Од пиење вода од чиа семе и гел од морска мов до супа од коски за „лекување“ на цревата. На овие намирници им се припишуваат чудотворни ефекти, од подобрување на расположението до зголемување на енергијата. Сепак, научниците предупредуваат дека реалноста е посложена и многу популарни тврдења не држат вода. За повеќето здрави луѓе, опсесијата „лечење“ на цревата е непотребна, објавува BBC News.

Што е цревниот микробиом?

Научната водителка на BBC, Каролин Стил, објаснува дека цревата го опфаќа целиот дигестивен тракт, од устата до анусот. Внатре во нив живеат трилиони бактерии, вируси и габи кои го сочинуваат цревниот микробиом, кој е клучен за функционирање на телото бидејќи „влијае на вашето ментално и физичко здравје“.

Стил вели дека „цревниот микробиом е поуникатен од отпечаток од прст“, а здравиот микробиом се поврзува со подобро искористување на енергијата од храната, регулирање на шеќерот во крвта и подобрен имунитет. Истражувањата, исто така, укажуваат на врска помеѓу здравјето на цревата и менталната благосостојба, вклучувајќи намалена анксиозност и подобрено расположение.

Дали популарните намирници ја оправдуваат својата функционалност?

Микробиологот Алан Вокер и научникот за здравјето на цревата, д-р Меган Роси, велат дека иако има „зрно вистина“ во многу популарни трендови поврзани со одредени намирници, нивните ефекти често се преувеличуваат и се претставуваат како чудотворни решенија.

Водата со чиа семе е богата со растителни влакна, „кои можат да ги хранат корисните бактерии во цревата и да помогнат во редовноста на столицата“, вели Роси. Сепак, Вокер објаснува дека ниту еден извор на растителни влакна не е доволен бидејќи различни микроби се хранат со различни влакна, па затоа разновидноста е поважна од која било состојка. „Нема штета од пиењето вода со чиа семе, но таа сама по себе има мала корист“, заклучува тој.

Маслиновото масло генерално се смета за антицоспалително, здраво за срцето и може да помогне во ублажување на запекот, објаснува Вокер. Сепак, има малку докази дека земањето концентрирана „голтка“ од маслото конкретно го зајакнува микробиомот. „Нема значајна разлика помеѓу пиењето чисто масло директно или негово додавање во храната“, вели Вокер.

Гелот од морска мов, еден вид алги, стана популарен бидејќи содржи растителни влакна и одредени витамини и минерали. Сепак, Роси вели дека „постојат многу малку научни докази што ја поддржуваат неговата употреба за подобрување на цревниот микробиом или дигестивната функција“. Таа предупредува на високите дози, особено кај луѓе со воспалително заболување на цревата. Вокер додава дека алгите можат да бидат извор на тешки метали и јод, а прекумерното консумирање може да предизвика здравствени проблеми.

Супата од коски, која се прави со долго варење на животински коски, е богата со хранливи материи. Сепак, Вокер вели дека повеќето од овие хранливи материи се апсорбираат во тенкото црево, додека повеќето цревни микроби живеат во дебелото црево, што значи дека многу малку од нив доспеваат до самите микроби. „Нема цврсти докази дека има некакви корисни ефекти врз цревниот микробиом“, додава тој. Роси се согласува, предупредувајќи на „негативното влијание што може да го има врз нивото на холестерол ако заситените масти не се отстранат од врвот“.

Комбухата е ферментиран чај, а Роси вели дека е „голем обожавател“ на традиционалната комбуха бидејќи содржи природни киселини и антиоксиданси. Сепак, таа предупредува дека не сите комбуха чаеви се исти. „Видете дали има честички што лебдат, тоа е знак за жива култура; проверете дали има додаден оцет - вистинската комбуха го нема тоа; и избегнувајте варијанти без шеќер со додадени засладувачи“, советува таа.

Кога да побарате медицинска помош?

Каролин Стил вели дека симптомите за проблем со цревата може да вклучуваат постојан запек, дијареја, прекумерни гасови или постојана болка во стомакот. Во овие случаи, важно е да побарате медицински совет, наместо да се прибегнувате кон екстремни диети. „Ако имате проблем со цревата, тогаш исклучувањето на лебот нема да го реши тоа“, вели таа.

Таа нагласува дека повеќето луѓе не треба да прават драматични промени во исхраната. „Повеќето од нас не треба да ги третираат цревата затоа што ако вашите црева се здрави, ништо од тоа нема да направи разлика“. Наместо да ги следите трендовите, таа советува едноставни чекори за здрави црева, како што се „јадење повеќе растенија, зголемување на внесувањето на растителни влакна и намалување на ултра-преработената храна“.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.