Тие станаа клучен начин за одржување контакт со пријателите и семејството, но постојаниот проток на објави на кои сме секојдневно се изложени, може значително да влијае на нашето здравје, расположение и самодовербата.

Содржината што ја гледаме на нашите профили, особено на почетокот на денот, може да одреди како се чувствуваме, дали ќе бидеме фокусирани или расеани во постигнувањето на нашите цели. Научните истражувања сè повеќе потврдуваат дека она што го следиме на социјалните медиуми има мерливи ефекти врз нашите животи. Некои од ефектите вклучуваат:

1. Социјалните медиуми можат да го зголемат вашиот апетит

Гледањето фотографии со храна може да го активира центарот за награда во мозокот, што го стимулира чувството за глад дури и ако штотуку сте јаделе. Едно истражување покажало дека гледањето слики со храна после оброк може да предизвика желба за храна. Слично на тоа, една студија од 2009 година покажала дека рекламите за храна на телевизија можат да поттикнат несвесно грицкање.

Во експериментите, децата консумирале 45% повеќе храна по гледањето вакви реклами, додека возрасните јаделе повеќе и здрави и нездрави грицки. Интересно е што рекламите, исто така, поттикнуваа консумирање на производи што не биле прикажани во нив, а овој ефект не бил поврзан со пријавено чувство на глад.

2. Социјалните медиуми го зголемуваат притисокот од врсниците

Студија од 2025 година покажува колку туѓите мислења можат да ни влијаат. Таа вклучувала 600 учесници кои избирале кое од понудените бебиња е послатко. Која било фотографија да ја избрале, систем сличен на оној на социјалните медиуми би ја прикажал како помалку популарна.

После тоа, на учесниците им била дадена можност да го променат својот избор, тоа го направиле речиси 22% од нив. Ако одобрувањето од околината е толку важно за навидум неважна тема, како што се фотографиите со бебиња, можете да замислите колку сме подложни на влијанието кога сме бомбардирани со слики од нездрава храна или навики кои ги следат стотици или илјадници „лајкови“.

3. Социјалните медиуми можат да го променат вашиот мозок

Содржината што ја гледаме на социјалните мрежи влијае на нашата потсвест преку процес познат како „прајминг“ или предактивација. Ова е несвесна форма на меморија каде што изложувањето на еден стимул влијае на нашиот одговор на следниот стимул.

На пример, лице кое го гледа зборот „жолто“, побрзо ќе го препознае зборот „банана“ бидејќи двата поими се тесно поврзани во меморијата. Ако вашиот „ѕид“ на социјалните мрежи е исполнет со нездрава храна, негативни објави или загрижувачки вести, овие теми ќе ви го окупираат умот. Вашиот мозок ќе се фокусира на она што неодамна сте го виделе и тие информации ќе го обликуваат вашето однесување и размислување.

4. Социјалните медиуми можат да влијаат на вашето расположение

Истражувањата потврдија дека содржината на социјалните медиуми влијае на нашето расположение, и позитивно и негативно. Една од најчестите негативни емоции поврзани со користењето на социјалните медиуми е зависта. Истражувачката Хана Краснова од Универзитетот Хумболт во Берлин спроведе студија која откри дека една од три личности се чувствува полошо по „прелистувањето“ на социјалните медиуми.

Оние кои пасивно ги прегледувале содржините без интеракција биле најпогодени. „Бевме изненадени од тоа колку многу луѓе имаат негативни искуства со социјалните медиуми, при што зависта ги остава да се чувствуваат осамено, фрустрирано или луто“, изјавила Краснова. Фотографиите од одмор се покажале како најголем извор на завист, а голем удар за егото претставувало бројот на желби за роденден, „лајкови“ и коментари со другите лица.

5. Социјалните мрежи влијаат на вашата среќа

Содржината што ја гледате и читате на социјалните медиуми може директно да влијае на вашето ниво на среќа. Истражувањата ја потврдуваат заразната природа на емоциите: изложувањето на негативни емоции раѓа негативност, додека изложувањето на среќа раѓа среќа. Откриено е дека кај корисниците кои виделе зборови како „среќен“ или „возбуден“ на нивниот „фид“, поголема била веројатноста самите да објават нешто позитивно.

Ова, исто така, влијае на нивното здравје. Тешко е да се чувствувате мотивирани да вежбате и да се храните здраво ако се чувствувате депресивно. Во таквите моменти, луѓето почесто се свртуваат кон храната како утеха.

Како да преземе контрола?

Важно е да се опкружите со луѓе кои ги делат вашите цели и вредности, и кои прават да се чувствувате добро, а ова важи и за онлајн светот. Ако во реалниот живот сте се оддалечиле од лицата кои постојано шират негативност, зошто на такви би им дозволувале да влијаат врз вашиот ум преку социјалните мрежи? Ако забележите дека се чувствувате лошо откако ќе го прелистате вашиот „фид“, можеби е време да престанете да следите одредени профили.

Пронајдете дружба надвор од мрежата

Ако поголемиот дел од вашата социјална интеракција се одвива онлајн, ризикувате постојано да бидете изложени на објави за исполнет социјален живот на другите луѓе додека седите дома. Ова може негативно да влијае на вашата самодоверба. Побарајте локални собири и курсеви според вашите интереси, без разлика дали станува збор за готвење, сликање или спорт. Тоа е одличен начин да запознаете нови луѓе со слични склоности и да почнете да создавате сопствени спомени наместо да ги разгледувате туѓите.

Направете дигитален детокс

Обидете се да поминете викенд без екран, дајте му свеж воздух на вашиот мозок. Излезете во природа, читајте книга во парк или поканете пријатели на вечера. Според истражувањата, дигиталниот детокс ја зголемува менталната јасност, ја подобрува концентрацијата и го поттикнува здравиот сон. Ќе бидете изненадени колку време ќе имате да уживате во реалниот живот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.