Туристичката комора при Сојузот на стопански комори на Македонија и официјално упати барање до Министерството за туризам на Грција за привремено одложување на примената на новиот систем за влез и излез на граничните премини за македонските државјани, во периодот од 1 јуни до 1 септември, 2026 година. Како што се вели во соопштението на Комората, иницијативата доаѓа по реакциите и укажувањата од туристичкиот сектор во земјава, кој предупредува дека евентуалната примена на системот во шпицот на летната туристичка сезона може да предизвика значителни застои на граничните премини. Ова, како што посочуваат, директно би влијаело врз квалитетот на туристичкото искуство, но и би можело да резултира со откажување на веќе резервирани аранжмани за летување во Грција.

-Грција е традиционално најзначајна туристичка дестинација за граѓаните на Македонија, а непречениот проток на патници е од суштинско значење за одржување на стабилноста и развојот на туристичката индустрија. Затоа, бараме разбирање и разгледување на можноста за временско одложување на имплементацијата на системот во текот на најфреквентниот период, се вели во барањето од - Туристичка комора при ССКМ..

Прашан за системот за влез и излез во Шенген просторот, Министерот за транспорт и врски, Александар Николовски, вели дека покрај техничко, прашањето е и политичко.

-Ова, покрај технички се и политички прашања. Мене секогаш ми била целта да ја завршиме работата а не од тоа да правиме политика или маркетинг, Јас нема да го правам тоа што го прават колегите од соседните држави, затоа што на тој начин го уништуваат процесот. И, еве ќе застанам тука,- - Александар Николовски- министер за транспорт и врски.

Системот за влез и излез во Унијата стапи на сила на 10 април, а иако од Европската Комисија уверуваа дека регистрирањето не одзема многу време, сепак тоа предизвика големи чекања на дел од граничните премини на земјите од шенген зоната. Покрај системот за влез и излез, на есен стапува на сила и ЕТИАС, односно он-лајн апликацијата која чини 20 евра и важи 3 години. Двата система се комплементарни и како што посочија од Унијата, се дел од поширокиот пакет за дигитализација и зајакнување на контролите на надворешните граници на Унијата, а со кои печатите во пасошите треба да заминат во историјата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.