Алкалоид со консолидирани продажби од 85,1 милиони евра, инвестиции од 7,9 милиони евра и 28 нови вработувања - Канал 5

Македонија

Алкалоид со консолидирани продажби од 85,1 милиони евра, инвестиции од 7,9 милиони евра и 28 нови вработувања

Алкалоид со консолидирани продажби од 85,1 милиони евра, инвестиции од 7,9 милиони евра и 28 нови вработувања во земјата во периодот јануари – март 2026 г.

Алкалоид со консолидирани продажби од 85,1 милиони евра, инвестиции од 7,9 милиони евра и 28 нови вработувања

Според единечниот биланс на успех, во периодот јануари – март 2026 година продажбите достигнуваат 3.660.848.825 денари, што е за 6 % повеќе во споредба со истиот период од минатата година. Вкупните консолидирани продажби, пак, достигнуваат 5.247.063.071 денари, што е за 1 % повеќе во споредба со истиот период од минатата година.

Продажби според региони

Консолидираните продажби остварени на домашниот пазар се зголемени за 18 % во споредба со минатата година. Како докажан партнер на јавното здравство, компанијата активно учествува во обезбедувањето на најсовремени ретки и специфични терапии преку застапување на производите на светски реномирани фармацевтски производители, обезбедувајќи значајна поддршка за здравствениот систем во земјава. Иако профитабилноста на овие програми е ограничена, тие значително го зголемуваат учеството на домашниот пазар во вкупните консолидирани продажби. Од вкупните консолидирани продажби 37 % се остварени на домашниот пазар, додека, пак, 63 % се остварени на странските пазари. Гледано според региони, во земјите од Југоисточна Европа се остварени 29 %, во земјите од Источна Европа (ЗНД, УКР…) се остварени 20 %, во земјите од Западна Европа (ЕУ и ЕФТА) се остварени 13 %, а на другите пазари е остварен 1 % од вкупните консолидирани продажби.

Најголем пораст кај извозните пазари, во споредба со минатата година, бележат продажбите остварени во Казахстан, каде што се зголемени 20-пати, потоа во Велика Британија, каде што се зголемени 2,4-пати, како и во Чешка каде што продажбите се зголемени 2,3 пати. Потоа следуваат оние во Грузија (раст од 95%), Косово (раст од 39 %), во Грција (раст од 38 %), Полска (раст од 34 %), итн.

Продажби според групи производи

Гледано според групи производи, во структурата на вкупните консолидирани продажби најголемо учество заземаат производите од сегментот фармација, и тоа 93 %. Од нив поголем удел имаат антибиотиците со 21 %, препаратите ОТЦ со 19 %, невролошките препарати со 13 %, кардиолошките препарати со 11 % од вкупните консолидирани продажби итн. Сегментот хемија, козметика и билкарство учествува со 7 % во вкупните консолидирани продажби, поточно хемија учествува со 2 %, козметика со 4 %, а билкарство учествува со 1 %.

Инвестиции

Вкупните инвестиции во основни средства во периодот јануари – март 2026 година изнесуваат 486.313 илјади денари, што претставува раст од 89% во однос на истиот период од претходната година. Речиси половина од вкупните инвестиции се однесуваат на вложувања реализирани преку поврзаното друштво АЛКАЛОИД ЕНЕРГЕТИКА ДООЕЛ, насочени кон изградба и развој на фотоволтаични капацитети за производство на електрична енергија од обновливи извори.

Резултати од работењето

Единечната добивка пред финансиските трошоци, даноците и пред амортизацијата (ЕБИТДА), која изнесува 837.272.265 денари, бележи зголемување од околу 12 %, додека, пак, единечната нето-добивка изнесува 475.481.780 денари и е зголемена за 17 %.

Консолидираната добивка пред финансиските трошоци, даноците и пред амортизацијата (ЕБИТДА) достигна 993.129.751 денари и бележи раст од 7 %, додека, пак, консолидираната нето-добивка во износ од 515.611.777 денари е зголемена за 5 %.

Вработени

Во периодот јануари – март 2026 година во АЛКАЛОИД АД Скопје се реализирани 28 нови вработувања во РС Македонија. Со одлука на Управниот одбор на АЛКАЛОИД АД Скопје, во февруари 2026 година е одобрен и исплатен регрес во висина од 47.000 денари нето-износ за користење годишен одмор за вработените во компанијата. Групацијата АЛКАЛОИД брои 3.027 вработени, од кои 2.223 се во земјава, а 804 се вработени во капитално поврзаните друштва во странство.

Податоци за акциите

Акциите на АЛКАЛОИД АД Скопје котираат на официјалниот пазар на Македонската берза за хартии од вредност од 2002 година и важат за едни од најтргуваните и најликвидните акции на Берзата. Цената на акцијата во периодот јануари – март 2026 година се движеше од 24.700,00 до 27.300,00 денари или просечно 25.249,85 денари за една акција. На 31.03.2026 година акциите на АЛКАЛОИД АД Скопје беа во сопственост на 6.532 акционери, физички и правни лица, a пазарната капитализација на компанијата изнесуваше 36 милијарди денари.

На 30 март 2026 година, на Годишното собрание на акционерите, е одобрена пресметка и исплата на бруто-дивиденда за 2025 година во износ од 1.030.574 илјади денари. Во согласност со дивидендниот календар, во мај 2026 година ќе започне исплатата на дивидендата во износ од 720 денари бруто, односно 648 денари нето за една акција. Дивидендата од акција за 2025 година е поголема за 14,3 % во однос на исплатената дивиденда од акција за 2024 година.

Бизнис-план за 2026 година

Бизнис-планот за 2026 година, донесен со одлука на Управниот одбор на АЛКАЛОИД АД Скопје на седницата одржана на 29.12.2025 година, предвидува инвестирање на околу 8 % од консолидираните приходи од продажби во материјални и во нематеријални средства, раст од 7 % на консолидираните продажби во однос на реализираните во 2025 година, како и раст од 7 % на консолидираниот профит во однос на 2025 година.

Остварените резултати во првиот квартал од 2026 година се во согласност со планираната динамика на реализација на бизнис-планот. Во наредниот период се очекува кумулативните пласмани на домашниот и на странските пазари да ги надминат минатогодишните остварувања.

Бизнис-планот за 2026 година е базиран на очекувањата, проекциите и на можностите на тековните и на новите пазари и производи достапни за компанијата во моментот на изготвување на планот. Околностите и настаните во 2026 година, а со тоа и остварените резултати може да варираат во однос на прикажаните во Бизнис-планот.

Очекувања за претстојниот период

Трендот на работење во отежнати економски услови, кои беа актуелни во изминатите неколку години, продолжува и во 2026 година. Доминанти предизвици беа инфлацијата и порастот на каматните стапки, а неизвесноста и натаму останува изразена. Друштвото е изложено на каматен ризик главно по основ на краткорочните и долгорочните кредити, при што истиот континуирано се следи и се управува преку директни преговори со банките, без значајни осцилации кај каматните стапки.

Воедно, глобалните безбедносни кризи, вклучително и ескалацијата на конфликтот поврзан со Иран, дополнително го отежнуваат економскиот амбиент и предвидливоста. Овие случувања имаат значително влијание врз глобалните енергетски пазари, предизвикувајќи пораст и зголемена волатилност на цените на енергенсите, што создава дополнителни инфлаторни притисоци и тешкотии во синџирите на испорака, како и ризици во однос на достапноста на одредени суровини и материјали. Дополнително, потенцијалниот ризик од продлабочување на глобалните трговски тензии може да предизвика нови покачувања на цените на суровините и да доведе до зголемени трошоци во работењето. Внимателно го следиме развојот на настаните и преземаме соодветни мерки за ублажување на овие потенцијални ефекти.

Очекуваме во 2026 година да продолжиме по патеката на континуираниот раст базиран на можностите од нашите тековни инвестиции во нови производствени капацитети и опрема и од вложувањата во развојно-истражувачки проекти, на тој начин создавајќи конкурентно портфолио и можности за ширење на пазарите. За остварување на овие цели ќе продолжиме и со нови вработувања во земјава, но и на странските пазари, притоа континуирано вложувајќи во подигнувањето и во усовршувањето на нивото на знаења и на вештини на нашите вработени и во градењето таленти.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Економија

РКЕ денеска со нова пресметка за цените на горивата

Денеска Регулаторната комисија за енергетика ги прави новите пресметки за цената на горивата, откако нафтата на светските берзи драстично поскапе.

РКЕ денеска со нова пресметка за цените на горивата

Од друга страна, премиерот Христијан Мицкоски завчера истакна дека очекува зголемување на цената на горивата со оглед на ситуацијата на Блискиот исток, но најави и намалување на акцизите и кај дизелот и кај безоловните горива.

- Немаме правено калкулација за покачувањата, но ќе има секако бидејќи нафтата и бензините драматично пораснаа изминатава недела, а и курсот на доларот е малку посилен во споредба со претходната недела. Како Влада ја продолживме кризната состојба уште три месеци, цените се такви што сигурно ќе имаме намалување на акцизите и кај дизелот и кај безоловните горива, изјави Мицкоски.

Инаку, според последната одлука на Регулаторната комисија за енергетика (РКЕ), ова се актуелните максимални малопродажни цени на нафтените деривати во Македонија:

Гориво

Актуелна цена (по литар/килограм)

ЕУРОСУПЕР БС - 95

87,00 денари / литар

ЕУРОСУПЕР БС - 98

89,00 денари / литар

ЕУРОДИЗЕЛ БС (Д-Е V)

88,00 денари / литар

Екстра лесно масло (ЕЛ-1)

86,00 денари / литар

Мазут М-1 НС

42,168 денари / килограм

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Хороскоп

Дневен хороскоп за 20. јули 2026 година

Дневен хороскоп за понеделник, 20. јули 2026 година. 

Дневен хороскоп за 20. јули 2026 година

Рак 22.6-22.7.

Љубов

Ќе одработите уште некои работи од минатото , за да можете посмело да тргнете натаму. Нема да ви биде лесно , но ќе бидете доследни.

Кариера

Ќе ви обрнат внимание и ќе може да си го изразите своето мислење. Вашите идеи ќе бидат разгледувани , но за нив ќе нема мислење.

Здравје и совет

Премногу се грижите.

Лав 23.7-22.8.

Љубов

Денеска малку ќе ве измачуваат стари мечти и неисполнети надежи , па затоа најдобро е да се повлечете и смирите. Не инсистирајте на ништо.

Кариера

Иако ќе работите посветено и без застој , денеска ќе ви изгледа како да работите недоволно.

Здравје и совет

Поработете на вашето трпение.

Девица 23.8.-23.9.

Љубов

Ако се чувствувате осамено , побарајте друштво на пријателите. Тие ќе бидат вистибнски мелем за вас.

Кариера

Конечно ќе ви стане јасно дека она што го работите вреди повеќе отколку што мислевте . Со тоа сознание полесно ќе работите.

Здравје и совет

Бидете искрени кон сите.

Вага 24.9.-23.10

Љубов

Пред вас е убав ден за дружење , било да се решите за излегување со саканата личност , било да се прошетате и се напиете кафе со познаници.

Кариера

Денеска лесно ќе излегувате на крај со обврските доколку работите со колеги , но ако сте сами на работното место , ќе ви недостига некој за да поразговарате.

Здравје и совет

Радувајте се на она што е добро.

Шкорпија 24.10-22.11.

Љубов

Можно е решение на некој семеен проблем , што долго ве измачуваше. Веројатно ќе најдете заеднички јазик.

Кариера

Успешно ќе завршите една деловна фаза и ќе свртите нов лист.Ќе биде тоа чекор напред за вас.

Здравје и совет

Не се сомневајте ,туку работете.

Стрелец 23.11.-21.12.

Љубов

Денеска е ден кога во љубовните теми ќе помешате скромност со високи идеали. Резултатот ќе биде збунетост на другата страна.

Кариера

Соработниците ќе ве подржат и ќе ви изразат симпатии , но кога станува збор за стручноста , никој нема да ви прогледа низ прсти.

Здравје и совет

Сѐ е во ред.

Јарец 22.12.-20.1.

Љубов

Вашиот љубовен шоу ќе продолжи со поврзување со личност од надвор. Некои ќе добијат љубовен меил или порака од странство.

Кариера

Својата стручна способност денеска ќе ја надувате до крајни граници , но никој нема да ви замери , зашто ќе бидете уверливи.

Здравје и совет

Почнете да спортувате.

Водолија 21.1.-19.2.

Љубов

Ќе имате вистински баланс за уживање и љубов , апосебно во конкретни ситуации.Оние во врска ќе бидат многу задоволни.

Кариера

Денеска исправно ќе се поставите , зашто ќе знаете да ги испочитувате не само строгите правила, туку и човечките потреби.

Здравје и совет

Мала главоболка.

Риби 20.2.- 20.3.

Љубов

Мал чекор ве дели до помирување и поквалитетни односи , но потребно е само малку трпение.

Кариера

Веројатно ќе добиете добар договор за спонзорирање на еден проект за што се сомневавте.

Здравје и совет

Имајте малку повеќе верба.

Овен 21.3-20.4.

Љубов

Преодна несигурност би можела да биде поврзана со погрешно изразување или недоразбирање. Не навлегувајте во расправија.

Кариера

Вашите претпоставени денеска ќе бидат полни со елан и нови планови за развој на работата , а вие ќе имате помалку енергија. Издржете.

Здравје и совет

Одете чекор по чекор.

Бик 21.4- 20.5.

Љубов

Ако имате лични проблеми , прифатете еден неврзан повик на кафе , зашто така ќе си ја олесните душата.

Кариера

Можеби ќе ви предложат да одите на кусо деловно патување за да ја согледате состојбата и да донесете нови информации од терен.

Здравје и совет

Средете го ритамот на работата и одморот.

Близнаци 21.5.-21.6.

Љубов

За некои овој ден ќе биде за паметење , а особено вториот дел.Оние кои бараат сродна душа , секако треба да излезат.

Кариера

Ќе биде одлично , координирани и со вистинско чувство за секоја задача. За вас денеска нема препреки.

Здравје и совет

Уживајте во секој момент.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Пет мали навики кои значително може да го зголемат чувството на среќа во секојдневниот живот

Одржувањето на добро расположение и чувството на среќа во секојдневниот живот може да биде предизвик, особено во време на стрес и неизвесност.

Пет мали навики кои значително може да го зголемат чувството на среќа во секојдневниот живот

Одржувањето на добро расположение и чувството на среќа во секојдневниот живот може да биде предизвик, особено во време на стрес и неизвесност. Иако повеќето луѓе веќе се грижат за своето физичко здравје и ментална благосостојба, една подеднакво важна компонента често се занемарува - чувството на внатрешна, или духовна, рамнотежа.

Психолозите истакнуваат дека малите, секојдневни навики можат да имаат моќен ефект врз субјективното чувство на среќа и задоволство од животот. Подолу, ви споделуваме пет едноставни ритуали кои, според нивните тврдења, можат значително да го зголемат вашето ниво на среќа.

1. Направете едно мало добро дело - дури и ако никој никогаш не дознае

Практикувањето љубезност и сочувство се смета за една од најважните духовни навики што придонесува за чувството на среќа. Кога правиме добри дела или покажуваме емпатија, во мозокот се ослободува ендорфин, што доведува до природно подобрување на расположението.

Покрај хемискиот ефект врз мозокот, ова однесување ги зајакнува и социјалните врски и поттикнува чувството на припадност и заедништво, што е клучно за емоционалното здравје.

2. Кажете „Те сакам“ без очекувања – дури и преку мислите

Една од препораките на духовните практичари вклучува испраќање мисли со љубов и прифаќање секојдневно, без да очекувате нешто за возврат. Оваа практика може да се примени во ситуации кои не можеме да ги контролираме, а нејзината цел е да го намали внатрешниот отпор и негативните емоционални реакции.

3. Направете нешто што ја крева вашата енергија и прави да се чувствувате полесно

Станува збор за свесно избирање активности што го подобруваат нашето расположение и енергија.

Според овој пристап, корисно е да застанете за момент, да ги затворите очите, длабоко да вдишете и да побарате внатрешна или духовна поддршка, а вашето внимание да го насочите на синхроницитети, знаци и мали животни насоки кои често поминуваат незабележано.

4. Визуелизирајте ја вашата најсреќна верзија

Визуелизацијата е ментална практика што помага да создадете чувство на задоволство и насоченост кон целта. Вклучува замислување на посакуваните резултати и нивно поврзување со позитивните емоции што би ги чувствувале кога ќе би ги постигнале - без разлика дали станува збор за успешно интервју за работа, спортски резултат или чувство на внатрешен мир.

Оваа техника не бара многу време - само неколку минути на ден се доволни.

5. Ослободете се од она што не можете да го контролирате

Способноста да се ослободиме од ситуации што се надвор од наша контрола се смета за важен фактор во психолошката благосостојба. Кога ќе престанеме да се обидуваме да ги контролираме сите исходи, се ослободува ментален простор што може да се фокусира на конструктивни промени и личен развој.

– Овој пристап придонесува за поголемо чувство на мир, присуство во сегашниот момент и емоционална стабилност. На крајот, целта е да се одржи отвореност, сочувство и внатрешен мир, без да се изгубат сопствените граници и идентитет – вели Блер Никол, психолог и терапевт.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер