Автомобилизам

„Tesla“ отпушта 200 работници одговорни за развојот на автопилотот

„Tesla“ најави отпуштање на околу 200 луѓе кои работеле на системот за автономно возење.

Според неименувани извори, „Tesla“ ќе го намали бројот на луѓе во развојниот тим на автопилотот во објектот на компанијата во Калифорнија.

Повеќето од отпуштените работеле привремено и биле платени по час, велат за медиумите луѓе од фабриката кои не сакале да го откријат идентитетот.

Илон Маск, извршен директор на „Tesla“, минатата недела ги објави плановите за отпуштање на 10 отсто од вработените со полно работно време, но и за отворање повеќе работни места по час. Тимовите вработени во Сан Матео се ангажирани во оценувањето на податоците за возилата на корисниците на функцијата „Autopilot Drive Assistance“.

Многу од членовите на тимот се специјалисти за обработка на податоци и сите тие позиции се платени на час, вели еден неименуван извор.

Вкупно, околу 200 работници се отпуштени, а претходно таму работеле околу 350 луѓе, иако некои во последните недели се префрлени во блиските погони на „Tesla“.

„Tesla“ допрва треба да коментира за ова прашање, а компанијата со седиште во Тексас има околу 100.000 вработени ширум светот. Илон Маск непријатно изненади многу работници претходно овој месец кога објави дека отпуштањата ќе бидат неопходни во оваа нестабилна економска средина.

Во интервју за „Bloomerg“, тој изјави дека околу 10 отсто од постојано вработените ќе останат без работа во следните три месеци, но дека до крајот на годината би можеле да се вработат уште повеќе работници.

Свет

Невреме со грмотевици и силен ветер во западна, централна и јужна Турција

Невреме со грмотевици денеска ја зафати западна и централна Турција. Силен дожд врне во многу турски окрузи, вклучувајќи ги Истанбул, Анкара и Анталија.

Жолто ниво за опасно време придружено со невреме и обилни врнежи за денеска објави Турската метеоролошка служба за вкупно 45 окрузи во земјата.

Во Анкара врне обилен дожд, придружен со силен ветер.

Во Истанбул, поради силниот ветер, откорнати се дрвја, а причинета е материјална штета на автомобилите паркирани наоколу, јавува турската телевизија НТВ.

Во морето кај Измир се формираше торнадо.

Брзината на ветрот достигна 118 км/ч во туристичкото место Кемер во Анталија, каде во невремето паднаа дрвја, јави ТВ НТВ.

Ситуацијата во округот Анталија останува сложена. Во морето се формираа големи бранови, а во голем број населени места во околината обилниот дожд предизвика проблеми во сообраќајот. /МИА

Свет

Иранскиот министер за надворешни работи повика на смирување на тензиите на Блискиот Исток

Иранскиот министер за надворешни работи Хосеин Амир Абдолахиан се заложи за намалување на тензиите на Блискиот Исток кои дополнително ескалираа по меѓусебните напади меѓу Иран и Израел, јави ДПА.

- Војната и воената тензија никому не му користат во регионот, затоа мора да се најде решение. Сите страни треба да се фокусираат на изнаоѓање политичко решение, изјави за иранските медиуми Абдолахиан кој престојува во Њујорк.

Според него, „Израел мора да престане да врши воени злосторства во регионот, за да стане стане возможна хуманитарната помош и размената на заложници за затвореници во конфликтот во Газа“.

За време на престојот во Њујорк, каде што учествуваше на неколку седници на Обединетите нации, иранскиот министер за надворешни работи, нагласи дека Иран нема да одговори на нападите врз воени цели во централната иранска провинција Исфахан, за кои се верува дека ги извршил Израел.

- Немаше штета или жртви по нападот со мало беспилотно летало соборено во близина на Исфахан, рече Абдолахиан.

Тој ги опиша нападите како обид на произраелските медиуми да ја истакнат воената супериорност на Израел.

- Малите соборени дронови беа повеќе како играчки со кои си играат нашите деца, рече Абдолахиан, но предупреди дека Иран ќе одговори „жестоко и цврсто“ на вистински напад од Израел./МИА

Свет

Ердоган во Истанбул се сретна со лидерот на Хамас, Ханија

 Турскиот претседател Реџеп Таип Ердоган денеска во палатата „Долмабахче“ во Истанбул го прими Исмаил Ханија, лидерот на палестинската исламистичка група Хамас, јавија турските медиуми.

Не се соопштуваат повеќе детали за средбата која се одржува зад затворени врати во претседателската резиденција.

Турскиот министер за надворешни работи Хакан Фидан пред неколку дена се сретна со Ханија во Доха, каде разговараа за последните случувања во конфликтот во Газа, соопштија дипломатски извори.

Фидан и Ханија, заедно со неговата делегација, разговараа за теми поврзани со хуманитарната помош во Појасот Газа, напорите за прекин на огнот и прашањето за заложниците, велат изворите. /МИА

притисни ентер