Со дури 585 гласа за и 85 против го изгласаа извештајот на холандскиот европратеник Вим ван де Камп , кој покрај силната финансиска помош , побара и законска поддршка за автономните возила.
,,Европа мора да биде иновативна и побрза. Кина и САД не чекаат .” , рече пратеникот во излагањето.
Автономните возила се опремени со сензори , фотоапарати , компјутери, ГПС, сателитски приемници и радари со краток дострел и ја вршат целата или дел од работата при возење автомобил. Повеќе светски земји веќе развиваат цели системи и на меѓусебна поврзаност на автомобилите и инфраструктурата за поуспешно автономно возење.
Како главен адут во денешното излагање , холандскиот пратеник ја наведе безбедноста во сообраќајот. ,,Околу 90 проценти од сообраќајните несреќи се случуваат поради човечка грешка. “ , рече пратеникот .
Автономните возила од трета и четврта генерација веќе се тестираат и се очекуваат на пазарот меѓу 2020 и 2030 година. Целосно автоматизираните возила од петта генерација се очекуваат по 2030 година.
Според планот , сите нови возила во 2022 би требало да бидат вмрежени , а мрежата на возила би опфаќала не само автомобили , туку и камиони и комунални возила.