Македонските мотоциклисти викендов на три меѓународни натпревари

Македонските мотоциклисти викендов ќе ја претставуваат Мотоциклистичка федерација на Македонија (МФМ) на три меѓународни натпревари.

На натпреварот од отворениот Источно-Европски шампионат на кружни патеки кој ќе се одржи на 28 април на патеката на воениот аеродром Батајница крај Белград (Србија) ќе се натпреваруваат Игор Спиров, во класата супербајк до 600 ссм и Сашо Николов во класата супербајк до 1.000 ссм, јави МИА.

Спиров минатата година го оствари најголемиот македонски успех во оваа конкуренција освојувајќи го четвртото место во генералниот пласман, додека Николов беше на делбата од петтото место во конечниот пласман.

На натпреварот од отворениот Шампионат на Србија во мотокрос кој ќе се одржи на патеката Горњи Брестовац крај Лесковац ќе настапат браќата Ристевски. Помладиот Лука ќе се обиде да го повтори успехот од мината недела кога победи во класата МХ65, а постариот Андријан ќе се бори за пласман на подиумот со оглед на второто место од последната трка.

Петмина македонски претставници ќе учествуваат на натпревар од отворениот Шампионат на Грција во мотокрос на патеката крај Кожани. Во најсилната класа МХ1 наши адути се искусниот Гоце Томовски и младиот Симеон Николовски, 12-годишниот Христиан Станковиќ ќе настапи во класата МХ85, а ветераните Никола Тодоров и Борче Костов во класата МХ3.
притисни ентер