Нарушувањето на функцијата на штитната жлезда погодува милиони лица ширум светот, претежно жени. Нутриционистот Лога Притика Сринивасан предупредува дека тироидната жлезда е исклучително чувствителна на одредени соединенија во храната кои можат да ја забават нејзината работа или да ја попречат апсорпцијата на хормоните.

Избегнувањето одредени намирници, може значително да го зголеми ефектот на терапијата и да го подобри метаболизмот, се наведува во “Times of India”.

Бел леб

Рафинираното брашно од кое се прави белиот леб е сиромашно со растителни влакна и хранливи материи, што предизвикува ненадејни скокови на шеќерот во крвта и дополнително оптоварување на метаболизмот.

Многу видови леб од продавниците содржат и адитиви кои го отежнуваат варењето, а кај луѓе со автоимуни заболувања како што е Хашимотовиот тироидитис, глутенот може да стимулира воспалителни процеси. Наместо тоа, експертите препорачуваат интегрален леб, или безглутенски опции, кои не го нарушуваат хормоналниот баланс.

Чипсови

Омилена ужина на многумина е чипсот, но тој може да биде штетен за здравјето на тироидната жлезда. Проблем не е само големата количини на јодирана сол, туку и транс мастите и рафинираните масла што се користат во производството. Овие масти, кај лица со намалена функција на штитната жлезда може да го попречуваат апсорбирањето на јодот во телото, кој е клучен минерал во синтезата на тироидни хормони.

Честото јадење чипс може да ја зголеми телесната тежина и да предизвика инсулинска резистенција, што дополнително ја оптоварува работата на жлездата и го забавува метаболизмот.

Кикирики

Иако кикириките се богати со протеини, тие содржат гоитрогени, природни соединенија кои можат да ја попречуваат синтезата на тироидните хормони. Кај луѓето кои веќе земаат терапија, ова може да ја намали ефикасноста на лековите и дополнително да ја забави работата на жлездата.

Повремената консумација нема да предизвика штета, но јадењето путер од кикирики или печени кикирики секој ден, може да ја блокира правилната апсорпција на јод. Наместо тоа, изберете бадеми или ореви, кои се побезбедни и хранливо побогат избор.

Зеленчук од семејството крстовидни растенија

Зелката, брокулата и карфиолот се исклучително здрави, но за луѓето со нарушувања на тироидната жлезда можат да бидат проблем ако се јадат сурови и во големи количини, пишува „Тајмс оф Индија“. Тие содржат тиоцијанати, соединенија кои го спречуваат навлегувањето на јод во тироидната жлезда, кои потоа таа го претвора во тироидни хормони (T4 и T3), ова доведува до хормонален дисбаланс или зголемување на жлездата.

Со нивно готвење, печење или обарување, нивниот гоитроген ефект значително се намалува, па можете повремено да уживате во нив без грижа.

Кафе

Утринското кафе може да влијае на апсорпцијата на лекови за тироидната жлезда. Истражувањата покажаа дека пиењето кафе веднаш по земањето на терапијата ја намалува нејзината ефикасност. Покрај тоа, кофеинот ги зголемува нивоата на кортизол, хормонот на стрес, што може да ги влоши симптомите на замор и анксиозност поврзани со нарушувања на тироидната жлезда.

Експертите советуваат да се почека со пиењето кафе најмалку 30 до 45 минути по земање на лекот, или да се изберат благи билни чаеви, како што е чајот од камилица.

Производи од соја

Тофу-то и другите производи од соја често се сметаат за здрави, но сојата содржи изофлавони, соединенија кои можат да го забават производството на тироидни хормони и да ја попречат апсорпцијата на лековите. Нутриционистите препорачуваат да поминат неколку часа помеѓу земањето лекови и производите од соја за да се намали можноста за интеракција.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.