360 : Чудна коинциденција - СЈО отвора истрага на 13 октомври, реклама на 1ТВ две недели подоцна - Канал 5

Македонија

360 : Чудна коинциденција - СЈО отвора истрага на 13 октомври, реклама на 1ТВ две недели подоцна

Порталот 360 степени денеска објавува детализ а чудната коинциденција меѓу почетокот на иастрагата на СЈО и објавувањето на реклама за гевгелиска фирма на 1ТВ , каде сопственик е еден од осомничените за случајот ,,Поштенска банка”.

360 : Чудна коинциденција - СЈО отвора истрага на 13 октомври, реклама на 1ТВ две недели подоцна

Истрагата за случајот „Поштенска банка“, за која обвинителката Лиле Стефанова во денешната изјава тврди дека нејзината шефица Катица Јанева барала да се затвори само со паричен надомест за државата и без затворски казни, се однесува на кривичното дело перење пари и други приноси. Меѓу осомничените е бизнисменот Томе Главчев – сопственик на „НОЕЛ Гевгелија“ и други фирми.

Две ипол недели по обелоденувањето на истрагата (13 октомври 2018 г.), за фирмата на Главчев осамна пи-ар текст на сајтот на телевизијата „1“ ,(29 октомври 2018 г.) во кој е прикажана како успешна македонска бизнис-приказна. Во пропагандниот текст, кој се уште е достапен на интернет-страницата, се вели и дека Главчев е исклучителен пример за успех во бизнисот и дека имал активна свест за општествена одговорност.

Во изминатите месеци на „1 тв“ редовно се емитуваше и реклама за „Ноел“ Гевгелија, позната по производство на кошули.

Во случајот „Поштенска банка“, судот по барање на СЈО го замрзна имотот на сите опфатени со истрагата, вклучително и имотот на Главчев и на неговите фирми, но со исклучок на еден стан. Незамрзнатиот стан на Главчев, како што објави порталот „А1 Он“, го купува екс-директорот на МЕПСО, Сашо Василевски, кој пак важи за близок до шефицата на СЈО Јанева. Василевски станот го купил на 30 октомври 2018, што е 17 дена подоцна од отворањето на истрагата „Поштенска банка“, каде осомничен е и сопственикот на фирмата Томе Главчев. Извори од СЈО за порталот кажале дека Јанева не побарале замрзнување и на тој стан со образложение дека наводно се работело за проблематичен објект.

Во февруари годинава, по предлог на Јанева, Судот одлучил да му го врати пасошот на осомничениот Томе Главчев и да го ослободи од обврската да се јавува еднаш неделно во судот. Во замена за укинување на ваквата мерка, Главчев поднел парична гаранција.

Случaјот „Поштенска банка“ денеска обвинителката од СЈО Лиле Стефанова го спомена меѓу двата за кои Јанева барала да се затворат со спогодби и без затворски казни.

„На 16 април 2019 година, во канцеларијата на Катица Јанева беше одржан состанок на кој таа изнесе одредени одлуки пред присутните обвинители, а кои се однесуваа на дејствија во предметите Империја и Поштенска банка. Конкретно, ни беше наложено, најкасно до 06 мај 2019 година, до неа да доставиме писмени извештаи за штетата во двата предмет кои осомничените траба да ја платат на државата, по што предметите „да бидат тука затворени“ и осомничените „да не одат во затвор“. Меѓутоа, јас и обвинителот Бурим Рустеми изготвивме писмени извештаи во кои покрај износите на штетата, ги наведовме и можните затворски казни согласно Кривичниот законик во случај на спогодување со јавниот обвинител“, се вели во писмената реакција на обвинителка Стефановаденеска, откако таа беше спомената во аудио разговор за рекетот во „Империја“., пишува порталот 360 степени.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Топлинските пумпи доживуваат огромен успех во Европа: Продажбата зголемена за повеќе од 10 проценти

Топлинските пумпи користат електрична енергија за пренос на топлина од надворешниот воздух, почвата или водата во зградите и се сметаат за клучна технологија за намалување на емисиите од греењето на домаќинствата.

Топлинските пумпи доживуваат огромен успех во Европа: Продажбата зголемена за повеќе од 10 проценти

Продажбата на топлински пумпи за домаќинствата во Европа значително порасна во првата половина на 2026 година, откако одредени земји ги намалија даноците на електрична енергија, додека растот на цените на нафтата и гасот дополнително го зголеми интересот на потрошувачите за алтернативни методи на греење.

Според податоците на Европската асоцијација за топлински пумпи (EHPA), во текот на првите шест месеци од оваа година се продадени приближно 1,16 милиони топлински пумпи во 12 европски земји, во споредба со 1,05 милиони во истиот период од 2025 година. Ова претставува зголемување од повеќе од десет проценти, пренесува „Гардијан“.

Фосилни горива

Растот на продажбата уследи по две години слаба побарувачка, експертите го припишуваат овој подем на промените во даночните политики во одредени земји и на програмите за субвенционирање, како и на растот на цените на фосилните горива предизвикан од војната во Иран.

Намалувањето на даноците и другите давачки за електрична енергија е клучно за економската исплатливост на топлинските пумпи, бидејќи високите трошоци за струја во однос на цените на гасот можат да ги намалат финансиските придобивки од преминот кон оваа технологија.

Како резултат на тоа, Европската унија има намера да ги поттикне земјите-членки да го намалат даночниот товар на електричната енергија под нивото што се применува за гасот – потег што се очекува дополнително да ја поттикне електрификацијата на греењето и да ја намали потрошувачката на фосилни горива.

Пренос на топлина

Топлинските пумпи користат електрична енергија за пренос на топлина од надворешниот воздух, почвата или водата во зградите и се сметаат за клучна технологија за намалување на емисиите од греењето на домаќинствата.

Најновите податоци укажуваат на закрепнување на европскиот пазар по падот на продажбата во последните години, кога неизвесноста во врска со владините стимулации, промените во енергетските политики и односот на цените меѓу гасот и електричната енергија го забавија нивното инсталирање.

Растот на цените на нафтата и гасот, поттикнат од конфликтот на Блискиот Исток оваа година, дополнително ја промени ситуацијата за европските домаќинства и го зголеми интересот за технологии што ја намалуваат зависноста од фосилни горива.

Извор: Аваз

Тагови: Европа топлински пумпи

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

„Атлантик“: Бајден спречил голема војна по конфликтот меѓу Израел и Иран во 2024 година

Поранешниот висок американски функционер Брет Мекгурк за магазинот „Атлантик“ раскажа како администрацијата на Џо Бајден се обидела да спречи голема, директна војна меѓу Израел и Иран во април 2024 година, по масовниот ирански ракетен напад.

„Атлантик“: Бајден спречил голема војна по конфликтот меѓу Израел и Иран во 2024 година

Мекгурк, клучна фигура за политиката кон Блискиот Исток во администрацијата на Бајден, истакнува дека ситуацијата ескалирала по израелскиот напад во Дамаск на 1 април 2024 година, во кој загинал високиот ирански командант Мохамед Реза Захеди. Потоа, Иран почнал да подготвува масовен напад врз Израел.

Бајден бесен на Нетанјаху

Во исто време, односите меѓу Бајден и израелскиот премиер Бенјамин Нетанјаху се влошувале поради војната во Газа и планираната операција во Рафах. Во март 2024 година, Бајден ја означил Рафах како „црвена линија“, иако подоцна им рекол на своите соработници дека мислел на начинот на кој се спроведува операцијата, а не на самата операција.

Тензиите дополнително пораснале по израелскиот напад во Газа во кој загинале седум хуманитарни работници од организацијата „World Central Kitchen“. Мекгурк опишува состанок во Овалната соба на кој видно бесниот Бајден ги прашал своите соработници што треба да му каже на Нетанјаху.

За време на нивниот последователен телефонски разговор, според Мекгурк, Бајден му рекол на Нетанјаху: „Биби, човеку, што по ѓаволите правиш? Дали мислиш дека јас сум Дедо Мраз? Во Израел нема Дедо Мраз, пријателе“. Исто така, му рекол дека може да ја прекине американската воена помош за Израел со еден потег. Нетанјаху одговорил дека Израел ќе се брани и без САД.

Иран лансираше стотици беспилотни летала и ракети

Иран го започна нападот на 13 април. Според Мекгурк, најпрво биле лансирани околу 200 беспилотни летала, по што следеле 30 крстосувачки ракети, а потоа и повеќе од 100 балистички ракети.

САД распоредија авиони, воени бродови и противракетни системи за да го одбранат Израел и ги координираа акциите со Израел и со други земји во регионот. Огромното мнозинство од ракетите и беспилотните летала беа пресретнати пред да ги погодат своите цели. Мекгурк опишува како Бајден и неговите соработници ги следеле брановите од ирански ракети од „Собата за кризи“ (Situation Room). Во еден момент било потврдено дека во воздух се наоѓаат повеќе од 100 балистички ракети, додека американските и израелските системи истовремено почнале да лансираат пресретнувачи.

„Тукушто му го спасив задникот“

Кога станало јасно дека нападот не предизвикал значителна штета, Бајден побарал да разговара со Нетанјаху. „Тукушто му го спасив задникот“, им рекол Бајден на своите соработници, според Мекгурк, додавајќи дека сака Израел да ја запре ескалацијата во таа точка.

Потоа Бајден му рекол на Нетанјаху да ја „прифати победата“ и дека секој евентуален израелски одговор мора да биде осмислен така што ќе го одврати Иран без да предизвика понатамошна ескалација. Нетанјаху не се согласил веднаш, но било одлучено американските и израелските тимови да продолжат со разговорите. Мекгурк тврди дека токму американската воена интервенција овозможила иранскиот напад да заврши без поголеми израелски жртви, а со тоа се намалил и притисокот врз Израел да започне голем контранапад. Текстот во „Атлантик“ е адаптиран според книгата на Мекгурк, „Brink: Inside the Race to Free the October 7th Hostages“.

Извор: Индекс.хр

Тагови: Бајден

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Трамп го прашал Си дали сака да купи американско оружје

Американскиот претседател Доналд Трамп го праша кинескиот претседател Си Џинпинг дали сака да купи оружје од Соединетите Држави, изјави американскиот амбасадор во Кина, Дејвид Пердју.

Трамп го прашал Си дали сака да купи американско оружје

Гостувајќи во емисијата „Fox News Sunday“, Пердју потврди дека Трамп ја покренал можноста за продажба на американско оружје на својот сè помоќен геополитички ривал. Таквата неочекувана продажба, доколку се реализира, би претставувала голема промена во повеќедецениската политика на САД кон Кина и Тајван и би му овозможила на потенцијалниот противник пристап до американска технологија.

Американскиот амбасадор смета дека Трамп се обидува да го намали значењето на долгогодишната продажба на американско оружје за Тајван – на што Пекинг со години се противи – претставувајќи ја таа продажба како само една од многуте што САД ги вршат ширум светот. Во тој контекст, Пердју рече дека Трамп дури и го прашал Си дали би бил заинтересиран за купување американско оружје.

Америка е најважниот сојузник и снабдувач со оружје на Тајван

Водителката Шенон Брим претходно ги спомена загриженостите изразени од републиканските и демократските пратеници во врска со одложените пакети помош и нарачките на оружје за Тајван, самоуправна демократија која се обидува да се одбрани од потенцијална кинеска инвазија. Брим праша дали САД го задржуваат оружјето наменето за Тајван за да му угодат на кинескиот претседател, кој минатата недела се сретна со Трамп.

Пердју ја отфрли таа можност, тврдејќи дека Трамп продал значително количество оружје на Тајван. Тој исто така додаде дека Трамп и Си сè уште разговараат за идните испораки на американско оружје за Тајван. „Но, претседателот Трамп постојано вели: 'Еј, ние продаваме оружје и на други луѓе ширум светот'. Во еден момент, тој всушност го праша претседателот Си дали би сакал да купи такво оружје“, истакна Пердју.

САД се обврзани според сопствените закони да му ги обезбедат на Тајван средствата неопходни за негова одбрана. Иако Вашингтон не го признава Тајван како држава, САД се најважниот неофицијален сојузник и снабдувач со оружје на Тајван. Сепак, неколку американски претседатели оставија нејасно дали САД би интервенирале воено за да го одбранат својот сојузник во случај на кинеска инвазија.

Кина: Секогаш сме ги зајакнувале одбранбените капацитети во зависност од потребите

Кина побара од Вашингтон да ја запре продажбата на оружје за Тајван – прашање што беше истакнато за време на мајскиот самит меѓу Трамп и Си во Пекинг. По таа средба, САД привремено ја суспендираа продажбата на рекорден пакет оружје вреден 14 милијарди долари, а Трамп ја опиша продажбата на оружје за Тајван како „многу добар преговарачки адут“ во односите со Кина.

За време на приватен разговор во Белата куќа минатата недела, Си побара од Трамп да се спротивстави на независноста на Тајван, објавија кинеските државни медиуми.

Портпаролот на кинеското Министерство за надворешни работи, Гуо Џиакун, не ги потврди наводите на Пердју кога беше прашан од новинарите. Сепак, тој изјави дека Кина отсекогаш ги зајакнувала своите одбранбени капацитети во согласност со своите потреби и дека е посветена на зачувување на светскиот мир и стабилност.

Извор: Индекс.хр

Тагови: Доналд Трамп Си Џинпинг

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер