Комбинацијата лимонов сок и маслиново масло е совршен додаток во секоја салата, но дали би ја испиеле одеднаш? Токму тоа го прават бројни „велнес“ ентузијасти на Tикток и Инстаграм, тврдејќи дека овој „магичен напиток“ обезбедува сјајна кожа, го забрзува варењето на храната и помага во детоксикација на телото.

Нутриционистите објаснуваат дека овие „здравствени шотови“ постојано излегуваат од мода – само помислете на трендот со јаболков оцет, ѓумбир или сок од алое вера. Но, дали постои научна основа дека пиењето чисто маслиново масло со лимон носи конкретни здравствени придобивки?

Чувари на срцето и крвните садови

Научно е докажано дека маслиновото масло е здраво. Тоа е основа на медитеранската исхрана, го намалува ризикот од срцев или мозочен удар за дури 25 проценти. Нутриционистката Мишел Рутенштајн за „Гардијан“ објаснува дека тајната лежи во мононезаситените масти, кои го намалуваат лошиот холестерол, но и во полифенолите, растителни антиоксиданси кои го намалуваат воспалението и оштетувањето на клетките.

Од друга страна, една лажица лимонов сок обезбедува само 6 проценти од препорачаната дневна доза на витамин Ц. Иако овие две состојки се хранливо богати, Рутенштајн предупредува дека со нивно пиење во комбинација, губиме клучна предност. Имено, маслиновото масло му помага на нашето тело да апсорбира здрави соединенија од зеленчук, како што се лутеинот од зелениот лиснат зеленчук или ликопенот од доматите. Таа советува „Многу е покорисно со овој напиток да се прелие добра салата“.

Сјајна кожа и подобро варење?

Кога станува збор за тврдењата дека овој напиток го чисти тенот и го решава проблемот со акните, дерматологот д-р Лорен Кол истакнува дека ова е најверојатно резултат на елиминирање на шеќерот и преработената храна од исхраната, а не на самото масло. За здрава кожа, таа советува да се користат докажани серуми со витамин Ц наместо да се пијат „здрави шотови“.

Сепак, кога станува збор за варењето, овој тренд до одреден степен држи вода. Докажано е дека маслиновото масло делува како природен лубрикант за дигестивниот систем и помага при запек, додека сокот од лимон може да го стимулира производството на желудочна киселина. Сепак, експертите предупредуваат дека луѓето склони кон киселини, како и оние со проблеми со жолчното кесе, треба да избегнуваат пиење на ваквата смеса бидејќи може да предизвика силна болка и непријатност.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.