Македонија

Борисов: Изјавата на Мицкоски е чиста провокација

Апсолутна провокација – вака лидерот на ГЕРБ и поранешен премиер на Бугарија Бојко Борисов ја нарече изјавата на премиерот Мицкоски во однос на промена на македонскиот устав.

Борисов чија партија ја предводи новата бугарска влада порача дека Софија не треба да посветува големо внимание на ваквите пораки на Мицкоски, кој вчера отвори јавна дилема - зошто Македонија треба да го промени својот устав, но не и Албанија каде на последниот попис имаше двојно повеќе Бугари.

-Апсолутна провокација и едноставно не треба да им се посветува внимание. Министерството за надворешни работи реагираше добро, така што тие тоа го можат.- Бојко Борисов – Претседател на ГЕРБ.

Во синоќешната реакција на Бугарското МНР се вели дека последните изјави на Мицкоски ја искривуваат реалноста и ги поткопуваат напорите за градење добрососедски односи и за европска интеграција.

-Сакаме да нагласиме дека прашањето за правата на Бугарите во Македонија не е билатерален спор меѓу нашите две земји, туку е прашање кое влијае на темелните европски вредности. Напредокот во процесот на европска интеграција на Македонија е можен само преку целосна и сеопфатна имплементација на европскиот консензус, чиј важен дел се измените на македонскиот устав.- МНР на Бугарија.

Се вели меѓудругото во реакцијата на бугарското МНР. Премиерот Мицкоски пак, од собраниската говорница, одговарајќи на пратеничко прашање, праша зошто има различни услови за Македонија и Албанија, кога и во двете земји има граѓани кои се идентификуваат како Бугари.

-Зошто во Македонија околу седум, осумстотини Бугари кои декларираат дека мајчин јазик им е бугарскиот треба да ги ставиме во устав, а зошто Албанија го нема тој услов, да овие осум илјади не ги стави во уставот. Тоа е суштинското прашање. Јас би сакал ние да разговараме како граѓани, Македонци и останати, не само Македонци и Албанци и Турци и Срби и Роми и Бошњаци и Власи, но да видиме зошто дозволивме ова да се случи. Тоа е суштинското прашање.-Христијан Мицкоски – Претседател на владата.

И под безмалку еден месец од формирањето на новата бугарска влада, се уште нема контакти меѓу Скопје и Софија. Очејкувањата се дека шефовите на дипломатите Муцунски и Георгиев да се сретнат на маргините на безбедносната конференција во Минхен која започнува утре.

Ракомет

Алкалоид со победа го заврши регуларниот дел на Суперлигата

Ракометниот клуб Алкалоид со победа од 29:26 над ГРК Охрид го заврши регуларниот дел на Суперлигата и во плејофот пренесува два бода!

Најдобар стрелец во екипата беше Мартин Серафимов со осум гола, пред Мартин Ивановски со шест гола.

Следен натпревар за тимот е во Европскиот Куп на ЕХФ на 30 март, каде игра дуел за место во полуфиналето против романска РК Баја Маре.

Натпреварот почнува од 19:00 часот.

Македонија

Двајца иселеници од дебарско загинаа во сообраќајка во Италија

Во тешка сообраќајна несреќа што синоќа се случила во Италија, животот го загубиле двајца иселеници од дебарско.

Станува збор за Бајрам Бајрамоски (53) од село Жировница, општина Маврово и Ростуше, кој според неговите соселани од Жировница, во Италија бил над две децении. Оженет и татко на две деца.

Втората жртва е Фуат Етемовски (65) од дебарското село Џепиште, кои исто така со семејството долги години живеел во Италија.

Според полицијата несреќата се случила во близина на Боскалто ди Лореџија кога од работа се враќале во нивниот дом во областа Тревизо, јавуваат италијанските медиуми.

Возилото, камионче во кое се наоѓале директно се судрило со тешко товарно возило, камион. Двајцата починале на самото место а третото лице кое било со нив, босански државјанин бил тешко повреден./МИА

Здравје

Научниците со шокантно откритие: Човечкиот мозок во еден случај се „јаде“ самиот себе

Кога на човечкиот мозок му снемува енергија поради продолжената физичка активност, тој почнува да го „јаде“ сопственото масно ткиво и да го користи како гориво.

Ова го покажала студијата на мозокот на маратонците.Откритието укажува на сосема нова форма на невропластичност, која може да му помогне на човечкиот мозок да функционира при долготраен екстремен напор, пишува ScienceAlert.

Скенирањето на мозокот на учесниците во студијата покажало дека за време на маратонската трка, кога нивото на гликоза во мозокот е опасно ниско, некои неврони почнуваат да го „џвакаат“ миелинот, супстанцијата богата со липиди (масти) која ги опкружува аксоните на нервните клетки.

Миелинот е познат по тоа што им помага на невроните да испраќаат пораки поефикасно, но овој заштитен слој не е само едноставен статички изолатор, како што некогаш мислеа научниците. Новото истражување сугерира дека невроните можат да го користат овој масен слој и да ја преобликуваат нивната дебелина за да се прилагодат на промените во околината.

Сега се чини дека мозочните клетки можат дури и да користат миелин како гориво, но само ако е потребно.

Скенирајќи го мозокот на 10 маратонци (8 мажи и 2 жени) пред и по трката на 42 километри, шпанските невролозите забележале големи промени во маркерите на миелинот во белата маса на мозокот, каде што се концентрирани овие масни обвивки.

Помеѓу 24 и 48 часа по маратонот, тркачите покажале знаци на значително губење на миелинот во областите на мозокот поврзани со моторната функција и координација, како и сензорна и емоционална интеграција.

Две недели по настанот, миелинските маркери почнале да се враќаат, а два месеци подоцна тие биле стабилизирани кај 6 учесници во студијата чии скенирања на мозокот продолжило.

Студијата е објавена во списанието Nature Metabolism.