Промоција на книгата „На Скопје, со љубов! - Архитектонската мисла на Живко Поповски“

Книгата „На Скопје, со љубов! - Архитектонската мисла на Живко Поповски“ приредена од Анета Христова - Поповска и Мери Батакоја, ќе биде промовирана вечер во Музејот на Град Скопје.

За книгата и за делото на Живко Поповски ќе зборуваат академик Влада Урошевиќ, проф. архитект Мартин Гулевски и поранешниот градоначалник на Скопје, Ристо Пенов.

Книгата преставува комплетна збирка на текстови, колумни и интервјуа кои архитектот Живко Поповски ги напишал и објавил во текот на својот живот, надополнета со авторски цртежи и два воведни текста од приредувачките.

„На Скопје, со љубов!“ е прва книга која во фокус го става интелектуалниот ангажман на архитектот Живко Поповски.
Истражувачкиот дел на проектот е реализиран со академска поддршка на Архитектонскиот факултет и техничко-финансиска поддршка на Арт проект лаб и Град Скопје. 

Меѓународна летна школа за управување во услови на мигрантски кризи

На Воената академија во касарната „Гоце Делчев“ во Скопје денеска ќе биде отворена Меѓународна летна школа  „Управување во услови на мигрантски кризи" која ќе трае до 24 јуни. 

Во шесте дена на Летната школа ќе има околу сто учесници од регионот. Организатор е Филозофскиот факултет од Скопје, заедно со Факултетот за криминалистика, криминологија и безбедносни студии од Сараево и Велеучилиште од Велика Горица. 

- Летната школа ќе биде можност студентите и практичарите преку програмата за доживотно учење да се стекнат со потребните знаења и вештини за справување со безбедносните предизвици предизвикани од мигрантските кризи, соопштија организаторите. 

Покрај деканите на факултетите кои го организираат настанот, најавени се и обраќања на вицепремиерката и министер за одбрана Радмила   Шекеринска, ректорот на УКИМ Никола Јанкуловски и директорите на Центарот за управување со кризи и Агенцијата за заштита и спасување,  Агрон Буџаку и Аднан Џафероски. /МИА

Седници на две собраниски комисии

Во Собранието на Република Македонија денеска седници треба да одржат комисиите за образование, наука и спорт и за финансирање и буџет. 

На дневен ред на Комисијата за образование, наука и спорт се измените на Законот за обука и испит за директор на основно училиште, средно училиште, ученички дом и отворен граѓански универзитет за доживотно учење и на Законот за основање на Технолошко – технички факултет, Ветеринарен факултет и Правен факултет во состав на Универзитетот „Св. Климент Охридски“ во Битола, двата во прво читање поднесени од пратеници од владејачкото мнозинство. 

На Комисијата за финансирање и буџет на дневен ред се измени и дополнувања на Законот за акцизите, измени на Законот за приватизација и закуп на градежното земјиште во државна сопственост, измени и дополнувања на Законот за царинска управа, сите во второ читање и Предлог на закон за отпишување на камати за наплата на долгови кои произлегуваат од услуги од вршители на комунални дејности, телефонија, мобилни и кабловски оператори, одржување на заеднички простории, наводнување и одводнување на земјоделско земјиште, во прво читање поднесен од пратениците од владејачкото мнозинство и опозицијата. /МИА

ФАО работилница за пристапот при консолидација на земјиштето

Во Скопје денеска почнува тридневната Меѓународна работилница ЛЕНДНЕТ што ја организира ФАО со поддршка на Министерството за земјоделство, шумарство и водостопанство.

Целта на работилницата е идентификување на најдобрите регионални практики и развивање заеднички пристап кон легислативата за консолидација на земјиштето во земјите од Западен Балкан.

Пред присутните ќе се обратат министерот за земјоделство, шумарство и водостопанство Љупчо Николовски, експертот од ФАО за управување со земјиште Мортен Хартвигсен, како и Рик Ваутерс од Економската комисија на ОН за Европа (УНЕЦЕ), Работна група за земјишна администрација. /МИА

притисни ентер