Српските власти се сомневаат дека земјава се обидува да го блокира процесот на изнаоѓање решение на проблемот помеѓу Србија и Косово.
Ваков е ставот на претседателот на собраниската комисија за Косово и Метохија во српскиот парламент Мирослав Дрецун кој синоќа за РТС тврдеше дека во Македонија е стациониран разузнавачки центар кој работи против интересите на Србија.
Според Дрецун, тимот разузнавачи е формиран пред два месеци, и како што рече маскиран во претставништво на голем западен произведувач на автомобили во Скопје, составен од оперативци од Македонија, Албанија, Бугарија и Германија.
Македонија станува центар за силно разузнавачко делување против државата Србија, и Заев едноставно не е искрен кога го предупредува регионот од можна дестабилизација.
Секое постигнување на компромисно решение е темелен столб на стабилизацијата на овој регион. А непостигнувањето на компромисно решение помеѓу Белград и Приштина е подготовка за нов спор во регионот и за остварување на Голема Албанија. Тоа Заев мора многу добро да го знае ако води сметка и за интересите на сопствената земја која ја претставува.
Дрецун побара одговори, но од македонската Влада не сакаа да ги коментираат неговите наводи. Велат дека остануваат на изјавите дадени од премиерот Зоран Заев околу прашањето Србија и Косово да градат пријателство низ дијалог, и оградувањата од какви било разговори за “пакт против Србија”.
Аналитичарот Исмет Рамадани смета дека не држат наводите на Дрецун. Вели дека од интерес и за Македонија е да се решат проблемите помеѓу Белград и Приштина, а не ја отфрли можноста дека позади обвинувањата на Дрецун да стојат српските служби поттикнати од руското влијание.
Инаку пред две години кога Белград го повлече целиот персонал од српската амбасада од Скопје, причината според српскиот претседател Александар Вучиќ беше дека српските надлежни органи утврдиле дека против Србија е извршено разузнавачко дејствување.