Драги гледачи, продолжуваме да ги одгатнуваме и најскриените мистерии кои ѕиркаат од пандорината кутија на вистината. Го „вжештуваме“ и овој вторник со одлична дебата во вашата омилена „Само Вистина“, а своите ставови ќе ги вкрстат универзитетската професорка и член на ИО на ВМРО-ДПМНЕ Иванка Василевска и новинарот Мирче Адамчевски.
Премиерот Заев му кажа „да“ на министерот Заев – дали двојната функција е тактички зафат да се поентира на сметка на економијата во влегувањето во финишот од мандатот? Кадровска вртелешка која наиде на критики со доза на цинизам – дали сепак поголемиот дел од „прашината“ остана заробена под килимот?
Револуцијата го „изеде“ екс-заменик министерот за образование - дали кормилото на управување излезе надвор од колосек и може да настрадаат и другите „деца“? Се исполнија ли очекувањата кај граѓаните или реконструкцијата стана само лоша шминка на неуспешните политики?
Францускиот амбасадор не „врати во реалноста“ и ни порача да се фокусираме на внатрешните проблеми повеќе отколку на датумот за ЕУ – дали навистина бараме преку леб погача?
Ќе го искористиме ли периодот до октомври за реорганизација и департизација на институционалниот систем за да ги оттргнеме „синџирите околу вратот“?
Moже ли да ни се сруши европската перспектива или да се оцрни интегритетот на Европската унија ако нема датум наесен?
Не пропуштајте не, гледајте „Само Вистина“ со Иванка Василевска и Мирче Адамчевски на Канал 5 Телевизија.