Македонија

АЕТМ: Над 530 милиони евра онлајн трансакции во првата половина од 2026 година – раст од 14,1%

Во првите шест месеци од 2026 година реализирани се онлајн трансакции во вредност од над 530 милиони евра, што претставува раст од 14,1% во однос на истиот период лани.

Кон македонските е-трговци реализирани се трансакции во вредност од 302,4 милиони евра, со раст од 14,9%.

Македонците потрошиле 227,9 милиони евра онлајн кон странски е-трговци, односно 13,3% повеќе од лани.

Бројот на онлајн трансакции достигна 15,3 милиони, со раст од 10,1%.

Вредност на реализирани трансакции

Асоцијацијата за е-трговија ги анализираше најновите објавени податоци за трансакции на места на продажба за е-трговија на Народната банка на Република Македонија, согласно кои може да се забележи дека во првата половина од 2026 година вредноста на вкупните трансакции направени кон е-продажни места од Македонци дома и во странство, како и од иматели на странски картички изнесува 32,611.2 милиони денари или 530,3 милиони евра, што преставува пораст од 14.1% во однос на истиот период минатата година.

Кон македонските е-трговци биле направени онлајн трансакции во вредност од 18,597.6 милиони денари или 302.4 милиони евра од домашни и странски иматели на платежни картички, односно остварен е пораст од 14.9%. Од оваа вредност, македонските иматели на платежни картички кон домашните е-трговци реализирале 16,694.5 милиони денари или околу 271,5 милиони евра, со раст од 13,9%. Истовремено, имателите на странски платежни картички кон македонските е-трговци реализирале 1,903.9 милиони денари или околу 30,9 милиони евра, што претставува раст од 23,8% во однос на истиот период лани.

Од друга страна, македонските иматели на платежни картички кон странските е-трговци реализирале онлајн трансакции во вредност од 14,013.7 милиони денари или околу 227,9 милиони евра, односно 13,3% повеќе во споредба со првата половина од 2025 година.

Број на реализирани онлајн трансакции

Вкупната вредност на онлајн трансакции е остварена со направени 15.3 милиони трансакции што преставува пораст од 10.1% во однос на истиот период минатата година. Најголем број трансакции се реализирани со македонски платежни картички кон домашните е-трговци – околу 8 милиони трансакции, со раст од 12,3% во однос на истиот период минатата година. Кон странските е-трговци, македонските иматели на платежни картички реализирале 6,45 милиони трансакции, што претставува раст од 5,7% во однос на истиот период минатата година. Истовремено, бројот на трансакции реализирани со странски платежни картички кон македонските е-трговци достигнал над 904 илјади, со раст од 26,7%.

- „Податоците за првата половина од 2026 година покажуваат дека е-трговијата продолжува да расте, но со поумерена динамика во споредба со силниот скок од 34% што го видовме минатата година. Вкупната вредност на онлајн трансакциите надмина половина милијарда евра за само шест месеци, што е значаен показател за сè поголемата улога на дигиталните канали во потрошувачката. Особено позитивно е што раст бележат и домашните е-трговци, кон кои вредноста на трансакциите е зголемена за речиси 15%. Истовремено, кај купувањата од странство гледаме интересна промена. По експлозивниот раст на бројот на трансакции минатата година, кој во голема мера го поврзувавме со појавата на платформите како Temu, во 2026 година динамиката се стабилизира, додека просечната вредност на трансакцијата повторно расте. Овие трендови отвораат едно важно прашање за понатамошниот развој на пазарот: не само колку ќе расте онлајн потрошувачката, туку и колкав дел од неа ќе успеат да привлечат домашните е-трговци. Токму затоа, зајакнувањето на нивната конкурентност, подобрувањето на корисничкото искуство, логистиката и дигиталните плаќања остануваат клучни за понатамошниот развој на е-трговијата“, вели претседателката на АЕТСМ, д-р Нина Ангеловска Станков.

Просечна вредност на трансакција

Просечната вредност на онлајн трансакција во првата половина од 2026 година изнесува околу 34,6 евра, што претставува раст од приближно 3,7% во однос на истиот период минатата година. Интересна промена се забележува кај трансакциите реализирани од македонските иматели на платежни картички кон странските е-трговци. За разлика од минатата година, кога бројот на трансакции растеше значително побрзо од нивната вредност, во првата половина од 2026 година вредноста расте побрзо од бројот на трансакции. Како резултат на тоа, просечната вредност на трансакција кон странските е-трговци се зголемила за околу 7,2% и достигнала приближно 35,3 евра.

Овој тренд укажува на промена во структурата на прекуграничните онлајн трансакции: по периодот на интензивен раст на бројот на нарачки со пониска вредност, сега се забележува зголемување на просечниот износ по трансакција.

Нови отворени е-продавници

Според податоците на Народната банка, заклучно со јуни 2026 година регистрирани се 2.408 места на продажба за е-трговија, наспроти 2.240 на крајот на 2025 година. Ова претставува нето зголемување од 168 е-продажни места во првите шест месеци од 2026 година, што укажува на продолжен развој на инфраструктурата за онлајн продажба и прифаќање картични плаќања.

Во рамки на својата мисија за унапредување на е-трговијата, Асоцијацијата за е-трговија не само редовно што ги анализира податоците од Народната банка, туку и континуирано работи на едукација и поддршка на новите и постоечките е-трговци. Токму во таа насока, АЕТМ ја организира Годишната регионална конференција за е-трговија, која оваа година ќе се одржи по девети пат, на 3 ноември во Националната опера и Балет во Скопје. Конференцијата е препознаена како најголем регионален настан од оваа област и претставува уникатна платформа за споделување знаење, запознавање со најновите трендови и можности за вмрежување на компании, институции и професионалци од целиот регион. Повеќе информации за агендата, говорниците и билетите се достапни на официјалната веб-страница: www.ecommerceconference.mk.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Дали се наѕира крајот на решавањето на проблемот со полагањето на Правосудниот испит на албански јазик?

Министерот за правда Јетон Шасивари ги повика на консултативно-информативна средба студентите и деканите на правните факултети за да им го презентира законското решение за начинот на полагање на правосудниот испит.

Пред почетокот на средбата, Шасивари одржа прес конференција, но без да соопшти детали што предвидува предлогот.

Во министерството за правда е Михајло Видимлиски.

Михајло, има ли епилог од средбата и кога предлогот ќе биде јавно објавен?

Во видеото погледнете го целиот извештај.

Македонија

Дизелот поскапува за 2 денари, цените на бензините се намалуваат за 2,5 денари

Дизелот поскапува за 2 денари, а бензините поевтинуваат за 2,5 денари.

Според одлуката на РКЕ, од полноќ дизелот ќе се продава по 99 денари за литар, бензинот Еуросупер 95 за 96 денари, а Еуросуперот 98 за 98 денари за литар.

Во меѓувреме Собранието на денешната седница ја продолжи кризната состојба со снабдувањето со нафта и нафтени деривати до април 2027 година. Со тоа се отвара простор за продолжување на мерките за ублажување на ценовниот удар. На владина седница пак се очекува да биде продолжена мерката за намалено ДДВ кај дизелот од 18 на 10%, која истекува утре, но е пресметана во овонеделната одлука на РКЕ. Премиерот Христијан Мицкоски денеска изјави и дека во завршна фаза се преговори со ОКТА за дополнителен попуст од два денари по литар за дизелот. Тој уверува дека земјава има обезбедено доволни количини на гориво за до крајот на годинава, а очекува стабилно снабдување и во текот на следната година.

-Мислам дека сме блиску до постигнување решение за дополнителни 2 денари по литар да имаме, барем кај дизелот, намалување на цената. Продуктоводот или нафтоводот којшто нè поврзува, Солунското пристаниште со нашата рафинерија, е под притисок, е наполнет, така што доволни количини на гориво ќе има за македонските граѓани. И не само за македонските граѓани, бидејќи имаме најниска цена за горивата, граѓаните од соседните земји доаѓаат, полнат кај нас, со што двојно се зголеми конзумот на дизел, посебно во пограничните места,- Христијан Мицкоски – претседател на Влада.

На светските берзи, цената на нафтата во петокот се затвори на највисоко ниво од мај годинава, а новата недела започна со пад. Барел нафтата „Брент“ во петокот достигна цена од речиси 110 долари, додека денеска се тргува за околу 108 долари за барел. Падот следуваше по извршната наредба која ја потпиша американскиот претседател Доналд Трамп со која привремено ја одложи примената на дел од новите сакции и царини кон Русија, отварајки можност за поголем извоз на руски горива.

Македонија

Шасивари: До решение за правосудниот испит преку дијалог и аргументи

Министерството за правда отвори консултативен дијалог со правните факултети и студентите за предложените измени поврзани со полагањето на правосудниот испит.

Целта на средбата е преку отворен и конструктивен дијалог да се разгледаат предложените измени, да се слушнат ставовите на академската заедница и студентите и да се дојде до современо, правно издржано и европски ориентирано решение.

„Не сакаме законските решенија да се носат зад затворени врати, а студентите и факултетите да бидат ставени пред свршен чин. Сакаме процес во кој нивните забелешки, предлози и аргументи ќе имаат вистинска тежина“, истакна министерот Шасивари.

Тој нагласи дека прашањето за правосудниот испит треба да се разгледува пред сè како правно и институционално прашање, при што решенијата треба да се темелат врз стручни аргументи, меѓусебна почит и конструктивен дијалог.

„Нашата цел е да дојдеме до современо, правно издржано и европски ориентирано решение, кое ќе ги земе предвид потребите на сите студенти што го стекнуваат своето високо правно образование на различни јазици“, посочи Шасивари.

Предложените измени имаат за цел да воспостават рамнотежа меѓу почитувањето на правото на образование и можноста за користење на другиот јазик на кој кандидатот ги завршил правните студии, од една страна, и потребата од единствен, функционален и професионален правосуден систем, од друга страна.

Според министерот, целта е да се обезбедат порамноправни можности за кандидатите, без притоа да се отстапи од единствените професионални стандарди што се неопходни за вршење на правните функции.

„Измените немаат за цел создавање паралелни системи за полагање на правосудниот испит, туку воспоставување единствен модел во кој јазичната инклузивност и професионалните стандарди меѓусебно се надополнуваат“, нагласи министерот за правда.

Министерот за правда Јетон Шасивари истакна дека Владата има јасна определба за почитување и унапредување на јазичните права, при целосно почитување на Уставот, законите и професионалните стандарди.

Во насока на обезбедување дополнителна правна сигурност и усогласеност со европските стандарди, министерот најави дека ќе се побара мислење во краток рок од Венецијанската комисија, советодавното тело на Советот на Европа за уставно-правни прашања.

„Веруваме во аргументите врз кои го градиме предложениот модел и сме подготвени да ги разгледаме сите препораки што ќе произлезат од оваа постапка“, порача Шасивари.

Министерството за правда останува посветено на транспарентен и инклузивен процес, во кој сите засегнати страни ќе имаат можност да придонесат кон изнаоѓање правно одржливо решение, засновано врз дијалог, еднакви можности и почитување на европските правни стандарди, соопштуваат од МП.