Американска скијачка победила во чест на починатиот татко, се расплака на финишот (ВИДЕО)

Американката Микаела Шифрин победи вчера во женскиот слалом за Светскиот куп во австрискиот скијачки центар Флачау.

Шифрин, која сè уште водеше по првото возење, стигна до 44-та победа во слаломот на Светскиот куп и четврта во Флахау, со 19 стотинки предност пред Австријката Катрин Линсбергер, додека третото место го освои Швајцарката Венди Холденер со 43 стотинки послабо време.

Таа победа ја чекала 13 месеци, а кога дојде до неа, плачеше пред камерите на финишот. Причината била смртта на нејзиниот татко Џеф кој починал на 2 февруари минатата година во Колорадо.

По несреќата дома и тешката повреда на главата, тој бил пренесен во болница, но таму им подлегнал на повредите неколку часа подоцна пред неговата сопруга Ајлин, ќерката Микаела и синот Тејлор.

"Чувствувам дека ова е нов почеток. Повеќето од моите победи и најдобри трки се веќе зад мене. Сепак, имам 25 години и е чудно да мислам дека завршија моите најдобри трки", изјави Микаела за ОРФ по трката во Флачау, додавајќи:

"Не можете да одите напред додека не престанете да се враќате назад, а јас не сум најдобра во тоа. Сакам живот како што беше пред 2 февруари. Веројатно ќе ми пречи некое време, но денес направив голем чекор напред".

Бесими: Работиме на воведување на Интегрираниот информациски систем

Истиот  очекуваме да биде поддржан од Групацијата на Светска банка и од Европската комисија, вели Бесими.

„Министерството за финансии интензивно работи на подготовка на проектот за воведување Интегриран информациски систем за управување со јавните финансии (IFMIS), и истиот очекуваме да биде поддржан од Групацијата на Светска банка и од Европската комисија, во рамки на Вториот инструмент за претпристапна помош (IPA II). Проектот е од исклучително значење за управувањето со јавните финансии, бидејќи ќе овозможи интегрирано следење на приходите и расходите од нивното планирање до целосната реализација, со што ќе се подобри управувањето со јавните финансии", истакна министерот за финансии, Фатмир Бесими на средбата со директорот на Светска банка за земјава, Масимилијано Паолучи. На официјалната средба, којашто се одржа во Брисел на 25 февруари 2021 година, беше потенцирано дека со воведување на овој систем ќе се решат повеќе фискални предизвици, вклучително и реалистичното планирање и повисоката реализација на капиталните инвестиции.

„Мерките и политиките коишто се преземаат во насока на поддршка на одржлив и инклузивен раст, се клучни во услови кога се соочуваме со најголемата економска криза досега. Фискалната политика мора да биде во центарот на одговорот на кризата предизвикана од пандемијата на ковид-19", истакна Бесими.

На средбата беше разгледана реализацијата на четиригодишната стратегија на Светска банка, при што беше посочено дека наскоро се очекува да започне реализацијата на проектот за локални патишта. Воедно, во собраниска процедура за усвојување е и Законот за задолжување за проектот за енергетска ефикасност во јавниот сектор, во висина од 25 милиони евра, којшто ќе овозможи реализација на Проектот за енергетска ефикасност во јавниот сектор. Проектот се спроведува преку проектната единица на Министерството за финансии за подобрување на општинските услуги – МСИП, со поддршка од Светска банка.

На средбата се дискутираше и за Проектот за модернизација на земјоделството во износ од 50 милиони евра, од кои 46 милиони се заем од Светска банка, а 4 милиони се грант од ЕУ, чија реализација зависи од усвојувањето на Законот за задолжување којшто исто така е во собраниска процедура. Меѓу другото, средбата беше оценета како исклучително важна и од аспект на дискусиите за владините приоритети на среден рок и можностите за нивно кофинансирање.

Османи ги собра шефовите на Амбасадите и Конзуларните претставништва за претстојниот попис

​Министерот за надворешни работи, Бујар Османи, денеска одржа вонреден работен состанок со сите шефови на дипломатско-конзуларните претставништва, со цел подготовка за спроведување на активностите во нивните надлежности поврзани со претстојниот попис.

На состанокот присуствуваа и Директорот и заменикот директор на Државниот завод за статистика, Апостол Симевски и Иљми Селами.

Османи информираше за законските надлежности на Министерството за надворешни работи посочувајќи на активната улога во спроведување на пописот на лицата упатени на служба во ДКП-та, како и обврската на дипломатската мрежа за поддршка на Заводот за статистика за информирање во врска со процесот на дијаспората.

"Од 1 март започнува оваа важна статистичка операција, токму со вас како дипломати и за вашите семејства; дополнително, истата процедура ќе треба да се примени и за лицата кои престојуваат во странство по која било основа. Во следните 50 дена ова треба да претставува врвен приоритет на работата на дипломатската мрежа, со цел да им обезбедиме соодветни услови на пописните органи да ја завршат оваа обврска", истакна Османи.

"Жалам што донесувањето на Законот доцнеше од неоправдани причини, што како институции нѐ доведе во состојба со забрзано темпо да се подготвуваме за квалитетно да ги пресретнеме обврските, но барам од вас, и очекувам, преку вонреден капацитет од страна на дипломатската мрежа, да ги надминеме овие предизвици и да им обезбедиме поддршка на пописните органи", посочи Османи.

Османи потсети и на новата реорганизација на Владата, каде што исклучителна надлежност за прашања поврзани со дијаспората, се префрли во рамките на надлежностите на МНР. Во таа насока Министерството за надворешни работи, ги прошири организациските капацитети на Министерството, преку креирање на дополнителна организациона единица за дијаспората, која ќе биде надлежна за сите прашања поврзани со нашите државјани во странство.

"Пописот е добар пример преку нашата проактивна улога да демонстрираме одговорност и посветеност кон дијаспората, која има важна улога во севкупните процеси на земјава. Важно е да создадеме трајни услови за соработка, за брза комуникација и блискост, остварувајќи ја со тоа клучната цел – дијаспората да биде нераскинлив дел од земјава", – потенцираше Османи.

Лицата кои имаат место на живеење во Република Македонија, а за време на спроведувањето на Пописот се на служба во дипломатско-конзуларните претставништва на Република Македонија во странство како и членовите на нивните семејства кои со нив престојуваат во странство ќе се спроведе, во периодот од 01 март до 15 март 2021 година, додека самопопишувањето/саморегистрацијата на нерезидентното население, но и сите други државјани кои по било кој основ престојуваат во странство ќе започне од 01 март и ќе трае до 21 април, 2021 година.

Жителите на Ѓорче Петров утре на протест против новиот ДУП

Ѓорчевци утре на протест. Од Иницијативата против урбано дивеење гневни дека за нив спорниот ДУП со кој се предвидуваа да никнат повеќе високатници, поминал на Седница на Општината.

Утрешниот протест го карактеризираа како знак дека нема да отстапат од борбата со урбаната мафија.

„Остануваме на нашите барања, немаме слух од институциите, така што одлучивме да направиме еден мирен протест, се со цел да ни се приклучат и сите граѓани кои што се засегнати со овој проблем со урбаното дивеење и со узурпирањето на Ѓорче Петров, со урбаниот хаос кој се случува. “ изјави Горан Костов, Иницијатива против урбано дивеење

Од Општината децидни дека промена во ДУП-от нема да има, бидејќи станувало збор за истиот од 2014тата година, но сега разработен, и воедно запазени сите закони. За градоначалникот на Ѓорче, Александар Наумоски пак утрешниот протест е чисто политиканство.

„Мора јадрото на Ѓорче да има некаков развој. Дадовме ние одредена висина на одредени места, на други места се намали, меѓутоа се заштити паркот, се зголеми функционалноста како на зеленилото, така и на јавните површини. Замислете некој што го донел претходно истиот ДУП, со иста бруто развиена површина, кој не ги средил имотно-правните во дел на сопственост, ние тоа го поправаме, и сега истите тие да се бунат. Тоа нема логика што го прават. Тоа е гола политика.“ изјавив Александар Наумоски, градоначалник на Општина Ѓорче Петров.

Од Иницијативата велат дека се уште чекаат одговор за средба од министерот за транспорт Бочварски од кого бараат да не ги одобрува ДУП-овите кои доаѓаат од Општината. Утре на пладне од Иницијативата ќе го блокираат сообраќајот кај кружниот тек пред црквата Св. Петар и Павле.

притисни ентер