Македонија

Дали цигарите ќе поскапат за 5 денари?

Цигарите повторно ќе поскапуваат. Владата планира да ја зголеми акцизата од наредната година, па цигарите и сите тутунски производи од 1ви јануари наредната година да се зголемуваат од 2 до 5 денари се до 2030тата година.

Во Собрание веќе пристигнаа измените во законот за акцизи, кои ќе се носат по скратена постапка. Па така: акцизата за цигари предвидуваат да се зголемува за 0,23 денари по парче секој први јануари. Додека пурите да се зголемат за 4 денари наредната, а од 2025тата за 2 денари парче.

Измените во законот предвидуваат и воведување растителен билен производ за пушење по пат на загревање, независно дали содржи или не содржи никотин, кој ќе подлежи на акциза, со цел ограничување на здравствените ризици поврзани со употребата на истиот.

Владата овие измени ги правда со усогласување со европската регулатива, а на овој начин ќе се бори да го дестимулира пушењето. Дополнително зголемената акциза ќе донесе и повеќе пари во државната каса. Според пресметките наредната година буџетот треба да биде потежок за околу 17 милиони евра.

Освен овие, во Собрание за гласање чекаат и измените од даночната реформа, со кои се предвидува зголемување на одредени даноци, како ДДВ-то на дел од храната од 5 на 10%, но и воведувањето на Солидарниот данок кој еднократно треба да го платат попрофитабилните фирми. За експертите зголемувањето на даноците е очекувано.

„Дали буџетот може да ги сервисира обврските кои ги презел ?! Нивото на јавните расходи, и од друга страна порастот на јавниот долг ја наметнува потребата за зголемување на даночното оптоварување. Оттука воопшто не е за изненадување ако видиме владата да преземе и други мерки со кои ќе расте даночното оптоварување. Се разбира тоа ќе влијае на порастот на цените.“ кажа Зоран Ивановски, професор економија.

Инаку во изминативе 10 години, кутија цигари се зголемуваше по просечни 5 денари, поради редовното годишно зголемување на акцизата, давачка која ја воведе државата во 2013тата со цел да го дестимулира пушењето. За тој период кутија цигари поскапи двојно. Во моментов кутија цигари чини минимум 110 денари. Последното зголемување беше на 1ви јули годинава.

Свет

По пет дена е спасен човек под урнатините на зграда во ЈАР: Ова е чудо (ВИДЕО)

Човек е спасен од урнатините пет дена по уривањето на зграда во Јужна Африка, а премиерот на Западен Кејп Алан Винде рече дека тоа не е ништо помалку од чудо.

Во понеделникот се урна петкатна зграда во градот Џорџ, источно од Кејптаун.

Во официјалното соопштение се наведува дека таму во моментот имало 81 лице и дека досега е потврдена смртта на 13 лица, од кои 29 го преживеале колапсот, а 39 од нив се уште се сметаат за исчезнати. Во објава на Х денес, Винде напиша дека преживеан маж е успешно извлечен од урнатините по 116 часа.

Со цел да се обидат да стигнат до сите жртви кои останале заробени во урнатините, спасувачите во понеделникот употребија кранови, дупчалки и голи раце за да се обидат да ги спасат. Спасувачките операции продолжуваат.

Свет

Силен земјотрес го погоди Азербејџан, засега нема извештаи за жртви или штета

Земјотрес со јачина од 5,1 степени според Рихтеровата скала го погоди денеска Азербејџан, соопшти Европскиот медитерански сеизмолошки институт (EMSC).

Земјотресот бил на длабочина од 10 километри, додава EMSC.

Епицентарот на земјотресот се случил на 19 километри североисточно од градот Ланкаран, кој има околу 210.000 жители.

Засега нема информации за евентуална материјална штета.

Свет

Стотици луѓе во бегство по ненадејниот прекуграничен руски напад на Украина

Ненадејниот прекуграничен руски напад на копнените сили во североисточна Украина предизвика евакуација на речиси 1.800 луѓе од Харковската област, изјави регионалниот гувернер.

Тешките борби продолжија во пограничната област по вчерашниот ненадеен упад на руските сили. Украина, да потсетиме, веќе некое време ја очекува руската летна офанзива. Едно од сценаријата е можен обид да се заземе Харков, вториот по големина град во Украина, каде што живеат повеќе од милион луѓе и по две години војна.

Но, Украина инсистира на тоа дека нејзините сили се способни да одолеат на секој напад, вклучувајќи го и последниот руски упад во регионот Харков. Денеска Русија објави дека освоила пет села во близина на градот Вовчанск во најновата офанзива. Би-Би-Си не можеше независно да го потврди тврдењето.

Се уште не е јасно до каде ќе напредуваат Русите, односно дали се работи за пробен напад чија цел е тестирање на украинските одбранбени линии или почеток на нешто поголемо.

Украинската артилерија засега возвраќа. Насилната размена на оган гласно одекнува низ улиците оштетени од бомбите.

Вкупно 1.775 луѓе се евакуирани, соопшти регионалниот лидер во Харков, Олех Синехубов на социјалните мрежи. Уште стотина луѓе останаа во Вовчанск, кој е на само 6 километри од руската граница.

Серхиј, жител на Вовчанск, изјави за Би-Би-Си дека неговата куќа и возилата биле уништени од руска бомба. Неговата сопруга била итно пренесена во болница со тешки повреди. Серхиј рече дека не сакал да замине бидејќи се плаши што може да се случи со нивните четири кози.

Додека репортерите на Би-Би-Си ја гледаа штетата, се слуша свиреж на бомби фрлени од руски авиони, а потоа земјата била потресена од силните удари од експлозијата.

Руските воздухопловни сили имаат сè поубиствен ефект, а Украина засега нема одговор. Украинските власти велат дека Русија има доволно ресурси да ја влоши ситуацијата во пограничните области, но не и да го освои градот Харков.

Според Би-Би-Си, извештаите од Русија сугерираат дека Москва се надева дека ќе создаде тампон зона од 10 километри меѓу Украина и нејзиниот регион Белгород за да ги отежни прекуграничните упади за проукраинските партизани.

Вчера, портпаролот на Белата куќа за национална безбедност, Џон Кирби, изјави за новинарите дека Русија „ќе направи дополнителен напредок во наредните недели во обид да воспостави тампон зона долж украинската граница“.

Москва се обиде да го искористи одложеното пристигнување на американското оружје со насилна офанзива во источниот регион Доњецк. Тежината на борбите на североистокот дополнително се илустрира со растечките амбиции на Русија, заклучува Би-Би-Си во својот извештај од регионот Харков.

притисни ентер