Нимиц: Се измачив со користењето на „ПЈРМ", Преспа е врв на мојата кариера

Нимиц вели дека денот на потпишувањето не го памети само по 79 роденден кој го прослави на брегот на Преспанското езеро, туку како многу потресен и многу важен ден, кој, како што наведува веројатно е врвот на неговата кариера.

Американскиот дипломат Метју Нимиц кој речиси 25 години посредуваше во спорото за името меѓу Скопје и Атина, во разговор за Дојче веле признава дека до самото потпишување на Договорот од Преспа на 17 јуни 2018 година, па ни потоа, не бил сигурен дека целата работа ќе се истера до крај.

Вели дека денот на потпишувањето не го памети само по 79 роденден кој го прослави на брегот на Преспанското езеро, туку како многу потресен и многу важен ден, кој, како што наведува веројатно е врвот на неговата кариера.

Нимиц кажува и дека постојано се мачел со користење на референцата „поранешна југословенска Република Македонија", име кое, како што посочува, всушност и не беше име.

– Привремената референца во Обединетите нации воопшто не беше име на земјата. Тоа беше времена референца во очекување на име. Тоа ви е како јас и сопругата да добиеме дете и во болница да му напишат „синот на г-дин и г-ѓа Нимиц. И ако детето 20 години шета без име, тој или таа ќе расте во многу непријатна ситуација. Вашата земја беше заглавена со таа референца што беше понижувачки за државата, ја доведуваше во прашање нејзината легитимност, отвораше проблеми, а беше тешко и за мене како претставник на ОН да ја користам и постојано да повторувам 'поранешна југословенска Република Македонија, вели Нимиц.

Од денешен аспект смета дека единствениот период во минатото кога можеби можел да се реши спорот се отворил веднаш по Самитот на НАТО во Букурешт во 2008 година.

– Можеби во таа кризна атмосфера нешто можеше да се стори, но излезе дека не е така затоа што имаше премногу бес и владата во Скопје одлучи да тужи пред Меѓународниот суд. Ни САД тогаш не беа многу од помош, да поттурнат за да се најде ново име, се присетува Нимиц.

Го споменува и периодот на грчкиот премиер Јоргос Папандреу, „кој имаше интерес да го реши проблемот", и неколкуте негови средби со тогашниот македонски премиер Никола Груевски. -Но, тоа не беа интензивни преговарачки сесии, што ме разочара. Тоа беа само куси состаноци, вели Нимиц.

И во периодот на владите на Љубчо Георгиевски и Костас Симитис за време на конфликтот во 2001 година кружеле идеи преку „неформални дискусии, а биле нафрлени и неколку имиња", но во тој период надежите на Нимиц биле насочени кон поранешниот претседател Борис Трајковски.

-Трајковски беше претседател. Имав чувство дека доколку Трајковски не загинеше трагично во авионската несреќа, дека тој имаше лидерски потенцијал да стори нешто, смета Нимиц.

Според него, процесот на антикцизација во Скопје што го почна владата на Никола Груевски по Самитот во Букурешт, имало многу лош ефект на процесот.

– Имав многу дискусии со Груевски и имав добри односи со него. Минавме многу часови заедно. Ќе одев во неговиот дом и ќе вечеравме заедно, и ќе разговаравме. Го сметав за многу интелигентен. Ги познаваше работите многу добро. Секогаш го сметав за многу интересна личност за разговор на оваа тема. Но неговите, и погледите на претседателот Иванов, беа премногу заглавени во историскиот пристап. Тоа за мене беше ќорсокак, наведува Нимиц.

Груевски,  оценува Нимиц, никогаш не бил подготвен да го направи последниот чекор.

-Тој не беше подготвен на компромис доволен за да се постигне договор. Беше флексибилен, но неговата флексибилност беше лимитирана. А и политиката во земјата беше таква што тој со оваа тема добиваше на избори, оценува Нимиц.

Долгогодишниот посредник во разговорите за името вели дека Преспанскиот договор и натаму се соочува со силно противење и во  Македонија и во Грција, како од двете најголеми опозициски партии, така и од радикалите.

Нимиц додава дека тоа му е јасно, а објаснувањето е дека „никогаш не можете да бидете сигурни за иднината.”

-Не верувам дека историјата кога било престанува. Нештата се движат. Споровите кои имаат длабоки корени се менуваат во природата, но никогаш целосно не исчезнуваат, одговара тој на дилемата дали е конечно затворен спорот./МИА.

Жерновски во Токио на церемониите за интронизација на јапонскиот цар Нарухито

Заменик министерот за надворешни работи Андреј Жерновски присуствува на церемониите за интронизација на јапонскиот цар Нарухито што се одржуваат денеска и утре во Токио. 

Жерновски учествува во својство на личен претставник на претседателот на државата и официјален претставник на Владата на Република  Македонија.

Како што соопшти Министерството за надворешни работи, во рамки на церемониите се одржуваат два свечени настана, односно официјална церемонија на интронизација на императорот, проследена со свечен прием во Империјалната палата, како и официјален прием приреден од јапонскиот премиер Шинзо Абе.

На церемониите за интронизација учествуваат претставници на повеќе од 170 држави и меѓународни организизации, меѓу кои и претставници на сите светски кралски семејства, голем број шефови на држави, министри и останати високи претставници од целиот свет.

 – Церемониите на интронизација се најважниот настан во Јапонија и настан што се случува еднаш во 30 години. Претходната ваква церемонија, односно интронизациајта на императорот Акихито, се случи во 1990 година. Заменик министерот Жерновски ги пренесе пораките на претседателот Пендаровски за добро здравје и долго и просперитетно владеење на императорот Нарухито, а во името на македонските граѓани посака ерата Реива да биде долга и просперитетна за јапонскиот народ, соопшти МНР.

Република Македонија и Јапонија оваа година одбележуваат 25 години од воспоставувањето на дипломатските односи кои, наведува МНР,  се карактеризираат со традиционално добри и пријателски билатерални односи.

– Јапонија е меѓу најголемите билатерални донатори на нашата држава, а техничката помош се реализира преку проекти во различни области. Континуираната јапонска поддршка и развојна помош овозможија во изминатите дваесет и пет години во Република Македонија да бидат направени значајни подобрувања во многу витални области, информира Министерството за надворешни работи./МИА

Бекеши: Владата забрзано ќе работи на реализација на проектите, изборите може да влијаат на економијата

Министерот за економија Крешник Бектеши смета дека предвремените избори ќе влијаат на економијата, но најавува дека Влада ќе почне активно да работи на забрзување на реализацијата на проектите.

-Македонија се покажа дека речиси ги исполнила сите услови на ЕК и дека  во економијата имавме големо унапредување и очекуваме така да продолжи. И ММФ предвиде поголем раст, предвремените избори секако ќе имаат влијание, имајќи го предвид и изборниот закон во текот на кампања, но како сериозна Влада од следната недела, односно од денеска ќе ги забрзаме сите постапки за да не бидат оставени нереализирани проектите, изјави Бектеши. /МИА

Хелсиншки комитет: Развлекувањето на случајот „Тамара" создава сомнеж за несовесно водење на постапката

Во февруари 2015 година, Хелсиншкиот комитет, заедно со мајката на Тамара поднесоа кривична пријава за сторено кривично дело – Несовесно работење во службата од член 353 од Кривичниот законик. 

По пристигнување на веста за поднесеното барање за изземање на јавниот обвинител кој постапува во случајот на малата Тамара, во кој обвинети се 12 доктори и членови на комисии кои донесоа и потврдија негативно решение за лекување во странство на Тамара, Хелсиншкиот комитет за човекови права остро реагира на правецот во кој оваа постапка се движи.

На вчерашната главна расправа по овој предмет, надлежната јавна обвинителка поднесе барање за изземање, притоа не наведувајќи кои се причините за таквото барање. Основното јавно обвинителство изјави дека предметното барање е поднесено поради постоење на законски пречки за понатамошно постапување на јавната обвинителка во предметот, поради нови околности кои настапиле во периодот од претходната до вчерашната главна расправа.

Во февруари 2015 година, Хелсиншкиот комитет, заедно со мајката на Тамара поднесоа кривична пријава за сторено кривично дело – Несовесно работење во службата од член 353 од Кривичниот законик. Од поднесувањето на кривичната пријава поминати се речиси 5 години, а предметот се уште не е завршен. До закажувањето на првото рочиште, Хелсиншкиот комитет во повеќе наврати реагираше до Основното јавно обвинителство за долгото водење на предистражната постапка. Првото рочиште по овој предмет беше закажано дури во јуни 2018 година. Од тогаш закажани се 19 рочишта, од кои дури 8 се одложени поради различни причини. Дополнително одолговлекување во текот на постапката настапи и поради пречекорување на рокот од 90 дена помеѓу одржување на две рочишта, во кој случај, согласно закон, главната расправа мора одново да почне и сите докази мора повторно да се изведат.

По вчерашното повторно одложување на рочиштето, овој пат поради поднесено барање за изземање на јавната обвинителка, како и поради неговото целокупно развлекување, се јавува сомнеж за несовесно водење на постапката која досега требаше да биде завршена. Затоа, го повикуваме Основното јавно обвинителство да ги образложи причините за изземање на обвинителката, за што Хелсиншкиот комитет ќе поднесе и официјално барање. Воедно напоменуваме дека правната сигурност може да се обезбеди само со утврдување на одговорност на сите чинители со цел задоволување на кривичната правда.

Хелсиншки комитет за човекови права

притисни ентер