Од коалиција, во една партија – четирите политички субјекти кои го сочинуваат ВРЕДИ, денеска и официјално стануваат еден политички субјект со двајца претседатели, Билал Касами од БЕСА и Изет Меџити од Демократско движење.. Позицијата генерален секретар на партијата се очекува да оди во рацете на претседателот на Алтернатива и министер за европски прашања – Беким Сали, кој порача дека процесот на зближување завршил успешно и дека сега, како еден политички субјект ќе се залагаат за влез на Македонија во ЕУ.

„Тоа беше еден процес на зближување на пет политички партии со останати неформални политички групации, и тој процес во последниве година и половина беше успешен, и како резултат на таа соработка внатрешна која ја имавме досега успеавме да ја консолидираме и да донесеме заедничка одлука да Вреди биде една политичка партија. Денеска е конгресот на ВРЕДИ, со симболика да, како што сме зближени, се спојуваме во една политичка партија, исто да бидеме како држава сите заедно ориентирани кон нашата интеграција во ЕУ.“

Обединувањето требало да се случи порано, според аналитирачите, кои одолговлеквуањето го припишуваат на жестоката внатрешна битка, пред се на Меџити и Касами за лидерските позиции. Политичкиот Аналитичар, Љуљзим Фаризи смета дека ваквиот потег ќе доведе до соодветна партиска организираност, а ќе делуваат и како едно, со што граѓаните ќе добијат појасна платформа. Воедно вели и дека со ова ќе се редифинира албанскиот политички блок, кој отсега ќе го сочинуваат токму ВРЕДИ и ДУИ. Сепак, смета дека четири идеологии во едно носат ризици, но и желба за државна функција, па во иднина постои можноста повторно да се одберат различни патишта.

„Има четири идеологии, во иднина ќе има два ризици, прво дека секој од лидерите, бидејќи се претпоставува дека ќе има двајца лидери кои ќе ја водат партијата и ова претставува ризик дека и двајцата ќе се обидуваат на терен да имаат повеќе подржувачи, како две фракции внатре, дали ќе бидат од страната на Изет Меџити или Билал Касами. Сега ќе има повеќе конкуренција и во иднина може да побегнат јавно од таа партија. Секогаш постои ризик, бидејќи менталитетот што е создаден кај албанските политички партии е по секоја цена да бидеш функционер на државата.“

Од Коалицијата, која вечерва ќе биде официјализирана како партија, порачаа дека нивната платформа се базира на десноцентристичка ориентација, со фокус на рееална еднаквост на албанците во институциите, правна држава и борба против корупцијата, како и суштинско спроведување на Охридскиот рамковнен договор.

Коалицијата ВРЕДИ беше формирана во 2023 година, на неколку месеци пред парламентарните и претседателски избори во 2024 година, а ја сочинуваат движењето БЕСА, Алтернатива, Демократско движење, како и Самоопределување. Во различни фази и договори имаше и вклучувања на помали структури и поедници. Според информациите, засега надвор од партијата остануваат министерот Фатмир Лимани, и вицепремиерот Арбен Фетаи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.