Македонија

Арсовски: Тим на ВМРО-ДПМНЕ го анализира носењето на законите за јавно обвинителство и за Советот на јавни обвинители

Експертски тим на ВМРО-ДПМНЕ ја анализира ситуацијата со носењето на законите за јавно обвинителство и за Советот за јавни обвинители по што ќе излезе со конкретна информација за нивното неделовничко носење.

-Пратеничката група на ВМРО-ДПМНЕ во текот на вчерашниот ден по гласањето во Собранието реагираше за носењето на законите конкретно и поточно за советот за јавни обвинители. Во тој дел нашите правни експерти, правниот тим на ВМРО-ДПМНЕ разгледува секакви можности, ја анализира ситуацијата и веднаш потоа ќе излезе со конкретен податок, односно со претставка која што ќе биде поднесена до надлежните институции за носењето на овој закон односно за неделовничкото носење на овој закон така што, веднаш штом излезат со својата анализа ќе се поднесат и претставки до соодветните институции, изјави денеска портпаролот на ВМРО-ДПМНЕ Димче Арсовски.

-Доколку е правнички издржано ќе се поднесе претставка и до Уставниот суд, додаде портпаролот на ВМРО-ДПМНЕ.

ВМРО-ДПМНЕ, како што кажа портпаролот на опозициската партија, води конструктивни разговори со повеќе политички партии, но во однос на какви било коалиции најдобро е да се почека што следи во наредниот период.

-Има конструктивни и пријателски разговори со сите политички партии и секоја политичка партија која што е на иста бранова должина со ВМРО-ДПМНЕ и ќе ја поддржи програмата и визијата на ВМРО-ДПМНЕ за обнова на Македонија има простор да се разговара за коалиции, рече Арсовски.

На кандидатските листи ќе се најдат многу нови луѓе и во помал број веќе искусни луѓе. Не сакаше да соопшти имиња, но потенцира дека станува збор за луѓе со интегритет, кредибилитет и професионалност во својата област која што ќе ја застапуваат во Собранието и надвор од него.

-Тоа ќе бидат на некој начин луѓе кои не се да речеме премачкани со каков било криминал, како што тоа е случај во СДСМ, рече Арсовски.

Во однос на неназначувањето предлог за дополнителен министер за труд и социјална политика, тој рече дека бесполезно ќе било предлагањето на кој било друг министер затоа што повторно ќе се случело истото што и се случувало на министерката Рашела Мизрахи.

-Интенциите беа на кој било начин да се оневозможи работата на техничките министри и тоа продолжи до самото разрешување на министерката Рашела Мизрахи. Зоран Заев и Оливер Спасовски доколку сакаат да разрешуваат во однос на законите, доколку беа етички и морално, како што велат внесени во целата ситуација најпрвин ќе поднесеа барање за разрешување на сите околу нив. Конкретно Оливер Спасовски ќе требаше самиот да си поднесе барање за разрешување затоа што него го следат десетици сериозни скандали во министерството за внатрешни работи, истото и со Венко Филипче, истото и со многу други функционери од владата на СДСМ, рече Арсовски, одговарајќи на новинарски прашања.

Македонија

Состојба на патиштата

Сообраќајот на државните патишта се одвива непречено, по суви коловози. 

Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

ЦУК: Осум пожари на отворено во изминатото деноноќие

Во последното деноноќие се евидентирани осум пожар на отворен простор, а активни утрово нема. Горела ниска вегетација, депонии и ѓубришта, соопшти ЦУК.

По еден пожар на отворено имало во село Трубарево (ниска вегетација), зад терминалот на влезот во Струмица (ѓубриште) и кај пробиштипското село Неокази (трска). Во Општина Ѓорче Петров имало два, кај „Стопански двор“ (ниска вегетација) и кај „Обиколница Волково“ (ниска вегетација). Три пожари на творено имало во Општина Кочани - горела градската депонија, кај месноста „Монополски Бавчи“ (ѓубриште) и кај местото „Игралиште“ во Кочани (ѓубриште).

Забава

Танц парада и мини концерт во Струга по повод Светскиот ден на танцот

Со танц парада и мини концерт на отворено, под мотото „Струга танцува“ студиото за танц „Бах“ денеска по четврти пат ќе го одбележи Светскиот ден на танцот - 29 април.

Тања Бах, кореограф и идеен творец на студиото за танц информира дека членовите на „Бах“ ќе тргнат од центарот за култура „Браќа Миладиновци“, покрај кејот на реката Црн Дрим ќе продефилираат низ Струшката чаршија, а потоа ќе одржат концерт во Паркот на поезијата.

-Танц парадата е еден креативен начин да го одбележиме Светскиот ден на танцот. Парадата е нашиот придонес во културните настани во градот на мостовите. Ќе приредиме едно вистинско уживање за публиката и на за нас својствен начин ќе потсетиме за физичките и психичките придобивки од танцувањето, изјави Бах.

Во Паркот на поезијата, додаде, 100-тината членови на „Бах“ ќе ја продолжат танцовата традиција во Струга.

Светскиот ден на танцот за прв пат е прославен на 29 април 1982 годинаа, оттогаш, секоја година на овој ден ширум светот се читаат меѓународни и национални пораки за танцот. Оваа иницијатива ја покрена Меѓународниот одбор за танц на Меѓународниот инститиут за танц на УНЕСКО, а го избра денот според роденденот на зачетникот на модерниот балет и еден од најголемите танцови реформатори, Жан Жорж Новер. /МИА

притисни ентер