Ангеловска: Растот на економијата во 2020 проектиран на 3,8 отсто, дефицитот 2,3

Министерката за финансии нина Ангеловска ги соопшти основните контури од буџетот за 2020 година која е во владина процедура. Проектираниот раст на економијата е 3,8 отсто, а во фокусот на буџетот е, како што рече,  инвестирање во човечкиот капитал.

Буџет фокусиран на инвестиции во човечки капитал. Вака министерката за финансии Нина Ангеловска го најави предлог буџетот за следната година.

Првата финансиерка сподели дека власта очекува економски раст од 3,8% и дефицит од 2,3% наредната година.

Колку пари на располагање ќе добијат министерствата, и со какви мерки власта ќе се посвети на инвестирање во човечкиот капитал ќе биде познато штом предлог буџетот го помине владиниот филтер – наредната недела.

Отткако не го помина владиниот филтер во средата, Ангеловска очекува на следната владина седница предлог буџетот конечно да биде официјализиран, па потоа претставен во јавноста.     

Низ медиумите веќе почнаа да кружат суми од нацрт верзијата на предлог буџетот, како тоа дека Фондот за пензиско и инвалидско осигурување ќе добие 64 милиони евра повеќе. Министерката не сакаше да ги коментира овие суми, бидејќи предлог буџетот се уште е во работна верзија.  

Во меѓувреме, ВМРО-ДПМНЕ обвинува дека Власта подготвува најмегаломански буџет досега, тежок 4 милијарди евра.

Криминалната банда на чело со измамникот Зоран Заев го подготвува најмегаломанскиот буџет во историјата на Република Македонија, тежок 4 милијарди евра. Додека беше во опозиција критикуваше дека буџетот бил преголем, ветувајќи дека ќе го намалел и ќе ги крател задолжувањата. Заев излжа. Долговите постојано се зголемуваат, капитални инвестиции нема, а никој не знае на што ќе се трошат парите, стои во партиското соопштение.

Земјотрес кај грчкиот остров Хидра

Слаб земјотрес со јачина од 4 степени по рихтер е измерен југоисточно од грчкиот остров Хидра.

Атинската национална опсерваторија соопштила дека потресот бил забележан во 10:15 во море на 51 километар од островот, пренесе „АНА“.

Како што се наведува епицентарот бил лоциран на 122 километри јужно од Атина.

На лондонскиот аеродром уапсен маж кој подготвувал терористички напад

Се сомнева дека тој учествувал во кривични дела во Сирија.

Британската полиција на лондонскиот аеродром Хитроу, уапсила маж кој пристигнал со лет од Турција заради сомнеж дека извршил кривични дела во Сирија, по што против него е покренато обвинение за тероризам.

Мамун Рашид утре ќе се појави пред судот заради обвинение за подготовка на терористички чин, соопшти британската полиција.

Ројтерс наведува дека тој е уапсен во вторник заради сомнеж дека е вмешан во кривични дела поврзани со конфликтот во Сирија.

Британската агенција, исто така наведува дека Турција почнала од своите затвори да праќа поранешни припадници на ИД во нивните матични земји.

Ројтерс не наведува од која земја е уапсениот Рашид.

Папата на ручек угости 1.500 бездомници

Римокатоличката црква денес го одбележува Денот на сиромашните.

По повод тоа Папата Франциск угости на ручек 1.500 бездомници и луѓе во неволја. Гостите во Ватикан биле донесени од волонтери од хуманитарни групи кои секојдневно помагаат на луѓето во неволја.

На менито на ручекот во Ватикан имало лазањи, пилешко во сос од печурки, компир, колач, овошје и кафе.

притисни ентер