Царовска: Работниците да пријават злоупотреба на минимална плата, ќе стојам зад секој од нив

Според податоците на УЈП над 90 проценти од работниците кои имаат ниски примања ја добиле загарантираната минимална плата.
Малиот интерес за субвенционирање на исплатата  најверојатно е резултат на можноста на компаниите тоа да го направат без помош на државата. Има информации за злоупотреби, односно за барања работниците да им вратат дел од средствата на работодавачите, но затоа тие треба да се охрабрат, да пријават за да можеме да преземеме мерки, рече министерката за труд и социјална политика Мила Царовска.
Потенцира дека компаниите независно од тоа што не ја користат државната помош ја почитуваат минималната плата, од една страна, но од дрига страна, преку медиумите се добиваат информации и шпекулации дека има злоупотреба, дека граѓаните треба да ја вратат платата.
- Затоа апелирам во секоја моја изјава дека е многу важно да имаме сведоци затоа, дека треба да покренеме постапки. Не само што е прекршок, туку е кривично дело вие од работникот да земате пари назад во кеш или да исплаќате плата на рака. Ги замолувам сите работници да се охрабрат и конечно да ја завршиме таа работа за злоупотреба на работната сила во компаниите. Јас искрено ќе стојам позади секој работник кој ќе пријави ваква злоупотреба или непочитување на законот, рече Царовска одговарајќи на новинарско прашање по презентацијата на мерки за оптворање работни места.
Малиот број барања за финансиска помош од државата за исплата на минималната плата, вели, е согласно нивните предвидувања дека фирмите имаат капацитет да исплатат плата од 12.000 денари.
- За да не се направи паника,сепак, понудивме и буџетска поддршка, но гледате дека таа не се искористува. Можеби им треба период за адаптација, имаат уште многу време да ја користат, можеби наредниот месец ќе се пријават за субвенција, можеби чекаат да видат и државата како ќе постапува кон оние кои бараат буџетска поддршка во однос на исплатата на минимална плата... Мислам дека компаниите треба да се ослободат, таа буџетска поддршка е за нив и треба да ја искористат и не треба да се плашат од ништо, рече Царовска.
Таа појасни дека имала средба со претставници на кожарската индустрија кои посочиле дека исплаќаат минимална плата, но оти тоа им преставува проблем поради тоа што продажните цени на нивните производи веќе биле однапред утврдени и не можеле да ги менуваат.
- Се сретнав со нив и ги упатив дека треба да дадат предлог каков тип поддршка треба да им дадеме за да може да го поминат овој критичен период, затоа што тие кажаа дека до февруари-март ќе им биде проблематична исплатата на минималната плата затоа што цените  за откуп на нивните производи им се фиксирани. Тоа не можат да го променат во од, но рекоа дека наредната година тоа може да го променат со поскапување на цената на нивниот производ, рече Царовска.
Додаде дека за да го направат овој период полесен за поминување да се обратат до Владата писмено преку Стопанската комора и да таа да изготви некаков пакет мерки./МИА

Спортската сала „Младост“ во Гостивар остана без струја заради неплатени сметки

Спортската сала „Младост“ во Гостивар од денес е без снабдување со електрична енергија, откако ЕВН ги исклучи од напојувањето заради неплатени сметки.

 Од општината обвинуваат дека причината која довела до ова е одлуката на мнозинството во советот да не се префлат пари на јавното претпријатие кое стопанисува со салата.

Од општина Гостивар во соопштението до јавноста наведуваат дека одлуката на мнозинството членови на Советот на Општината, на последната  петта седница гласаше против доделување на субвенции на ЈПССО „Риниа“ директно влијаело врз исходот.

- Претходното раководство создаде огромни неподмирени обврски кон ЕВН, за потрошена електрична енергија и во ова претпријатие. И покрај тоа што самите се одговорни за создадената ситуација, советниците на ДУИ и нивните партнери СДСМ, НДП и ДСР гласаа против предлог-одлуката за доделување на субвенции во висина од 500.000 денари. Тие пари беа наменети за плаќање на трошоците за поторошена електрична енергија. Токму заради тоа, како последица, ЕВН им ја исклучи струјата и салата остана во мрак, стои во соопштението од општина Гостивар. 

Нов закон за персонален данок на доход

Граѓаните со месечни примања од илјада евра ќе плаќаат данок од 10%, а оние чии примања ја надминуваат таа сума, за нив стапката ќе изнесува 18%.

На социјалните мрежи се појави дел од драфт верзијата на Законот за персонален данок на доход кој  го подготвува Владата, а треба да стапи на сила од следната година.

Во приходите кои се оданочуваат спаѓаат тие, кои граѓаните ги добиваат од заработената месечна плата на работа, од самостојна дејност, од авторски и сродни права и продажба на сопствени замјоделски производи.

Дополнително ќе се даночат и добивките од игри на среќа, доходот од осигурување, капитал, капитлани добивки.

Но, ова не е единствена новина во законот.

Владата планира да ги даночи и оние кои штедат во банките, доколку бруто годишната добивка – надминува 15 илјади денари.

Од министерство за финансии велат дека ова се шпекулации кои не се базирани на факти и нема да коментираат.

МФ спроведува темелна анализа за начините и моделите на обезбедување фер даночна политика во Република Македонија.

Во моментот кога анализата ќе биде подготвена, истата ќе се презентира пред граѓаните и пред стручната јавност, со цел да се отвори јавна дебата базирана на точни податоци и факти. Министерството за финансии работи во насока на обезбедување фер даночен систем.

Инаку познавачите на проблематиката во изминатиов период беа се погласни против Владините најави да се даночат оние со примања над илјада евра. Според експертската јавност тоа би предизвикало селење на бизнисот, даночна евазија како и зголемување на сивата економија.

Според дел од нив - рамниот данок кој се воведе во 2006тата дал добар сигнал за странските инвестиции и имал одреден ефект врз сивата економија.

СДСМ: Договорот е патриотски чин

Договорот е патриотски чин, го зајакнува идентитетот и ја обезбедува иднината, ВМРО-ДПМНЕ ја лаже јавноста

Конечниот Договор со кој се става крај на деценискиот спор со Грција е патриотски чин со кој се гарантира и зајакнува македонскиот идентитет и се обезбедува иднината на граѓаните и државата.

ВМРО-ДПМНЕ нема никакви аргументи и затоа продолжува да ја лаже јавноста со пласирање целосно лажни вести, измислици и дезинформации.

Химната и државните симболи не се дел од Договорот и вооопшто не биле дел од разговорите. Што значи дека ниту некој државен симбол се менува ниту пак нивната употреба е доведена во прашање, напротив.

Договорот го гарантира македонскиот иденитет кој никогаш повеќе нема да биде оспоруван или негиран од другите и се отвораат евроатлантските интеграции кои се врвен национален интерес. Македонски јазик, македонски народ, македонско оро, Македонци, македонски, обезбедени еднаш засекогаш.

Во интерес на граѓаните и државата, ВМРО-ДПМНЕ да престане со лажните наводи, да покаже елементарна одговорност пред граѓаните и државата и да престане да ја кочи македонската иднина.

Конечниот збор ќе го имаат граѓаните на референдум. Убедени сме, граѓаните ќе кажат ДА, за македонската иднина, ДА за членство во НАТО, ДА за датум за почеток на преговрите за полноправно членство во ЕУ.

Центар за комуникации со јавноста на Социјалдемократски сојуз на Македонија

притисни ентер