Православните христијани утре го слават Бадник, задутре Божиќ

 Православните христијански верници во Македонија утре го слават Бадник, ден пред големиот празник Рождество Христово – Божиќ.

Бадник традиционално ќе биде одбележан со собир пред Соборниот храм „Свети Климент Охридски" во Скопје. Манифестацијата ќе почне со бадниковата химна што ќе ја исполни„ Силви бенд" и со кревање на бадниковото знаме.

Свештениците од Соборниот храм „Свети Климент Охридски" ќе ги осветат нафората, чајот и ракијата, како и бадникарските гранчиња, што годинашните кумови и здравичарот традиционално порано ги набраа на падините на Водно, а кои ќе им се делат бесплатно на присутните.

Присутните граѓани ќе ги пречекаат стариот кум Влатко Огненовски со преодниот пехар, градоначалникот на Град Скопје, Петре Шилегов, новиот кум Љупче Николовски со погачата со златна паричка и здравичарот Миливое Алексиевски. Потоа тие ќе се упатат во Соборниот храм каде ќе се одржи свечен чин на осветување и кршење на погачата од страна на архиепископот охридски и македонски, г.г. Стефан, кој ќе одржи традиционална беседа, по што сите заедно ќе дојдат на бината каде ќе продолжи свеченоста.

Здравичарот ќе ја каже здравицата во име на Одборот за прослава, на присутните ќе им се обратат кумот, како и скопскиот градоначалник, кој потоа ќе му го врачи ќупот на новиот кум. Кумот и здравичарот ќе си заминат со пајтон.

Во Скопје и во уште неколку градови во Македонија утре ќе бидат организирани и детски бадникови поворки како предвесник на утрешниот христијански празник Рождеството Христово – Божик.

Децата учесници во бадниковите поворки во придружба на своите родители и роднини во 11 часот ќе се соберат на платото пред црквата „Св.Димитриј" во Скопје каде ќе се одржат Божикен концерт и Божикна претстава.

Македонскиот народ со многу внимание и почит ги одбележува овие празници. Божиќ е Господски празник и се празнува во спомен на раѓањето на Господ Исус Христос. Овој празник е матица на сите други црковни празници, бидејќи со Христовото раѓање се смета и почетокот на новата ера.

Семејството на Бадник се собира на заедничка вечера и според обичајот оваа вечер не се оди на гости. Се прави богата, посна трпеза.

Домаќините се трудат да принесат од се по нешто за да им биде богата трпезата во текот на целата година. Се меси погача, а во некои места се прават зелници во кои се става паричка. Се верува дека оној кај кого ќе падне паричката ќе го следи среќа во текот на целата година. Пред почнувањето на вечерата на која сите се собрани, домаќинот ја благословува трпезата, го крши кравајчето, а некаде го дели зелникот, на толку делови колку што има членови во семејството, оставајќи уште дел за Бога и дел за куќата.

Исто така, вечерта во огнот се става бадниково гранче кое се смета за најздраво дрво, за да бидат здрави сите во семејството. Бадниковите гранчиња се симбол на среќата, љубовта и светлината, со кои православните верници ги украсуваат домовите за Бадниковата вечер, во пресрет на Божиќ, најголемиот христијански празник. 

Американец го преживеал 11 септември, но не и Најроби

Американскиот бизнисмен Џејсон Спиндер е еден од преживеаните во терористичкиот напад на Њујорк на 11 септември 2001 година, но немаше толку среќа да го преживее и нападот на џихадистите во Најроби, Кенија.

Џејсон ја основаше и управуваше фирмата Ај-дев интернешнал која е стационирана во главниот град на генија, а е еден од 14-те настрадани во завчерашниот терористички напад на луксузниот хотелски комплекс во Најроби, потврди неговата мајка.

Американскиот Стејт депатмент потврди дека меѓу настраданите има и еден американец, но не соопшти повеќе детали.

Два дена по нападот во хотелот во Најроби во кој загинаа 21 лице, црвениот крст на Книја соопшти дека деветнаесет лица сè уште се водат како исчезнати.

Одговорноста за нападот ја презеде терористичката организација Ал Шабаб со седиште во Сомалија, а опсадата на хотелскиот комплекс заврши со ликвидација на напаѓачите.

Голем интерес на прилепчани за фаќање на крстот на Богојавление-Водици

Прилепското намесништво ги завршува подготовките за чествување на големиот празник Богојавление-Водици.

 Според отец Благоја Станкоски голем е интересот на прилепчани кои ќе учествуваат на празникот Богојавление-Водици за да го фатат светиот крст кој в сабота напладне ќе се фрла во водите на Аква паркот во комплексот на прилепскиот хотел „Салида".

– Изутрината од 4 часот во сите прилепски православни храмови ќе се служи божествена литургија, а напладне во Аква паркот е традиционалното фрлање на светиот крст. Пријавени се 98 прилепчани што е за 30-ина повеќе од лани. Во намесништвото имаме пријавени од сите возрасти. Најмладите, девојка и момче, имаат по 13, односно 15 години, а највозрасниот е 50-ина години. Најсреќниот црквата го наградува со икона „Крштение Исусово", објаснува Отец Станкоски, нагласувајќи дека може и други да се пријават пред самиот чин на фрлањето на крстот в сабота на Богојавление-Водици.

Најсреќниот преилепчанец ќе добие подароци и од прилепската локална самоуправа.

Кабинет на Ципрас: Сите Грци треба да ја дознаат вистината за Договорот од Преспа

Нема да одбереме брзи процедури за дискусија и ратификација. И во никој случај нема кришум да донесеме еден договор клучен за иднината на Грција и стабилноста во регионот.

 Нема да одбереме брзи процедури за Договорот од Преспа; имаме намера да биде информиран и последниот грчки граѓанин за аспектите на договорот; сметаме дека е важно да се одржи ТВ дуел со лидерот на опозицијата; неделните изданија на весниците ќе го објават целиот текст од договорот, се дел од следните чекори на грчката Влада во пресрет на ратификацијата на Договорот од Преспа, според соопштението од кабинетот на Алексис Ципрас, во кое разјаснуваат неколку работи поврзани со решението меѓу двете земји, јави дописничката на МИА од Атина.

-Нема да одбереме брзи процедури за дискусија и ратификација. И во никој случај нема кришум да донесеме еден договор клучен за иднината на Грција и стабилноста во регионот. Напротив, нашата намера е да биде информиран и последниот грчки граѓанин за сите аспекти (на договорот), за да може трезвено да процени дали е за или против нашите национални интереси, соопштуваат од кабинетот на Ципрас и објаснуваат дека нивниот стремеж е грчкиот народ да ја дознае вистината.

Во оваа насока, според кабинетот на грчкиот премиер, Министерството за надворешни работи на Грција ќе се погрижи во недела, во неделните изданија на грчките весници кои што се доста читани и популарни меѓу граѓаните да биде објавен целиот текст од договорот, „за сите откако ќе научат, да бидат во позиција да оценуваат".

А за да можат граѓаните да ги слушнат и да ги споредат аргументите, од кабинетот на грчкиот премиер уште еднаш го повторуваат предлогот на Ципрас од вчера, да се одржи ТВ дуел со лидерот на опозициската Нова демократија, Киријакос Мицотакис.

-Во исто време, сметаме дека е важен чекор во информирањето на грчкиот народ, одржување на дискусија, дебатата со лидерот на опозицијата, а со единствена тема Договорот од Преспа, она што го предложи премиерот на вчерашната седница во Парламентот. Нашиот предлог е дебатата да биде на повеќе телевизии и да се одржи на почетокот на следната седмица, на ден и во време што ќе се договори,  пишува во соопштениот од кабинетот на Ципрас, објави МИА.

Паралелно упатуваат порака до сите демократски и прогресивни политички сили и до секој пратеник дека „за ваквите важни национални прашања, треба да преовладува е патриотскиот интерес".

Доколку целиот текст од Договорот од Преспа излезе во весниците во недела ќе биде во исто време со протестот закажан во центарот на Атина од организации и здруженија што се против решението меѓу Македонија и Грција./МИА.

притисни ентер