Филипче потпиша договори со граѓански организации за активности за превенција од ХИВ

Петнаесет граѓански организации кои аплицираа на јавниот повик на Министерството за здравство ќе добијат 47 милиони денари за активности утврдени во Програмата за заштита на населението од ХИВ инфекција за годинава.
Тие денеска со министерот за здравство Венко Филипче потпишаа договори со кои ќе им бидат обезбедени средствата.

- Република Македонија e првата земја во регионот која целосно го презема финансирањето на превентивните програми за ХИВ и туберкулоза од Глобалниот фонд, кој го препозна ова лидерство. Имаме чест годинава на 9 и 10 мај бордот на Глобалниот фонд да се одржи во нашата земја. Владата стави приоритет и обезбеди средства од националниот буџет за да продолжи со програмите за превенција, дијагноза и за лекување на пациентите со ХИВ и туберкулоза, истакна Филипче на прес-конференција.

Министерството за здравство, посочи, ги препозна граѓанските организации како клучен фактор за соработка и натамошно имплементирање на овие програми со оглед на нивното огромно досегашно искуство, како и контактот со целните групи.

- Објавивме два повика на кои се јавија 15 граѓански организации и денеска ги потпишуваме договорите за национално кофинансирање. Македонија има исклучително ниска стапка на инфекција со ХИВ дури и во најризичните групи. Се надевам дека и натаму заедно со граѓанските организации ќе работиме на националниот одговор против оваа болест, додаде Филипче.

Претседателот на Национална комисија за ХИВ/СИДА при Министерството за здравство, д-р Милена Стевановиќ од Клиниката за инфективни болести рече дека во превентивната програма за превенција на ХИВ активно ќе бидат вклучени здравствените институции кои ќе имаат одговорност за да се одржи ниската преваленца на ХИВ. Товарот, потенцира, ќе падне на Институтот за јавно здравје, центрите за третман на зависности, Клиниката за инфективни болести и центрите за јавно здравје.

- Работата на овие институции ќе биде мониторирана и евалуирана од Национална комисија за ХИВ/СИДА при Министерството која ќе има за задача да обезбеди и мултидисциплинарен пристап со институциите. ХИВ инфекцијата е мултидисциплинарен проблем и ќе имаме потреба од учество и на други институции во реализацијата на оваа програма, додаде Стевановиќ.

Христијан Јанкуловски од ХОПС - опции за здрав живот, една од организациите која е членка на ХИВ платформата, рече дека за програмите за ХИВ за годинава се обезбедени 95 милиони денари од кои 47 милиони денари се за превентивните програми кои ќе ги имплементираат 15 здруженија, околу 43 милиони денари се за третманот за ХИВ, а остатокот од пет милиони денари се за Институтот за јавно здравје, центрите за јавно здравје кои се поврзани со мониторинг, евалуација на овие програми.


Интервју со Билјана Ивановска, првиот човек на ДКСК

Вечерва во „Само вистина“ гостин беше Билјана Ивановска, првиот човек на ДКСК.

Слабата законска регулатива генерира непотизам – мора да најдеме начин како да го промениме системот за да не се пречекоруваат законите кога се вработува во државните фирми, вели Ивановска.

Со новиот закон како институција имаме повеќе ингеренции, но не е доволно. Ни недостасува повеќе кадар кој ќе биде доброквалификуван и повеќе средства со кои ќе располагаме, вели претседателката на ДКСК.

Не ме плаши позицијата прв човек на Антикорупциска. Се надевам дека ќе се зголеми свеста за системот на вредности и дека чесноста конечно ќе стане во мода,  заклучува Ивановска.

Бузаку: Од утре сум нов поглавар на ИВЗ врз основа на судско решение и внатрешни акти

Скендер Бузаку денеска во изјава за медиуми најави дека од утре тој е новиот поглавар на Исламската верска заедница.

Како што истакна тој ќе раководи со Исламската верска заедница согласно судско решение и сите внатрешни акти.

Информира дека ја известил и финансовата полиција која треба да направи увид на досегашното работење на поглаварот Сулејман Реџепи во Исламската верска заедници.

Како што рече очекува мирно преземање на раководењето со ИВЗ и оцени дека сета постапка досега е направена во демократска атмосфера

Влада: Формирана е Kомисија за спроведување постапка за јавно приватно партнерство за изградба на систем за дистрибуција на природен гас

Владата на 131 седница формира Надзорен одбор за напредок на имплементацијата на телефонскиот број за итни повици Е-112, зголемено е учеството во Фондот за Западен Балкан за реализација на крупните проекти.

Владата на денешната 131 седница ја разгледа и усвои Информацијата од одржаниот состанок на Надзорниот одбор за супервизија и следење на напредокот во имплементацијата на системот за итни повици Е-112 во Република Македонија, и ги задолжи Генералниот секретаријат на Владата, Министерството за одбрана, Министерството за финансии и Секретаријатот за европски прашања во рок од десет дена да номинираат свои претставници во Надзорниот одбор за супервизија и следење на напредокот во имплементацијата на Е-112 и да ги достават до Центарот за управување со кризи.

Како дополнителен заклучок на седницата Владата на РСМ го задолжи Генералниот секретаријат редовно да ја информира Владата за напредокот во имплементацијата на системот за итни повици Е-112 кој произлегува како обврска од усогласувањата со праксата на Европската Унија за воспоставување комуникациско–информативен систем и единствениот европски број за итни повици во сите земји на унијата.

На денешната седница е разгледана и усвоена Информацијата за зголемување на учеството на државите-членки во буџетот на Фондот за Западен Балкан, во функција на реализација на програмските активности, и донесе заклучок да го задолжи Министерството за надворешни работи во рамки на својата координација со Фондот за Западен Балкан да ја потврди подготвеноста на Република Северна Македонија, почнувајќи од 2019 година, за уплата на зголемени годишни контрибуции кон буџетот на Фондот за Западен Балкан, утврдени на износ од шеесет илјади евра (60.000 евра) годишно односно 3.690.000 денари во денарска противвредност.

На оваа своја 131 седница Владата ја разгледа и усвои Информацијата за Планирање и проценка (PARP), согласно редовната обврска за планирање на одбранбените капацитети за 2019 година, и го задолжува Министерството за одбрана да ги реализира подготовките за мултилатералните консултации со НАТО за финализирање на PARP Проценката 2019 на Република  Северна Македонија до 30 јуни 2019 година, до кога овој документ треба да биде доставен во Главниот Штаб на Алијансата во Брисел.

За имплементацијата на преземените обврски, Министерството за одбрана треба да ја информира Владата на РСМ најдоцна до 31 јули 2019 година.

На седницата одржана денеска, Владата донесе Решение за формирање на Kомисија за спроведување на постапката за доделување на Договор за воспоставување на јавно приватно партнерство за изградба на нов систем за дистрибуција на природен гас на територијата на Република Македонија.

Комисијата има за цел да ја спроведе целокупната постапка за доделување на договорот за воспоставување на јавно приватно партнерство за финансирање, проектирање, изградба, управување, одржување и развивање на дистрибутивниот систем на природен гас по пат на јавен повик за избор на јавен партнер со постапка на конкурентен дијалог со е–аукција, односно да го подготви јавниот повик, тендерска документација, вклучувајќи го и нацртот на договорот, и да изврши евалуација и изготви извештај за евалуација на понудите како и да достави до Владата предлог за избор на најповолен понудувач за избор на јавен партнер за финансирање, проектирање, изградба, управување, одржување и развивање на дистрибутивниот систем на природен гас или предлог за поништување на постапка.

притисни ентер