Свет

Азилант од Еритреја нападнал девојчиња со турско потекло во Германија, едното починало

Нема индиции дека зад вчерашниот напад на две девојчиња во јужниот германски град Илеркирхберг, при кој загинала една од жртвите, стои политички или верски мотив.

„Овој настан не смее под никакви околности да биде причина за ширење омраза. Ова злосторство мора целосно да се истражи, а сторителот да биде изведен пред лицето на правдата и казнет“, изјавил министерот за внатрешни работи Томас Штробл за време на посетата на местото на злосторството во Илеркирхберг, во сојузната држава Баден-Виртемберг.

Тој рече дека можниот мотив за нападот во моментов е под истрага. „Во моментов немаме индикации дека мотивот за нападот би можел да биде од политичка или религиозна природа“, рече Штробл.

Азилант од Еритреја од непозната причина вчера со нож нападнал две девојчиња на возраст од 13 и 14 години, кои биле на пат кон училиште. Како последица на нападот, постарото девојче подоцна починало во болница, а помладото се уште е во тешка состојба.

Нападот ја вознемири турската заедница на која ѝ припаѓале девојчињата. Од полицијата велат дека 27-годишниот напаѓач, кој живее во блиско прифатилиште за бегалци, досега немал судири со законот.

Моментално е во болница поради повреди со нож, најверојатно самонанесени. Тој во текот на денот бил изведен пред истражен судија.

Со оглед на тоа дека жртвите се со турско потекло, местото на злосторството го посетил и амбасадорот на Република Турција во Германија, Ахмет Басар Сен. „Овој напад е шок за сите нас. Турската заедница е крајно вознемирена и сите бараме одговори“, рече Сен.

Во последните неколку години веќе имало напади од баратели на азил, за кои се покажало дека страдаат од психички нарушувања. Минатата година барател на азил од Сомалија избоде три лица до смрт во пешачка зона во Вирцбург.

Македонија

Средба на Спасовски и Демерџиев утре во Скопје

Како што соопшти МВР, изјави од министрите не се предвидени, а на крајот од официјалната средба ќе биде објавено соопштение за медиумите.

Вицепремиерот за јавен ред и безбедност и министер за внатрешни работи на Република Бугарија Иван Демерџиев со придружна делегација, утре, ќе престојува во работна посета на Министерството за внатрешни работи на Република Македонија во рамки на која ќе се сретне со неговиот колега, министерот за внатрешни работи Оливер Спасовски.

Како што соопшти МВР, изјави од министрите не се предвидени, а на крајот од официјалната средба ќе биде објавено соопштение за медиумите.

Посетата на Дерменџиев беше најавена во петокот, по телефонскиот разговор на премиерите на Бугарија и на Македонија, Галаб Донев и Димитар Ковачевски, посветен на актуелните случувања во односите меѓу двете земји. Прес-службите на двете Влади соопштија дека двајцата премиери разговарале за потребата претстојните празнувања на 151-годишнината од раѓањето на Гоце Делчев, да се одвиваат мирно и непречено.

Во таа насока, за утре, беше најавена посетата на вршителот на должноста вицепремиер и министер за внатрешни работи на Бугарија Иван Демерџиев и претседателот на државната агенција „Национална безбедност“ Пламен Тончев, кои ќе имаат работна средба со своите македонски колеги во Скопје на која ќе ги прецизираат заедничките активности за да се гарантира мирно и безбедно одбележување на 4 февруари.

Македонија

Утре променливо облачно и студено

Времето утре ќе биде променливо облачно и студено, попладне со делумно намалена облачност. 

Ќе дува слаб до умерен ветер од северозападен правец. Минималната температура ќе биде во интервал од -8 до -2, а максималната ќе достигне од 1 до 9 степени.

Во Скопје променливо облачно со слаб до умерен ветер од северозападен правец. Минималната температура ќе се спушти до -3, а максималната ќе достигне 5 степени.

Следува период на променливо облачно и студено време. Во вторник локално ќе провејува слаб снег и ќе дува засилен северен ветер. Во среда ќе има преодно намалување на облачноста, а од четврток повторно повремено ќе има слаби врнежи претежно од снег, велат од УХМР.

Македонија

Магла со видливост до 50 метри на патниот правец Тетово – Попова Шапка

Магла со видливост од 40 до 50 метри има на патниот правец Тетово – Попова Шапка, соопштија вечерва од Авто-мото сојузот на Македонија.

Сообраќајот на останатите државни патишта се одвива непречено, по наместа влажни коловози.

– Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата, се наведува во соопштението.

Од АМСМ препорачуваат прилагодена брзина на движење, почитување на поставената сообраќајна сигнализација и внимателно управување со возилата.

– Особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево, се нагласува во соопштението.

притисни ентер