Земјотресите продолжија и денеска. Вкупно 297 земјотреси се регистрирани од вчера, 87 само после полнок.
На средбата во Министерството за одбрана со првите луѓе на најпогодените градови, Тирана и Драч, изнесени се последните податоци за последиците од земјотресот што ја погоди Албанија.
Префектот на Тирана Сузана Јахолари информираше за сите преземени активности, формирање центри за сместување, поставување шатори, распределба на ќебиња, вода и потребна здравствена услуга.
– Моментално се работи на терен во евидентирање на оштетените објекти. Оштетени се 244 куќи и 20 станбени згради. Евидентирањето продолжува, рече Јахолари.
Според нејзиниот колега од Драч, Роланд Насто до сега како оштетени се регистрирани 188 куќи, 9 станбени згради и две училишта. Од 56 лица кои побарале лекарска помош 21 биле со скршеници.
Премиерот Еди Рама откако упати критики до Насто за лошото менаџирање на ситуацијата, му наложи да ги отвори вратите на градскиот стадион за да може да се постават шатори и да се сместат дел од жителите. Владата веќе отвори неколку пунктови во двата града на кои се дели храна, вода и друга помош на најзагрозените.
Албанскиот сеизмолог Рапо Ормени тврди дека главниот потрес поминал, но помали земјотреси ќе има со денови и недели.
На синоќешната владина седница во живо, владината зграда се тресеше од земјотресите и во моментите кога се собраа министрите, а камерите ги снимија овие моменти.
Земјотресите во Албанија,освен во нашата Земја беа почувствувани во Црна Гора и Босна и Херцеговина.