Македонија

„Алтернатива“ го доби здравство, информатичко општество и доби министер за дијаспората

Заев и Гаши официјално си подадоа рака- Алтернатива влегува во Владата и ќе добие три министерски места: здравство, информатичко општество и администрација и едно повторно активирано без ресор за дијаспора. 

Во други три министерства ќе назначат и заменици министри од партијата на Гаши – во министерствата за образование, култура и најверојатно во земјоделство. Директорски позиции Алтернатива ќе преземе во над 40 институции, меѓу кои Мепсо, ПИОМ, Агенцијата за странски инвестиции, бројни функции со кои во моментов раководат кадри од СДСМ и ДУИ.

Од имињата за кои деновиве се споменуваат, засега само е извесно дека генералниот секретар на Алтернатива, Беким Сали, е блиску да седне на министерската функција во министерството во здравство. Со ова, по 4 години од ресорот заминува Венко Филипче, но премиерот Заев останува на оценката дека тој бил најдобирот министер за здравство досега.. Дали во новиот владин состав тој ќе добие друга функција, ќе се чека одлуката на новиот мандатар.

Заев не крие дека негов фаворит за победник на изборите во СДСМ и негов наследник на премиерската позиција е Димитар Ковачевски. Верува дека новата влада ќе го истера мандатот до 2024 година и вонредни избори нема да има..

Оставката, рече Заев, ќе ја депонира за неколку недели, откако ќе помине самитот на ЕУ од кој се очекува конечно да добиеме датум за преговори..

Парламентарното мнозинство сега брои 64 пратеници, со најава од Заев дека ќе порасне на 66. Во договорот за проширување на владината програма, Гаши бара од Владата засилен ангажман за девет теми. Најголемо внимание предизвика иницијативата да повикуваат експерти од ЕУ кои би направиле ревизија на неколку судски случаи, меѓу кои и Монструм и Диво Насеље..

Македонија

Поскапуваат горивата

Горивата од полноќ поскапуваат од пола до денар и пол. Дизелот и Екстра лесното масло за домаќинство поскапуваат за пола денар, а Еуросупер БС-95 и Еуросупер БС-98 за денар и пол. 

Според денешната одлука на Регулаторната комисија, од полноќ се зголемува и цената на мазутот за 0,337 денари за литар.

Од полноќ, Еуросупер БС-95 ќе се продава по цена од 81 денар за литар, а Еуросупер БС-98 по цена од 83 денари за литар. Новата цена на дизелот ќе биде 76 денари за литар, а на Екстра лесното масло за домаќинство 75,5 денари за литар.

Регион

Пролонгирана исплатата на европски пари за Хрватска

Владата на Хрватска побара одложување на исплатата на 835,6 милиони евра од Механизмот за заздравување и отпорност, бидејќи сè уште не е донесена законската рамка која треба да ја редефинира и подобри работата на државните компании.

Хрватската Влада упати барање за исплата на 20 декември, но по барањето за одложување средствата ќе бидат исплатени во март.

Шестата транша според Механизмот требаше да изнесува 835,6 милиони евра и да послужи за исполнување на 26-те фази и реформски цели предвидени во Националниот план за закрепнување и отпорност. Хрватска досега повлече речиси 63 отсто од средствата од грантот, а вкупната сума се планира да биде 10 милијарди евра. Ова финансирање трае до 2026 година.

Нема причина за загриженост. И други земји-членки, исто така, претходно побараа одложувања. Владата има доволно време да ја усвои законската рамка во грејс периодот. Нацрт-правната рамка е на консултација со јавноста и очекуваме да биде усвоена до март, изјавија претставници на Европската комисија

Тенис

Австралискиот новинар Тони Џонс јавно им се извини на Ѓоковиќ и српските фанови

Австралискиот новинар Тони Џонс им се извини на Новак Ѓоковиќ и на фановите на Србинот за коментарите што ги даде на телевизија во петокот, а кои десеткратниот шампион на Австралија опен ги оцени како „навредливи“.

Ѓоковиќ одби да го даде своето вообичаено интервју на теренот по неговата победа во четвртото коло над Чехот Јиржи Лехечка во неделата, чекајќи јавно извинување од Џонс и официјалниот преносител на турнирот во Мелбурн, „Канал 9“.

Џонс се потсмеваше на Ѓоковиќ и српските навивачи кои се собраа пред кабината за пренос на „Канал 9“, велејќи дека 24-кратниот Гренд слем шампион е „преценет“ и „минато“.

Во денешното интервју за каналот, Џонс рече дека коментарите ги смета за „шега“ и веднаш му се извини на „штабот на Ѓоковиќ“ откако сфати дека тие не се прифатени со смисла за хумор.

-Се извинувам на Новак и на српските навивачи. Ние изградивме добри односи со српските навивачи со текот на годините... имаше мајтапење и мислев дека тоа што го правам е продолжение на тие шеги. Сосема е јасно дека ова не беше така протолкувано. Се чувствувам како да ги разочарав српските навивачи, прокоментира новинарот.

Џонс рече дека единствениот коментар за кој особено зажалил е „избркајте го“, што тој прифатил дека може да се толкува како упатување на депортацијата на Ѓоковиќ од Австралија затоа што не бил вакциниран против КОВИД-19 на почетокот на 2022 година.

-Тоа го налути Новак, што сега целосно го разбирам. Тоа беше непријатна ситуација, додаде тој.

Седмиот носител Ѓоковиќ во вторник во четвртфиналето игра против светскиот рекет број 3, Карлос Алкараз.

притисни ентер