Како Никола Груевски ја поминал македонско- албанската граница е единствената енигма од сложувалката околу бегството на поранешниот премиер.
Од МВР засега нема никакви одговори за ниту еден аспект од истрагата која ја водат веќе 10 дена. Министерот Спасовски денеска по речиси цела недела излезе во јавноста и изјави дека МВР има прибрано многу информации, но дека не може да ги сподели со јавноста затоа што истрагата е тајна. Тој истакна дека одговорноста ќе се бара откако ќе завршат истражните дејствија.
Последниот нов момент го соопшти црногорскиот министер за надворешни, кој со изјавата дека за преминувањето на Груевски на црногорската територија ги известиле македонските служби, фрли ново светло на случајот и го отвори прашањето – кога македонската полицијата дознала за бегството. Дали известувањето стигнало уште во неделата вечерта или пак откако беше распишана потерницата, еден ден подоцна... Дилема деновиве се отвори и по изјвата на српскиот претседател Александар Вучиќ дека Груевски македонско- албансакта граница ја поминал заедно со унгарци.
Експертот по организиран криминал Љубомир Ѓурчевски смета дека МВР направило доста пропусти и веќе доцни со изнесувањето на деталите од истрагата.
Одговорноста е кај МВР, колку и да сакаат да ја прикријат, министрството досега требаше да излезе со било какви информации дали излезот на Груевски е на легален или илиегален зелен граничен премин. Јас за легалните гранични премини се сомневам затоа што постои висок степен на корупција во МВР особено во делот на граничната полиција.
Имаме празен период до 13ти кога судски курир се обидува да достави упатен налог за издржување на казна и каде што настапува период на викенд кога имаме слободен простор. Тој период е најголемиот пропуст во работењето на МВР.
Со деталите околу тоа на кој начин излегол Груевски од државава би се завршила целосната слика околу рутата по која се движел екс премиерот. Албанските медиуми неофицијално објавија дека тој влегол во Албанија нелегално преку граничниот премин “Блато” кај Дебар , при што имал асистенција од луѓе од доверба.