра од буџетот на земјава по основ на пенали.
Дека ќе има енормни трансакции за неизменетиот закон за продолжување на работната недела на 60 часа, но и дополнителни авансни трошоци, тврди и денеска лидерот на ВМРО-ДПМНЕ Христијан Мицкоски. Вели дека од договорните обврски пред три дена биле исплатени само две ставки од 117 милиони евра, но сумата до следната недела според него ќе порасне над 200 милиони евра.
„Од информации со кои располагаме има натегање помеѓу владата и фирмата изведувач околу банкарската гаранција кога ќе се договорат да бидат исплатени дополнителни 50 милиони евра по основ на авансно плаќање предвидено во тој договор. Таа бројка за недела дена ќе биде огромна, повеќе од 220—230 милиони евра, а се уште од проектот нема ни шајка некој заковано.
Дека се префрлени првите пари од Министерството за транспорт и врски до ЈПДП соопштија и од претпријатието од каде велат дека овие средства се наменети за мобилизација, екипирање со механизација, воспоставување кампови, лабораторија и други работи од страна на изведувачот пред да се започне со градежни активности на четирите делници.. Министерот за транспорт и врски Бочварски во интервју за МИА изјави дека нема да се скрие ниту една исплата, а законските измени се потребни само поради побрза реализација на проектот, сепак без конкретен одговор дали давачките ќе се зголемат како што тврди ВМРО-ДПМНЕ.
„Тоа не е тајна и не е нешто што се крие за да се создава некаква нервоза во јавноста бидејќи и тоа може да се провери. Кон ЈПДП се исплатени средства од 117 милиони евра или во износ од 7,254 милијади денари. Оттаму, проектното одделение коешто е формирано во ЈПДП работи во директен контакт и комуникација со компанијата „Бехтел“. Не сметам дека треба да нагаѓаме колку ќе чини проектот после четири, пет или шест години во зависност од тоа по која законска регулатива ќе работиме.
Во однос на договорот со Бехтел и Енка, пред неколку дена со став се огласи и Амбасадата на САД, која иако кажа дека поддржуваат американски инвестиции во земјава, потенцираа дека американската Влада не презема никаква улога во договорот за автопатите.. Со став за порталот МКД се огласиле и од делегацијата на ЕУ... велат дека внимателно ги следат сите случувања, а потсетуваат и дека треба да се почитуваат обврските од Спогодбата за асоцијација и стабилизација, како и усогласувањето со правото на унијата во процесот на пристапни преговори...