Кутињо нема да игра против Сити

Филипе Кутињо нема да биде вклучен во составот на Ливерпул за утрешното дерби против Манчестер Сити.
Менаџерот на Ливерпул, Јирген Клоп изјави дека оваа одлука е донесена, бидејќи Бразилецот не тренирал со тимот три недели пред паузата за натпреварите на националните тимови.
Кутињо ги пропушти активностите на Ливерпул поради повреда во грбот и беше во очекување на трансфер во Барселона, кој не се случи. Потоа тој замина за Бразил, каде што тренираше со репрезентацијата и дури учествува во квалификациите. Во средата тој се врати во Англија и ги обнови тренинзите со Ливерпул, но Клоп одлучил дека Бразилецот не е подготвен.
Менаџерот на „црвените“, објасни дека било можно Кутињо да игра 15-20 минути, но по разговорот меѓу двајцата проценија дека е мудро воопшто да не зема учество во натпреварот.
Дуелот Манчестер Сити - Ливерпул е закажан за утре од 13:30 часот и со него ќе биде отворена четвртата рунда од Премиер лигата.

СП 2018: Швајцарија ја совлада Србија

Швајцарија ја совлада Србија со 2:1 во натпревар од групата Е на Светското првенство во Русија.

Во возбудливиот натпревар со сериозни шанси на двете страни, српската репрезентација дојде до водство од 0:1 со голот на Александар Митровиќ во петта минута, резултат со кој се замина на паузата.

Во почетокот на вториот дел Гранит Џака беше прецизен и Швајцарија во 52-та минута израмни на 1:1.

Швајцарската репрезентација со голот на Џердан Шакири во 90-та минута дојде до победа од 2:1.

Во оваа група Бразил и Швајцарија сега имаат по четири бода, Србија има три, додека Костарика остана без бодови и без шанси за натамошен пласман./МИА

СП 2018: Ахмед Муса и донесе победа на Нигерија против Исланд

Нигерија убедливо со 2:0 го совлада Исланд во натпревар од групата Д на Светското првенство во Русија.

За нигериската репрезентација ова е прва победа на Мундијалот, а стрелец на двата гола беше Ахмед Муса.

Нигериските фудбалери одиграа одличен натпревар, особено во вториот дел кога притисокот на голот на Исланд беше постојан и беа постигнати двата гола во 49 минута и 75 минута.

Нигерија со овие три бода останува во игра за нокаут фаза, а шанси имаат и Аргентина и Исланд, бидејќи за второто место во оваа група ќе се решава во последното коло.

СП 2018: Бразил во финишот ја совлада Костарика

Бразил во судиското надополнување ја совлада Костарика со 2:0 во натпревар од групата Е на Светското првенство во Русија.

Филипе Кутињо во 91-та минута беше прецизен за водство од 1:0 на бразилската репрезентација, а Нејмар во 97-та минута ја потврди победата и постигна гол за конечни 2:0.

Иако Бразилците влегоа како фаворити во натпреварот, многу потешко од очекуваното дојдоа до значајната победа и до трите бода.

Во второто полувреме интересен беше и моментот кога судијата досуди пенал за Бразил, откако Нејмар падна во шеснаесетникот на Костарика. Но, по консултација со ВАР системот ја поништи својата одлука.

Бразил сега има четири бода, додека Костарика остана без бодови и без шанси за натамошен пласман.

Во оваа група вечерва ќе играат Србија и Швајцарија./МИА

притисни ентер